KƲTƆƆSƲTƲ
TAKƎLAƔA NAALƐ NYƎŊKA
Kʋtʋlʋtʋ
Pɑ kɛɛsǝɣɩ tɑkǝlɑɣɑ kɑnɛ kɑ tɑɑ tɔtɔɣɔ Tɑfiiti pǝyɑlʋ Sɑlʋmɔŋ kɑwulɑɣɑ tɔɣɔʋ tɔm. Ɩsɔ sɛɛʋ tɔm kɛnɑ pǝ tǝnɑ pǝ kite. Pǝ tɔɔ kɛ́ tɑkǝlɑɣɑ ŋmɑɑlʋ kɛɛsǝɣɩ Sɑlʋmɔŋ ŋmɑʋ kɛ Ɩsɔ tǝsɛɛlɛ nɑ Lefii kɔtǝlɑɑ kpɑʋ tɔm, nɑ Yutɑ ɑwulɑɑ lɛlɑɑ tɑɣɑnʋɣʋ kɛ ɩsɔ sɛɛʋ, nɑ ɩsɔ sɛɛlɑɑ Tɛɛʋ ɑcimɑ tɑɣɑnʋɣʋ nɑ ɩsǝnɑ pɑ hiiwɑ kiiŋ tɑkǝlɑɣɑ tɔ.
Ɩsǝnɑ pɑ fɑɣɑ Kʋtɔɔsʋtʋ II tɑkǝlɑɣɑ tɔ:
Sɑlʋmɔŋ kɑwulɑɣɑ tɔɣɔʋ nɑ Ɩsɔ tǝsɛɛlɛ ŋmɑʋ, titite 1–9
Ɩsɔ sɛɛʋ tɑɣɑnʋɣʋ nɑ Yosɑlɛm nyǝ́mɑ kuuu tɔm, titite 10–36
ƖSƐƔƐLƖ WULAƲ SALƲMƆŊ TƆM
1
Ḿpʋ́ɣʋ́ Tɑfiiti pǝyɑlʋ Sɑlʋmɔŋ nyɔɔsɑ ɩ kɑwulɑɣɑ. Ɩ Ɩsɔ Tɑcɑɑ kɑ wɛ ɩ wɑɑlɩ kɛ́ nɑ ɩ́ kʋsǝɣɩ ɩ nyʋɣʋ.
Sɑlʋmɔŋ sǝlǝmɑ Ɩsɔ kɛ́ lǝmɑɣɑsɛɛ
(Awulɑɑ I 3:4-15)
Ḿpʋ́ɣʋ́ kʋyɑkʋ nɑkʋlɩ Sɑlʋmɔŋ kotɑ Ɩsɛɣɛlɩ nyǝ́mɑ tǝnɑ. Ɩlɛnɑ pǝ́ tɩɩ kǝlǝnɑ yoolɑɑ iyɑɣɑ (1000) nyɔɔŋ nyǝ́mɑ, nɑ nɩɩnʋwɑ (100) nyɔɔŋ nyǝ́mɑ, nɑ tɔm hʋʋlɑɑ nɑ lʋlʋŋ nyɔɔŋ nyǝ́mɑ. Ɩlɛnɑ ɩ́ nɑ pɑ tǝnɑ mpɑ pɑɑ kotɑ ɩ kiŋ tɔ pɑ́ polo tǝfɛɛnlɛ nte tǝ wɛ Kɑpɑwɔŋ tɔ. Mpi tɔ, tǝnɑɣɑ Ɩsɔ tǝmlɛ tʋ Moisi kɑ lɑpɑ cokǝle nteɣe wʋlɑɣɑ tɛtʋ tɑɑ tɔ tɩɩ wɛɛ.
