ኬሲ ማፃኣፔ
ዓይፆ ካሮ
ሃይ ኬዞ ማፃኣፓ ኬኤዛሢ ዒስራዔኤሌ ዴራ ዓይሉሞና ናንጌ ጊብፄ ዓጮይዳፓ ኬስኬሢ ዛሎ ማዓዛ፥ ማፃኣፔሎኮ ሃይሦ ዼኤፒ ዼኤፒ ቤሲ ዓኣያኬ።
1. ዔብሬ ዓሶኮ ዓይሉማፓ ኬዞና ሲና ዹኮ ባንሢ ዓኣዺፆ ኬኤዛኔ።
2. ፆኦሲ ዴሮና ዎላ ጫኣቄ ጫኣቁሞንታ ዓሲ ዎላ ኮሺ ናንጊ ናንጋንዳ ጎይሢኮዋ ካኣሺ ዛላ ዎጌ ዔያቶም ዒንጊንቴሢ ኬኤዛኔ።
3. ዒስራዔኤሌ ዓሶም፥ ዬያጉዲ ሃሣ ቄኤሴ ማዒ ማዺሢና ፆኦሲ ካኣሽኪሢ ዛላ ዒንጊንቴ ዎጌ ዛላ ኬኤዛኔ።
ቢያፓ ባሼ ሃና ማፃኣፔላ ዔርዛሢ ዓይሉሞና ናንጋ ዴሮ ዓይሉማፓ ፆኦሲ ኬሴሢኮ ጊንፃ፥ ሴካ ቤርታ ዔያታ ዎዛ ዓኣ ዴሬ ማዓንዳጉዲ ዔያቶ ዎይቲ ጊኢጊሼቴያ ኬኤዛኔ።
ሃኖ ማፃኣፔሎይዳ ዔርቴ ዓሢ፥ ዴሮ ጊብፄ ዓጫፓ ዒዛም ኬሳንዳጉዲ ፆኦሲ ዶኦሬ ሙሴኬ፤ ማፃኣፔሎይዳ ዔርቴያ ማዔ ቤዛ ፆኦሲኮ ታጶ ዓይሢፃ ፃኣፒንቴ ዓይ. 20ኬ።
ማፃኣፔላ ዱማ ዱማ ዓርቄ ባኮ
ዒስራዔኤሌ ዓሶኮ ጊብፄ ዓጮ ዓይሉማፓ ኬዞ (1፡1—15፡21)
1. ዓይሉሞና ጊብፄይዳ ናንጊፆ (1፡1-22)
2. ሙሴኮ ሾይንቶና ዒ ናንጌ ናንጎ (2፡1—4፡31)
3. ሙሴና ዓኣሮኔናኮ ጊብፄ ካኣቲ ኮይላ ዳኪንቲፆ (5፡1—11፡10)
4. ዑሣ ዓኣዺፆ ቦንቾ ኬሎና ጊብፄፓ ኬዞ ዛላ (12፡1—15፡21)
ዞቄ ባዛፓ ዴንዲ ሲና ዹኮ ሄሊፆ (15፡22—18፡27)
ፆኦሲ ዒንጌ ዎጎና ጫኣቄ ጫኣቁሞና (19፡1—24፡18)
ዓፒላና ማዢንቴ ፆኦሲ ካኣሽኪንታ ማኣሮንታ ካኣዦ ዎጎንታ (25፡1—40፡38)
1
ዒስራዔኤሌ ዓሳ ጊብፄ ዓጮይዳ ናንጋኣና ዔያቶም ማዺንቴ ጌኔ ማዾ
