Atham woIuanna 1
Atham wonothon ammakka oIuanna pokurrot
Lon lothikkoik
OIuanna pokat nti iul wothothïlettat woIeccuo, ipokat okin oIeccuo. Okin thimmarok ana okin thoccïkothe akka akwere ana okin thothntorok. OIuanna pakkaro oIeccuo itti lon lothikkoik, okkwi ipokkot cik thupuththuput okin Oththan (1.1–2). OIuanna paik pakwarikiet ul wung iakkakkaro lon loIeccuo akka ul iangkene ngkarra wokat woppot iocukkwot nolon itti oIeccuo pokat oMiccie (2.22). Okin thocukkwot nan itti kwaat ngka kopul iponyi (4.2). Ul ioccokothe lon nomïkït wonu itti wamꞌrintitta ilon ilakin thongkenettat nci nomun (2.24).
OIuanna pipittathe ul itti wikkoik thikkoik thella lon ilokithak tit ana ongarot. Kwokat cik akwiꞌret kin itti okin thakannongarot llon nuthuk anaruk ngngre ngen (3.18). Kwerekanthet kin itti okin thaccokot lon nomïkït lokkul woKapik ana occïkot lon ilonthomat lung. Kwokwarikiekathekin itti okin thaꞌrungkwot nothommakot oMiccie, othakka itti amma akwanthan attang akin ella nꞌre tokït kung (2.28).
Lon ilaik iatham
1. Lon ilana thikkoik (1.1–4)
2. Thikkoik tothun unongappa ana ukul wung oIeccuo (1.5—2.29)
3. Thikkoik nocapu ammakka nyukul nyoKapik (3.1–24)
4. Thina lon ilaik ïcat ana ilaik moloko (4.1–6)
4. Nongat Kapik annongarat (4.7–21)
5. Thoccokot lon nomïkït thokkul woKapik (5.1–21)
1
Lon lothikkoik
1 Mpaik pakurrinenon lon lung, ook ipalon lothikkoik ilaine ul ana ilethet ul thikkoik. Kwokat cik nci maꞌrot acapu carthuk okuꞌretta ncik. Anaruk inenni onïn ngka kïn thoccïkothok akwerene ul ana onïn thimmarok ana thokathaccerok akwokkot lon ana onïn thothontorok nynyaun nyïn. 2 Lon lothikkoik lainet ton ana onïn thimmat ana onïn thaik thakenenon lon ilaik ïcat ilanïn thimmat ana onïn thangkenenon lon lothikkoik thupuththuput ilokat nAththan ana lainet ton. 3 Onïn thangkenenon lon ilanïn thimmat ngkït ana occïkot, othakka itti anon oka uraththut tothun cakuruk. Ana thoka thonnon tothun thaka thoka thonnon tothun oron oNgappa ana opei oIeccuo oMiccie. 4 Onïn thakurrine non elli othakka itti athopira noka thïn ocothakot.
Nokorronno ikkoik iꞌrïmak
5 Lon elli lanïn thoccïkothe naak ana onïn thaik thakenenon ana ilen itti Kapik kakꞌran ikacco ana ngïꞌrïmak ngella naak aththik. 6 Amma oron akkame itti oron thaik unnaththut anaruk aron oꞌrungkwot nan okkot lon ilokithak lori iꞌrïmak oron thaik thammikkot ana oron thaik thakinnikkoik ngkathar ika kwongothe itti oron thikkoik ngngin. 7 Anaruk amma oron thakkot lon ilocoꞌrotheik ammakka Kapik kokenet ton, oron thana lon lulukku ithun ana ngüccük ngoIeccuo nganekot ton lon ilokithak appik.
8 Ana amma oron akkame itti oron thella lon ilokithak cik, oron thaik thammikkot ka konnon ana lon ilaik ïcat lella iaron. 9 Ana amma oron akkerenok lon lonnon ilokithak, kwoporot ana kwakannokwïettot ana kwaccikinthet ton lon ana othikkieron thoꞌrillir. 10 Ana amma oron akkame itti oron thakannokkot lon ilokithak, oron thipierok karra ana lon lung lella kaꞌran cik nomïkït monnon.