Wɑɑtʋ ɩnɩ Tɑfiiti kɑ tɛmɑ Ɩsɔ ɑtɑkɑɑ kpɑɣɑʋ kɛ Kiliyɑtɩ-Yeyɑlim nɑ ɩ́ ponɑ-ɩ Yosɑlɛm. Nɑ ɩ́ sɩɩ lonte nte tǝ tɑɑ ɩ kɑ tɑɣɑnɑ-ɩ tɔɣɔ cokǝle tɑɑ. Amɑ ɩ sɩɩ nyǝɣǝlʋɣʋ kʋsɛɛmʋɣʋ kɔtɑɣɑ tǝlɑtɛ kɛ cokǝle ɩsɛntɑɑ. Ntɛɣɛ Ulii pǝyɑlʋ Pǝsɑlɛlɩ wei ɩ kɛ́ Uu sɑɑlɩ tɔ ɩ kɑ lupɑ.
Tǝnɑɣɑ Sɑlʋmɔŋ nɑ ɩ wɑɑlɩ nyǝ́mɑ tǝnɑ pɑ polɑɑ nɑ pɑ́ pɔɔsɩ Ɩsɔ. Nyǝɣǝlʋɣʋ kʋsɛɛmʋɣʋ kɔtɑɣɑ tǝlɑtɛ nte tɩɩ wɛ tǝsulle cokǝle kiŋ tǝnɑ tɔ tǝ tɔɔ kɛ́ Sɑlʋmɔŋ lɑpɑ Tɑcɑɑ kɛ kɔtɑsɩ nsi kɔkɔ nyɑɣɑ sɩ tǝnɑ tɔɣɔ iyɑɣɑ (1000). Ḿpʋ́ɣʋ́ Tɑcɑɑ lɩɩ ɩ tɔɔ kɛ́ ɑhoo ɑnɩ nɑ ɩ́ tɔmɩ-ɩ sɩ: Sǝlǝmɩ-m mpi n cɑɑ sɩ mɑ hɑ-ŋ tɔ.
Ntɛnɑ Sɑlʋmɔŋ cɔ-ɩ sɩ: Kʋpɑntʋ kɛ n lɑpɑ mɑ cɑɑ Tɑfiiti nɑ ń yele sɩ mɑ́ lɛɛtɩ ɩ lonte tɑɑ. Mpʋ tɔ, Tɑcɑɑ Ɩsɔ, lɑ nɔɣɔ ŋkɑ n kɑ sɩɩ mɑ cɑɑ Tɑfiiti tɔ. Mpi tɔ, piitim mpi pǝ tɔɔ n kpɑ-m wulɑʋ tɔ pǝ yǝlɑɑ wɛ pɑɣɑlɛ kɛ́ ɩsɩɩ kɑnyǝŋɑ. 10 Ɩlɛ lɑ suulu nɑ ń hɑ-m lǝmɑɣɑsɛɛ nɑ nyǝm nɑ mɑ́ cɛkǝnɑ kɑwulɑɣɑ tɔɣɔʋ kɛ yǝlɑɑ pɑnɛ pɑ tɔɔ. Ye pǝ tɑɣɑ mpʋ nɔɣɔlʋ kɑɑ pǝsɩ nyɑ́ yǝlɑɑ sɑmɑɑ ɩnɛ.
11 Ntɛnɑ Ɩsɔ cɔ Sɑlʋmɔŋ sɩ: Timpi n tɑ sǝlǝmɩ-m wɛnɑʋ, yɑɑ teeli, yɑɑ nyɑ́ kolontunɑɑ ɩ́ sɩ, yɑɑ weesuɣu kʋtɑɣɑlʋɣʋ, ɩlɛnɑ ń sǝlǝmɩ-m lǝmɑɣɑsɛɛ nɑ nyǝm sɩ ń pǝsɩ nɑ ń tɔɣɔnɑ kɑwulɑɣɑ kɛ mɑ yǝlɑɑ mpɑ pɑ tɔɔ mɑ kpɑ-ŋ wulɑʋ tɔ. 12 Mɑɑ hɑ-ŋ lǝmɑɣɑsɛɛ nɑ nyǝm mpɩ, nɑ wɛnɑʋ, nɑ teeli, nɑ pǝ kǝlɩ ɑwulɑɑ tǝnɑ. Pɑɑ kʋpǝmɑ, pɑɑ nyɑ́ wɑɑlɩ nyǝ́mɑ.