ፔቴ ፔቴ ፔኤኮ ማኣሮ ዓሶና ዎላ ማዒ ጊብፄ ዓጮ ዴንዴ፥ ዒስራዔኤሌ ጌይንቴ ያይቆኦቤኮ ናኣታ ሃካፓ ሊካ ፓይዲንታ ናኣቶኬ። ሮኦቤኤሌ፥ ሲሞኦኔ፥ ሌዊ፥ ዪሁዳ፥ ዪሳኮኦሬ፥ ዛብሎኦኔ፥ ቢኢኒያሜ፥ ዳኣኔ፥ ኒፕታኣሌኤሜ፥ ጋኣዴንታ ዓሴኤሬንታኬ። ማዢ. ማፃ 46፡8-27። ፒዜ ያይቆኦቤ ሾዔ ዜርፃ ዎሊ ዑፃ ላንካይታሚ * ላንካይታሚ ጋዓዞ፦ ዔብሬ ዓሶ ሙኡጮ ማፃኣፖ ሚናኣሲ «ላንካይታሚ» ጋዓኔ (ማዢ 46፡27 ዛጌ።) ሼምፖና ዓኣ ባኣዚ ናንጋኒ ዳንዳዑዋ ባዞ ኮራፓ ጴዼ ማፃኣፖና ላንካይታሞ ዔሮ ዓሶ ማፃኣፖናይዳ «ላንካይታሚ ዶንጎ» ጋዓኔ (ዳኪ. ማዾ 7፡14 ዛጌ።) ማዓዛ፥ ዮሴፔ ቤርታዺ ጊብፄ ዓጮይዳ ናንጋያኬ። ሚርጌ ዎዴ ዴዔስካፓ ዮሴፔንታ ዒዛኮ ጌርሲንሢንታ ዬኖ ሾይንቶኮ ዓዶንሢ ማዔ ዓሳ ቢያ ሃይቄኔ። ያኣዒ ማዔቶዋ ዔያቶኮ ዜርፆ ማዔ ዒስራዔኤሌ ዓሳ ሾይንቲ ሾይንቲ ዴንዴም ፓይዳ ሚርጌሢሮ ጊብፄ ዓጮ ዔያታ ኩሜኔ፤ ሚርጌና ሃሣ ዎልቃዻያኣ ማዔኔ። ዳኪ. ማዾ 7፡17።
ዬካፓ ዮሴፔ ጊብፄ ዓጮም ማዼ ባኮ ዛሎ ዔሩዋ ዓኪ ካኣቲ ጊብፄ ዓጮይዳ ካኣታዼኔ። ዳኪ. ማዾ 7፡18። ዒዚ ዴሮም ኬኤዛዖ፦ «ሃኣዛጉዋቴ፤ ሃኣቶ፥ ዒስራዔኤሌ ዓሶኮ ፓይዳ ኑጊዳፓ ዑሣ ዓኣዼ ዺቤኔ፤ ሃሣ ዔያታ ዺቢ ዎልቃዻያኣ ማዔኔ። 10 ዬያይዳፓ ዔቄያና ኑ ሞርኮና ዎላ ማንጊ ኑና ዔያታ ዖላኒ፤ ሃሣ ዓጮይዳፓኣ ቶሊ ኬስኪ ዓኣዻኒያኣ ዳንዳዓኔ፤ ዬያሮ ፓይዳ ዔያቶኮ ሚርጊ ሚርጊ ዓኣዹዋጉዲ ሃኒ ዬዑዋቴ፥ ኑ ጎይሢ ኮዖም» ጌዔኔ። ዳኪ. ማዾ 7፡19። 11 ዬካፓ ካኣቲ ዴኤሢ ማዾና ዔያቶ ሜታሳንዳጉዲ ዓሲም ሚጪንቱዋ ፑርታ ማዔ ማዺሻ ዓሲ ዔያቶ ዑፃ ዶኦሪ ጌሤኔ፤ ዬያይዴስካፓ ሚርጌ ባኣዚ ቡኩሲ ጌሦያ ማዔ ፒቶሜና ራምሴ ጌይንታ ካታሞንሢ ካኣቲም ዔያታ ማዤኔ። 12 ጋዓንቴ ዔያታ ዒስራዔኤሌ ዓሶ ሄርቂ ሜታሴ ዎዶና ፓይዳ ዑሣ ዓኣዼ ሚርጊ ሚርጊ ሳዔሎዋ ኩሚ ኩሚ ዓኣዼኔ፤ ያዺ ማዔሢሮ ጊብፄ ዓጮ ዓሳ ዒስራዔኤሌ ዓሶ ዒጊጬኔ። 13 ዬያይዳፓ ዔቄያና ሚጪንቲሢባኣ ፑርቱሞና ዓይሌ ማሂ ዔያቶ ማዺሺሢ ዓርቄኔ። 14 ዔያታ ማዺሻ ጎይፃ፦ ቶርጶ ሄርቂሲሢና ፁኡቤ ጌይንታ ዓጪፓ ዺንቂ ማኣሪ ማዦ ባኣዚ ማዢሲሢና፤ ሃሣ ጎዦይዳኣ ሚጪንቱዋዖ ዼኤፒ ማዾ ማዺሺሢና ናንጎ ዔያቶኮ ሜቶ ናንጊ ማሄኔ።
