Bible in Makonde New Testament and Old Testament Portions Vagalata 1

Ibalugwa imwe Paulu

kwa

Vagalata

Nandele

1 Nangu Paulu, myombe kanji níkaalakadile kwavanu na ata i kwaindila yavanu ila kwaindila imwe Yesu Klistu pamo na Nnungu Atata ándyuwidye Yesu pakati pavakupela,* 2 nene pamo na vanung'unumunu uti vapagwíte namu nangu akuno tunkwandikila kwamaganisha a ku Galata ko.

3 Kwenu mwenu, umonyo† na amani yakwalakela kwa Tatagwetu Nnungu pamo namu Umu Yesu Klistu 4 ályumidye jo mwene kwamwaa wamadambi etu pakulota atuposhe muwakati au wakunyata‡ kwodananavo malotelo atatagwetu Nnungu.§ 5 Kwake nae, lipagwe lishangelo ngwengwe ngwengwe. Ame.

Haupali ntenga unji wambone

6 Napanelo nangu ninkunshanga mwenu mwaa muwakati ungwipi tu mundimwambukanga aijá ánshamile mupagwe muumonyo** wake Klistu kutwa kwoda ntenga wambone unji.†† 7 Kwakutangola mwiu haunava unji ila vapali vanji valota kuntindinganianga na kuvilinganianga ntenga wambone aulá umwe Klistu. 8 Napane ata ikava kenga wetu kwali njelo wakwalakela kuwa ammalangangidile ntenga wambone uvilinganénge na watummalangangidile, munu ajo aavenavo dilana. 9 Nadoni tunkuujila kavili kutangola tuushidoni, ikava kenga munu woewoe anammalangila ntenga wambone uvilinganánga na aulá wamupatile, munu ajo aavenavo dilana!

10 Da mwenu mwona kenga ambi apa ngulota ndivashombe vanu kwali Nnungu? Kwali ngulota ivanagwele vanu? Leka ìvele yakuvanagwela vanu mpaka ambi apa, bai nangu hangunave nintumwa wake Klistu.‡‡

Ntenga wake Paulu walakadilé kwa Nnungu

11 Mmanung'unumunu, ninkulota mumanye doni ntenga wambone wanguvalanganga haunava shinu washimunu. 12 Hangupatile kwamunu na ata havangupundishidye ila ntenga wo ndipata kwaindila yamaono akungulodya Yesu Klistu.§§ 13 Mwenu mundigwa shana mavalelo angu panguvéle nkati mwidini yashiyuda; mwashi mwangushipapatila liganisha lyake Nnungu na mwangushitandela ing'ondo. 14 Nangu mwidini yashiyuda mo, ngushindavapunda vavangu vaulinga wangu nguvikila namene dukuduku dijadi dyavanyakala vetu. 15 Kanji napanelo Nnungu aningutandola tangu kala nikanava kuvalekwa na aningushema kwaindila yaumonyo wake. 16 Jojo jo, painnagwadile kunnodya mwanagwe nkati mwangu nangu pakulota nimmalangange kwavamidi, hangulambadile maoni kwamunu 17 na ata hanguujidile ku Yelusalemu kwa avalá vamyombe vatandi ila nguumidinneu kuka ku Alabiya kutwala kuujila kavili ku Damashiko.***

18 Napanelo vikapite vyaka vitatu, ndyúka ku Yelusalemu nannola Kepashi††† kutwa kwikanavo maduva kumi na tano. 19 Koko ko, handivagwene vamyombe vanji ila Tiyagu nung'une Umu. 20 Mwenu! Vyandimwandikila avi, vìu. Pamevo pake Nnungu, nashang'apa shinu.

21 Badae nindyúka disemu dya ku Shiliya na dya ku Kilikiya. 22 Nangu muwakati awo hangushimanyika mumaganisha a ku Yudeya avéle nkati mumwe Klistu. 23 Ila koko ko vashiigwanga vila doni, “Aijá áshitupapata, ambi apa ankuvalanganga likulupililo lyolyo lyashitenda ing'ondo kunantandi.” 24 Nadoni vashindamupa lishangelo Nnungu kwamwaa wangu nangu.

*1:1 Mushu mwake Paulu andauka atangola aashidoni, ntenga wake unkwalakela shalowa kwa Nnungu. Lola 1:11-24. Nadoni ntenga wake wo ni waumwiu uvilinganánga na wavamongo vake.

†1:3 Dibalugwa dyoe dimwe Paulu, ankutumidya umonyo na amani na ankumalilila avalaililila vanu vapagwe muumonyo umwe Klistu. Lola 6:18. Napane nkati mwibalugwa ai, ing'ano yaumonyo ni ntipu ukumene. Mushu andatangola ing'ano yakwambukanga umonyo umwe Klistu. Lola 1:6; 2:21; 5:4. Namomo ankupundisha kenga amani inkumwidila aijá ápwashalela umonyo umwe Klistu. Lola 5:22; 6:16.

‡1:4 Mushu mwake, Paulu ankupundisha kenga umonyo wake Nnungu unkupatikananga bai kwaindila yakupela kwake Klistu. Lola 2:21; 3:1-2, 13-14.

§1:4 Munandele aju (1:1-5), Paulu ankuujila atangola myanda mitatu yakuva Nnungu Tatagwetu. Kavili mushu mo, ankuvapundisha vagalata kuva vanavake Nnungu. Ni ashi shivatádya vampwashalele Imumu na vave muunaiti; havanapagwa shinu muutumwa. Lola 3:26-4:11.

**1:6 Kwali: kwaindila yaumonyo.

††1:6 Mudibalugwa dinji ling'oto lyakuudyanga, Paulu andálambwalela kwa ashilá shavatandedya nkati muntenga wambone kanji ai mene. Linganianga Valoma 1:8; I Vakolintu 1:4; II Vakolintu 1:3; Vapilipo 1:3-5; na dinji. Kwaupande wavagalata vo, nae ankwona doni, ntenga wambone wo, vanavo vankwambukanga.

‡‡1:10 Mushinu munji, Paulu ankuvalanganga shimadengo shake kuva shakuvashomba vanu, hashinava shinu shakuvanagwela vanu. Linganianga II Vakolintu 5:11, 20 na I Vateshalonika 2:4-6. Nadoni ankuka mushu alodya kenga ntenga wake unkwalakela shalowa kwa Nnungu i kwavanu (1:11-24). Kumwisho kwake ankushidoni, kwa avalá vavatindinganiánga vagalata vo, valambela vanagwaleke kwavanu kwambangidya havanapapatigwe kwamwaa wanshalaba umwe Klistu. Lola 6:12.

§§1:12 Kwali: kwaindila yamaono amwe Yesu Klistu. Apa Paulu amba kukadyania kwakadyéne namu Yesu mwindila ya ku Damashiko. Lola Vitendo 9:1-9.

***1:17 Kwamaimyo ala, Paulu ankuvataukanga avalá váshishidoni, ntenga wake apatilé kwavanu. Nae ankushidoni, haukile ku Yelusalemu kushinu kuvaikidíle akapate ntenga kwa avalá vamyombe vatandi (1:18-20).

†††1:18 Kepashi ni jo Patulu. Lola disemu dinji mwibalugwa ai: 2:9, 11, 13.