ዒዮቤ ማፃኣፖ
ዓይፆ ካሮ
ዒዮቤ ማፃኣፖይዳ ኑ ዛጋ ሃይሳ ዼኤፒ ሜቶና ባይሲንታና ሄሌ ፔቴ ኮሺ ዓሲስኬያ ዛላ ኬኤዛያኬ፤ ዬይ ዓሢ ፔኤኮ ናኣቶና ቆሎ ቢያናፓ ዓቴያ ማዒፆ ሌሊቱዋንቴ ቶኦሶ ኪሢና ሜታዼኔ፤ ካላሊ ጎይሢ ሃይሦ ፓቂ ፓቂ ጌስቶና ጌኤሲና ዒዮቤንታ ዒዛኮ ላጎንታ ዬይ ሜታ ዔያቶ ማሊሼሢ ኬኤዛኔ፤ ጋፒንፃ ፆኦሲ ፔኤሮ ዒዮቤም ፔጋዺ ጴዼኔ።
ዒዮቤኮ ላጎንሢ ዒማና ዒዮቤይዳ ሄሌ ሜቶ ዛሎ ጌስቴ ሃይሳ ፆኦሲ ካኣሽካኔ ጋዓ ዓሳ ጌስታ ዔርቴ ማሊፆ ጎይፆኬ፤ ዬያሮ ዔያታ፦ «ፆኦሲ ኮሺ ዓሲም ኮሺ ባኣዚ ዒንጋዖ ፑርታ ዓሲ ሜታሳኔ፤ ዬያ ጎይፆና ዬይ ቢያ ሜታ ዒዮቤ ሄሌሢ ዒ ጎሜ ማዼሢሮ ናንዳኔ» ጋዓኔ፤ ጋዓንቴ ዒዮቤ ፂሎ፥ ሃሣ ኮሺ ዓሲያኣ ማዔሢሮ ዬያጉዴ ዴኤሢ ሜታ ዒዛም ኮይሳያቱዋንቴኬ፤ ባሼ ዔርቱዋያ ዓኣቺሢ ማዔ ባካ ዒዛጉዴ ኮሺ ዓሲዳ ዬያጉዴ ዴኤፆ ሜታ ሄሊፆኬ፤ ዎዚ ዒዮቤኮ ፆኦሲ ጉሙርቂፃ ዓጊፂባኣያታቴያ ፆኦሲ ፒዜ ዎጌ ዎጊ ዬያይዳፓ ዒዛ ኬሲ ቤርታ ዒ ዓኣ ጎይፆ ዒዛ ማሃንዳጉዲ ፆኦሲ ዶዲ ዖኦጪሢዳፓ ዒ ጊንሢም ጌይባኣሴ።
ዒዮቤ ዖኦጬ ባኮ ዛሎ ቢያ ፆኦሲ ፓይዲ ፓይዲ ማሂባኣቴያ ዒዮቤኮ ዒዛ ጉሙርቂፆ ዶዱሞ ሄርሺ ሄርሺ ፔኤኮ ፆኦሱሞ ዎልቆና ቢታንቶና ዲቃሢ ሄርሺሳያ ማዓ ካላሊ ጎይሢና ፔጋሲ ዔርዜኔ፤ ዬካፓ ዒዮቤ ፆኦሲ ዼኤፒ፥ ሃሣ ቢታንቶ ዓኣያ ማዔሢ ዔራዖ ጫርቂ ሚርጌ ጎሪንቲ ጎሪንቴሢሮ ዻቢንቶ ዔሪ ጎሞ ፔኤኮ ቡኡፄኔ።
ጋፒንፆይዳ ካላሊቱዋ ጎይሢና ፃኣፒንቴ ባካ፦ ዒዮቤ ሚና ቤርታ ዓኣ ጎይፆ ማዔሢና ቆሎዋ ቤርታኣስካፓ ባሼ ዴንቄሢኬ፤ ዬያሮ ዒዮቤኮ ላጎንሢ ዒዛይዳ ሄሌ ሜታሢ ዓይጎ ዛላናታቴያ ዔያቶም ዔርቲባኣሢሮ ፆኦሲ ዔያቶ ኮሺ ዶዲና ጎሬኔ፤ ሜሌ ፆኦዞ ካኣሽካ ዓሶ ማሊፆይዳፓ ፆኦሲ ባሼ ማዔሢ ዔሬሢ ዒማና ዒዮቤ ሌሊኬ።