13 Ḿpʋ́ɣʋ́ Sɑlʋmɔŋ kʋlɑ cokǝle cɔlɔ tǝnɑɣɑ Kɑpɑwɔŋ tǝfɛɛnlɛ nɑ ɩ́ mǝlɩ Yosɑlɛm nɑ ɩ́ tɔɣɔ Ɩsɛɣɛlɩ nyǝ́mɑ tɔɔ kɛ́ kɑwulɑɣɑ.
Sɑlʋmɔŋ toŋ nɑ ɩ wɛnɑʋ pǝ tɔm
(Awulɑɑ I 10:26-29; Kʋtɔɔsʋtʋ II 9:25-28)
14 Ḿpʋ́ɣʋ́ Sɑlʋmɔŋ kpeɣelɑ ɩ yoou kɛɛkɛnɑɑ nɑ pǝ kpɑɣɑnǝŋ nɑ pǝ́ lɩɩ kɛɛkɛnɑɑ iyɑɣɑ nɑ nɑsǝlɛ (1400), nɑ kpɑɣɑnǝŋ iyisi nɑɑnʋwɑ nɑ nɑɑlɛ (12000). Ɩlɛnɑ ɩ́ sɩɩ pǝ tɑɑ lɛntɩ kɛ ɩ kiŋ kɛ Yosɑlɛm. Pǝ kɑɑsɑ nti ɩlɛnɑ pɑ́ sɩɩ tǝlɛɣɛ timpi timpi pɑɑ tɑɣɑnɑɑ sɩ pɑ́ sɩɩ-tɩ tɔ. 15 Sɑlʋmɔŋ kɑwulɑɣɑ wɑɑtʋ liɣitee kɑ wɛ Yosɑlɛm tɑɑ kɛ́ ɩsɩɩ pɛɛ. Nɑ pǝ́ kɑɑsɩ nɑ kpeŋkpelɑsɩ kʋpɑŋsɩ nɑ́ɑ́ tɔɔlɩ yem ɩsɩɩ tɩɩŋ wei pɑ yɑɑ sɩ Sikomɔɔ nɑ ɩ́ nyɔɔkɩ tɛtɛkǝlɛ tɑɑ tɔ. 16 Icipiti nɑ Silisii pǝ ɑcɑlɛɛ tɑɑ kɛ́ pɑɣɑtǝlɑɑ pukɑɣɑ nɑ pɑ́ yɑkɩ Sɑlʋmɔŋ kpɑɣɑnǝŋ nɑ pɑ́ kɔŋnɑ. 17 Liɣitee nyǝɣǝtʋ nɑsǝtoso nɑsǝtoso (600) kɛ pɑɣɑtǝlɑɑ yɑkɑɣɑ Icipiti yoou kɛɛkɛnɑɑ. Ɩlɛnɑ pɑ́ yɑkɩ kpɑɣɑnǝŋ kɛ nyǝɣǝtʋ nɩɩnʋwɑ nɑ nɩɩlɛ nɑ nɑɑnʋwɑ nɑɑnʋwɑ (150). Pɑ yɑkɑɣɑ nɑ pɑ́ pɛɛtǝɣǝnɑ mpʋ tɔtɔɣɔ Hiti nɑ Silii pǝ ɑwulɑɑ.
Sɑlʋmɔŋ tɑɣɑnǝɣɩ Ɩsɔ tǝsɛɛlɛ ŋmɑʋ tɔm
(Awulɑɑ I 5:15-32; 7:13-14)
18 Ḿpʋ́ɣʋ́ Sɑlʋmɔŋ tʋ́ ɩ tɑɑ sɩ ɩ kɑ́ ŋmɑ́ Tɑcɑɑ kɛ ɩ tǝsɛɛlɛ nɑ ɩ kɑwulɑɣɑ tǝyɑɣɑ.