15 ዬካፓ ጊብፄ ዓጮ ካኣቲ ዔብሬ ዓሶ ፃጶ ላኣሎ ሾዋ ዎዶና ማኣዲ ሾይዣ ፂፓራና ፑሃ ጌይንታ ላምዖ ላኣሊስኬንሢ ዔኤላዖ፦ 16 «ዔብሬ ዓሶ ፃጶ ላኣሎ ዒንሢ ሾይዣኣና ናዓ ዓቲንቄ ማዔቶ ቤዞና ዎዎዹዋቴ፤ ዉዱሮ ማዔቶ ጋዓንቴ ዎዺፖቴ» ጌዔኔ። 17 ሾይዣ ላኣሎንሢ ጋዓንቴ ፆኦሲ ዒጊጬያታሢሮ ጊብፄ ዓጮ ካኣቲ ዔያቶ ዓይሤ ጎይፆ ማዺባኣሴ፤ ጉቤ ዓቲንቆ ናኣቶዋ ዎዹዋዖ ሃሼኔ። 18 ዬካፓ ጊብፄ ዓጮ ካኣቲ ሾይዣ ላኣሎንሢ ዔኤሊሳዖ፦ «ዓቲንቆ ናኣቶ ዎዹዋዖ ዒንሢ ሃሼሢ ዓይጎሮዳይ?» ጌዒ ዖኦጬኔ።
19 ዔያታ ማሃዖ፦ «ዔብሬ ዓሶ ፃጶ ላኣላ ጊብፄ ዓጮ ላኣሎጉዲቱዋሴ፤ ዔያታ ኮሺ ዶዲ ዓሲ ማዔሢሮ ሾይዣ ዓሳ ሃጊ ዔያቶ ባንሢ ሙኩዋንቴ ቤርታዺ ፔኤሮ ፔቴታዖ ሜታባኣያ ሾዓኔ» ካኣቲም ጌዔኔ። 20-21 ዬያታ ሾይዣ ላኣላ ፆኦሲ ዒጊጬያታሢሮ ፆኦሲ ዔያቶም ኮሺ ባኣዚ ማዼኔ፤ ዔያቶ ፔቴ ፔቴሢ ማኣሪያ ጌቲሴኔ፤ ያዺ ማዒፆና ዒስራዔኤሌ ዴራ ፓይዶና ሚርጊ ሚርጊ ሃሣ ዶዲ ማዒ ማዒያኣ ዓኣዼኔ። 22 ዬካፓ ካኣቲ፦ «ዔብሬ ዓሶ ፃጳፓ ሃጊ ሾይንታ ዓቲንቄ ናይ ቢያ ዔኪ ዔኪ ዼኤፖ ዓባዬ ዎሮይዳ ኬኤሩዋቴ፤ ዉዶሮ ናኣታ ጋዓንቴ ዓቶንጎ» ጌዒ ጊብፄ ዴሮ ዶዲ ዓይሥሢ ዓይሤኔ። ዳኪ. ማዾ 7፡19።

1:4 ማዢ. ማፃ 46፡8-27

*1:5 ላንካይታሚ ጋዓዞ፦ ዔብሬ ዓሶ ሙኡጮ ማፃኣፖ ሚናኣሲ «ላንካይታሚ» ጋዓኔ (ማዢ 46፡27 ዛጌ።) ሼምፖና ዓኣ ባኣዚ ናንጋኒ ዳንዳዑዋ ባዞ ኮራፓ ጴዼ ማፃኣፖና ላንካይታሞ ዔሮ ዓሶ ማፃኣፖናይዳ «ላንካይታሚ ዶንጎ» ጋዓኔ (ዳኪ. ማዾ 7፡14 ዛጌ።)

1:7 ዳኪ. ማዾ 7፡17

1:8 ዳኪ. ማዾ 7፡18

1:10 ዳኪ. ማዾ 7፡19

1:22 ዳኪ. ማዾ 7፡19