ማፃኣፔላ ዱማ ዱማ ዓርቄ ባኮ
ዒዮቤ ቆልሞንታ ማኣሮ ዓሶንታ ባይዚ ፔኤሮዋ ሃርጌሢ (1፡1—2፡13)
ዒዮቤ ፔኤኮ ሾይንቴ ኬሎ ጋዳንቄሢ (3፡1-26)
ቤርታሲ ጌስቲንቴ ጌኤዞ (4፡1—14፡22)
ላምዓሲ ጌስቲንቴ ጌኤዞ (15፡1—21፡34)
ሃይሣሲ ጌስቶና ጌኤዞ (22፡1—26፡14)
ዒዮቤኮ ጋፒንፆ ሃይሶ (27፡1—30፡31)
ዒዮቤ ፔኤኮ ዻቢንቲ ባኣሢ ዔርዚ ኬኤዜሢ (31፡1-40)
ዔሊሁ ጎዖሢ ጌስቴ ጌኤዞ (32፡1—37፡24)
ፆኦሲ ቤርታሲ ጌስቴ ጌኤዞ (38፡1—39፡30)
ፆኦሲ ላምዓሲ ጌስቴ ጌኤዞና ዒዮቤኮዋ ማሂፆ (40፡1—42፡6)
ፆኦሲ ዒዮቤኮ ናንጎንታ ቆሎንታ ማኣሮ ዓሶንታ ጊንሣ ዓንጄሢ (42፡7-17)
1
ፃላሄ ዒዮቤ ዎይታቴያ ዛጋኒ ጌሼሢ
1 ዖኦፄ ጌይንታ ዓጫ ናንጋ፥ ፔቴ ዒዮቤ ጎዖ ዓሲ ዓኣኔ፤ ዬይ ዓሢ ፑርታ ባኣዚፓ ቢያ ሃኪ ፆኦሲ ዒጊጫያ፥ ዾንኪሳ ባኣዚ ባኣያ፥ ፒዜ ዓሲኬ። 2 ዒዛኮ ላንካይ ዓቲንቄና ሃይሦ ዉዱሮ ናይና ዓኣኔ። 3 ቆሎ ዛሎናታቴያ፦ ላንካይ ሺያ ማራይ፥ ሃይሦ ሺያ ጋኣሎ፥ ዶንጎ ፄኤታ ዋኣፃ ጌማይና ዶንጎ ፄኤታ ሃሬያ ዒዛኮ ዓኣኔ፤ ዬያጉዲ ሃሣ ዒዛኮ ማዾ ማዻ ሚርጌ ዓሲያኣ ዓኣኔ፤ ዬይ ዓሢ ዓባ ኬስካ ባንፆና ዓኣ ዓጫ ናንጋ ዓሶይዳፓ ቢያ ዒዛጉዴ ዖርጎቺንታ ዼኤፒ ዓሲያ ባኣያኬ።
4 ዬኖ ዎዶና ዒዛኮ ዓቲንቆ ናኣታ ፔቴ ፔቴሢ ፔ ማኣራ ማኣራ ሙኡዚ ጊኢጊሺ ዎሊ ዑፃ ቡኪንቲ ዎዛዻኔ፤ ዒማና ዔያቶኮ ሃይሦ ጌሮንሢያኣ ዔያታ ዔኤሊሲ ዔኤሊሲ ዔያቶና ዎላ ሙይ ዑሽካኔ። 