ዒዩዔኤሌ
ዓይፆ ካሮ
ፆኦሲ ማሊፆ ኬኤዜ ዒዩዔኤሌ ዎማ ዎዶይዳ ናንጌቴያ፤ ሃሣ ዒዚ ናንጌ ጎይፆ ኬኤዛ ሃይሴ ሜርጌ ዔርታይ ባኣሴ፤ ያዺ ማዔቴያ ማፃኣፓ ፃኣፒንቲ ዓኣያ ማዒ ጴዼሢ ኪሪስቶሴ ሾይንታዳሢኮ ቤርታ ዶንጋሳ ፄኤቶ ሌዖኮ ሃንጎ ዖይዳሳ ፄኤቶ ሌዖኮ ጋራኣኬ ጌይንታኔ፤ ዬይ ዎዳ ፓሪሴ ካኣቲ ካኣታዺ ዎይሣ ዎዶናኬ። ዒዩዔኤሌ ዒስራዔኤሌ ዓጮ ዓቢሢ ሙካንዳሢና ኪሊንኮ ሉማ ኬስካንዳ ዎዶዋ ፔጋሲ ኬኤዜኔ፤ ናንጊና ናንጋ ጎዳ ኬላ ሙካኒ ዑኬያ ማዒፆ ዬይ ባካ ዔርዛያታሢ ዒዚ ኬኤዛኔ፤ ናንጊና ናንጋ ጎዳኮ ኬላ ሙካኣና ዒዛኮ ዱማዼ ማሊፆ ዒፂ ማካዞንሢዳ ቢያ ሜቶ ናንጊና ናንጋ ጎዳ ዓጋንዳሢ ቃሲ ዒ ኬኤዛኔ። ፆኦሲ ማሊፆ ኬኤዛሢ ዴራ ፔኤኮ ጎሞ ቡኡፃንዳጉዲ ፆኦሲ ዔኤላያ ማዒፆ ፔጋሲ ኬኤዚ፥ ዴራ ጎሞ ፔኤኮ ቡኡፄቴ ዔያታ ዎንዴ ናንጋ ጎይፆ ባንሢ ማሂ ዓንጃንዳሢ ዒዚ ዔያቶም ኬኤዛኔ። ዒዚ ኬኤዜ ፆኦሲ ማሊፆይዳ ባሼ ዓኣፒ ማዒ ጴዻ፥ ሃጊ ማዓንዳ ዎዞ ቃኣላ፦ ፆኦሲ ዓቲንቆንታ ላኣሎንታ ዼጌሢንታ ጋርቾዋ ዓይሱዋዖ ዴሮ ቢያ ዑፃ ፔኤኮ ዓያኖ ኬይሳንዳሢ ፔጋሲ ኬኤዛሢኬ።
ማፃኣፔላ ዱማ ዱማ ዓርቄ ባኮ
ሳዖ ባይዛኒ ሙኬ ዓቢፆ (1፡1—2፡17)
ናንጊና ናንጋ ጎዳ ኬሎ (2፡18-32)
ናንጊና ናንጋ ጎዳ ሜሌ ዴሮይዳ ሜቶ ዓጋንዳሢ (3፡1-21)
1
ዓቢፃ ዒስራዔኤሌ ዓጮ ሙይ ባይዜሢ
ባኣቱዔኤሌ ናኣዚ ዒዩዔኤሌም ናንጊና ናንጋ ጎዳፓ ዳኪንቴ ኪኢቶ ቃኣላ ያዺኬ፦
ዒንሢ ጋርቾ ዓሳ ዋይዙዋቴ!
ዪሁዳ ዓጫ ናንጋ ዓሳ ቢያ ዒናፓ ዋይዙዋቴ!
ዒንሢ ናንጌ ዎዶይዳ ሃያ ጉዴ ባኣዚ፤
ጊንሣ ሃሣ ዒንሢኮ ቤርታኣ ዓዶንሢ ዎዶናኣ ዓሲ ዛጊ ቤቂያ?
ዬያ ባኮ ዒንሢኮ ናኣቶም ኬኤዙዋቴ፤
ዒንሢኮ ናኣታ ጊንሣ ፔ ናኣቶም ኬኤዞንጎ፤
ዬያታኣ ዔያቶ ሄሊ ሙካ ሾይንቶም ኬኤዞንጎ።
ሜልካሢዳፓ ዓቴ ሃኣኮ ባቃሎ
ሻዻ ዓቢፃ ሙዔኔ፤
ዬካፓ ዓቴሢ ሃሣ ዢኢፓ ዒርዚጉዲ ዲኢና
ዓቢፃ ሙይ ባይዜኔ፤
ዓቴሢያኣ ማካሢ ሙዔኔ።
ሃይካፓ ሴካ ዒንሢ ሙርጎ ዎይኖ ዑዦ ዻንጋ ካንሢንዱዋኣሢሮ
ዒንሢ ማሢንታ ዓሳ ጊንዓስካፓ ጴጪ ዬኤኩዋቴ፤
ዒንሢ ቢያ ዎዴ ዎይኖ ዑዦ ዑሽካ ዓሳ!
ዒናፓ ቃዪ ዬኤኩዋቴ።
ዎልቄና ዓኣ ዑሣ ዓኣዼ ዺቤ ሜሌ ዴሬ
ታ ዓጮ ዖሊ ባይዛኒ ሙኬኔ፤
ዬያ ዖሎ ዓሶኮ ዓጫ ዞቢ ዓቺጉዲኬ፤
ባንጋላ ጊንሣ ሃሣ ዒንዴ ዞቢሮጉዲኬ። ዮሃ. ፆፔዻ 9፡8።
ታኣኮ ቱኮና ዎይኖ ቢያ ሙይ ባይዜኔ፤
ቤሌሴ ሚፆዋ ቆፂ ሙዔኔ፤
ዬያ ሚፆኮ ዛንዞዋ ቦኦሪሺ
ቁኡሮ ቢያ ፒኢቲ ሙዔኔ።
ዒዞ ጎቺ ዴዓያታዖ ሃይቄ ዼጌሮ
ሲዬ ፓቲሌ ማይንቲ ዬኤካ
ዉዱሮ ናይጉዲ ዒንሢያ ዬኤኩዋቴ።
ናንጊና ናንጋ ጎዳ ማኣሮይዳ ዒንጎ ባኣዚ ማሂ ሺኢሾ
ሃኣኮንታ ዎይኖ ዑዦንታ ባይቄሢሮ
ናንጊና ናንጋ ጎዳም ማዻያ ማዔ ቄኤሳ ዬኤካኔ።
10 ጎዣ ጎሽኪንቴ ጎይሣ ጉሪ ዓቴኔ፤
ሃኣኮ ዒኢካ ባኣያ ማዔኔ፤
ቱኮና ዎይናኣ ሃይቄኔ፤
ዛይታኣ ባይቄኔ፤
ዬያሮ ሳዓ ዬኤካኔ።
11 ዛርጋሢንታ ዔልዖንታ፤ ሜሌ ካፃ ሃኣካኣ ቢያ ባይቄሢሮ
ዒንሢ ጎዦ ጎሽካ ዓሳ ዖዩዋቴ፤
ዒንሢ ዎይኖ ቱካ ዓሳኣ ዬኤኩዋቴ።
12 ቱኮና ዎይኖንታ ቤሌሶ ሚፆንታ ሹሌኔ፤
ሮኦማኣኔ፥ ቴሚሬ ጌይንታ ሚፃ፥ ሙቃሎንታ ሜሌ ዓኣፖ ዓኣፓ ሚፃ ቢያ ሜሌኔ፤
ዬያሮ ጎኔና ዓሲ ዎዛዻ ዎዛ ባይቄኔ።
13 ዒንሢ ፆኦዛሢም ዒንሢ ዒንጋ ሃኣኮንታ ዎይኖ ዑዦ ዒንጊፆንታ ባኣሢሮ
ዒንሢ ታ ፆኦዛሢም ማዻ ቄኤሳ!
ሃኒ ዬዒ፥ ሲዬ ፓቲሌ ማይንቲ ዋንቶ ጉቤ ዬኤኩዋቴ፤
ዒንሢ ዒንጎ ባኮ ዒንጎ ቤዞይዳ ማዻ ዓሳ ቃዪ ዬኤኩዋቴ።
14 ሙኡዚ ሃሾ ዱማ ኬሊ ሜንሡዋቴ!
ፆኦሲም ዱማዼ ቡኪንቲ ዴሮ ቡኩሱዋቴ!
ጋርቾንታ ዓጮይዳ ናንጋ ዓሶዋ ቢያ
ናንጊና ናንጋ ጎዳ ማዔ ኑ ፆኦዛሢ ማኣሪ ቡኩሱዋቴ፤
ዒኢካ ፆኦሲ ዒንሢም ዋይዛንዳጉዲ ዬኤኩዋቴ።
15 ባዴዔ! ናንጊና ናንጋ ጎዳ ኬላ ዑኬኔ!
ቢያ ባኮ ዳንዳዓ ጎዳሢ ባይሲንታ ዔኬ ሙካ ኬላ ሄሌኔ። ዒሲ. 13፡6።
 