5 ዬይ ሙዖ ኬላ ጋፔስካፓ ዒዮቤ ጉቶማ ኬስኪ ፔቴ ፔቴ ዒዛኮ ናኣቶ ዔኤሊሲ ዔኪ ሙኪ ዔያቶኮ ሱንፆና ፆኦሲም ዒንጎ ባኣዚ ሺኢሻኔ፤ ዬያ ዒ ማዻሢ «ጎዖንቴ ታኣኮ ናኣታፓ ፆኦሲ ጫሽኪ ዻቤይ ናንዳኔ!» ጋዓ ዒጊቹሞና ፔኤኮ ናኣቶ ጎሜፓ ጌኤሻኒ ጌይኬ፤ ዒዮቤ ዬያ ዳምቦ ሃሹዋዖ ቢያ ዎዴ ማዺ ኩንሣኔ።
6 ፔቴ ዓቢና ጫሪንጮ ኪኢታንቻ ናንጊና ናንጋ ጎዳ ቤርቶ ሺኢካኣና ፃላሄያኣ ዔያቶና ዎላ ሺኢኬኔ። ማዢ. ማፃ 6፡2። 7 ናንጊና ናንጋ ጎዳ ዒማና ፃላሃሢ ኮይላ፦ «ዓንካፓ ኔ ሙኬይ?» ጌይ ዖኦጬኔ።
ፃላሃሢ ማሃዖ፦ «ዓጫ ማዔ ካሮና ቢያ ሴካ ሃንጋ ታ ሃንቴኔ» ጌዔኔ።
8 ናንጊና ናንጋ ጎዳ፦ «ታ ዓይላሢ ዒዮቤ ኮሺ ኔ ዛጊያ? ዒዛጉዴ ጉሙርቂንታያና ኮሺ ዓሲና ሳዖይዳ ባኣሴ፤ ዒዚ ፑርታ ባኣዚ ቢያይዳፓ ሃኪ፥ ታና ዒጊጫ ፒዜ ዓሲኬ» ጌዔኔ።
9 ፃላሄ ጊንሣ፦ «ዒዮቤ ኔና፥ ፆኦሲ ዒጊጫሢ ጉሪ ኔኤም ማላ? 10 ዒዚ ኔና ዒጊጫሢ ዒዛንታ ናኣቶንታ ሃሣ ዒዛኮ ዓኣ ባኮዋ ቢያ ኮሺና ኔ ዒዛም ካፒ፥ ጊንሣ ዒ ማዼ ባኮዋ ቢያ ኔ ዒዛም ዓንጄሢሮና ሜርጌ ባይ ቆሎዋ ኔ ዒዛም ዒንጌሢሮቱዋዓዳ? 11 ጋዓንቴ ኔ ኩጮና ኔ ካኣሚ ዒዛኮ ዓኣ ባኮ ቢያ ባይዜቴ ኔና ዒዚ ዒጊጩዋዖ ጫሽካንዳኔ» ጌዔኔ። ዮሃ. ፆፔዻ 12፡10።
12 ናንጊና ናንጋ ጎዳ ፃላሃሢም፦ «ዔኤዔ፤ ያኣዼ ማዔቴ ዒዮቤይዳ ሌሊ ፔቴ ሜቶዋ ሄሊሲፖ፥ ጋዓንቴ ዒዛኮ ዓኣ ቆሎ ቢያይዳ ኔ ኮዔ ባኣዚ ማዻኒ ዳንዳዓኔ» ጋዓዛ፥ ፃላሃሢ ፆኦሲ ቤርታፓ ኬስኪ ዴንዴኔ።
ዒዮቤኮ ናኣታ ሃይቄሢና ቆላኣ ቢያ ጋፔሢ
13 ዬካፓ ፔቴ ኬሊ ዒዮቤኮ ናኣታ ዔያቶኮ ቶይዲ ማኣራ ቡኪንቲ ሙኡዚ ሙይ፥ ዎይኔ ዑሺያ ዑሽኪ ዎዛዻኔ። 14 ዬኖ ኬሎና ፔቴ ኪኢታ ዓሲ ጳሽኪ ጳሽኪ ዒዮቤ ኮራ ሙካዖ፦ «ኑኡኒ ጌማቶ ዋኣፂ ጎሽካንቴ፥ ሃራ ዒማና ኑ ኮራ ሄንቃኔ፤ 15 ኑ ማሊያ ማሊባኣንቴ ሳኣባ ዓጪ ዓሲ ሙኪ ኑና ዖላዖ ቢያ ባኮ ዔኬኔ፤ ሃሣ ኔኤኮ ዓይሎዋ ጬንቾ ዓፓሮና ዎዼም፥ ዔያቶ ባኣካፓ ታኣኒ ሌሊ ቶሊ ዬያ ባኮ ኔኤም ኬኤዛኒ ሙኬኔ» ጌዔኔ።
16 ዬይ ኪኢቶ ዓሢ ሃይሶ ሃጊ ኬኤዚ ጋፑዋንቴ ሜሌ ኪኢታ ዓሲ ጳሽኪ ሙካዖ፦ «ኔኤኮ ማራቶና ሄንቃ ዓሶና ጉቤ ጉጉንሢ ጫሪንጫፓ ዱኪ ዎዼም፥ ዬያቶይዳፓ ታኣኒ ሌሊ ቶሊ ዬያ ባኮ ኔኤም ኬኤዛኒ ሙኬኔ» ጌዔኔ።
17 ዬይያኣ ኬኤዚ ጋፑዋንቴ ሜሌ ኪኢታ ዓሲ ሙካዖ፦ «ካላዳ ዓጮ ዓሲታዖ ቡራ ዓሳ ሃይሦ ቤሲ ፓቂንቲ ኑ ዔሪባኣንቴ ኑና ዖሊ፥ ኔኤኮ ጋኣላሢ ቢያ ዔካዖ፥ ኔኤኮ ዓይሎዋ ቢያ ጬንቾ ዓፓሮና ዎዼም ታኣኒ ሌሊ ቶሊ ዬያ ባኮ ኔኤም ኬኤዛኒ ሙኬኔ» ጌዔኔ።
18 ዬይ ኪኢቶ ዓሢያ ሃጊ ኬኤዚ ጋፑዋንቴ ሜሌ ኪኢታ ዓሲ ሙካዖ፦ «ናኣታ ኔኤኮ ዔያቶኮ ቶይዲ ማኣራ ቡኪንቲ ሙዖ ሙይ፥ ዎይኖ ዑዦዋ ዑሽኪ ዎዛዻንቴ፥ 19 ዓሲ ናንጉዋ ዳውላፓ ዔሩዋንቴ ዓልጋ ሙካዖ ማኣሮ ጉቤ ዶይሳዛ ማኣራ ዔያቶ ዑፃ ዶዔሢሮ ዔያታ ሃይቄኔ፤ ታኣኒ ሌሊ ዔያቶ ባኣካፓ ቶሊ ዬያ ባኮ ኔኤም ኬኤዛኒ ሙኬኔ» ጌዔኔ።
20 ዬያ ቢያ ባኮኮ ጊንፃፓ ዒዮቤ ዔቃዖ ዖዪሢና ፔኤኮ ማኣዓሢ ዳርዚ፥ ቶኦኮዋ ፔኤኮ ጉኡሊንቴኔ፤ ባሊቶናኣ ሳዖ ሄሊሲ ዚጋዖ፦ 21 «ታ ዒንዶ ጎጳፓ ካሎ ታ ሾይንቴኔ፤ ሃይቃዖዋ ካሎ ታ ዓኣዻንዳኔ፤ ናንጊና ናንጋ ጎዳ ታኣም ዒንጌኔ፤ ዒዚ ሃሣ ማሂ ዔኬኔ፤ ዬያሮ ዒዛ ሱንፃ ጋላቲንቴያ ማዖንጎ!» ጌዔኔ።
22 ዬያ ቢያና ዒዮቤ ዻቢንቲ ጎሜ ማዺባኣሴ፤ ፆኦሲዳኣ ፑርታ ባኣዚ ጌስቲባኣሴ።