16 ሃኣኮ ኑ ዓኣፓፓ
ዎዛና ዒላሺሢና ኑ ፆኦዛሢኮ ጌኤዦ ማኣራፓ
ጋፒ ባይቄኔ።
17 ዜርቂንቴ ዜርፃ ቢያ ሳዖይዳ ሙርዒ ዓቴኔ፤
ሃኣካ ባይቄሢሮ ሃኣኮ ናቶ ቤዛ ቢያ ጉሪ ማዔኔ፤
ኮናኣ ዶዔኔ።
18 ባኣታ ሄንቃንዳ ማኣቲ ባይቄሢሮ ዖኦላኔ፤
ማራታኣ ቢያ ናይዺንቲ ካራ ባይዚ ዓኣኔ።
19 ናንጊና ናንጋ ጎዳሢዮ! ቦኦሎይዳ ዓኣ ማኣቶ ቢያ ታሚ ሙዔሢሮ
ካዮ ሚፆዋ ታሚ ሚቼሢሮ
ታኣኒ ኔ ባንሢ ዒላታኔ።
20 ዎራ ሚጬሢሮ
ቦኦሎ ማኣታ ቢያ ሜሊ ባይቄሢሮ
ካዮ ቦዓታዖ ዓቱዋዖ ኔ ባንሢ ዒላታኔ።

1:6 ዮሃ. ፆፔዻ 9፡8

1:15 ዒሲ. 13፡6