9
1 Kutwala kavili kushidoni, “Ninkumwaulila mwiu doni vapali vanu vanji popo apa, vanavo mwiko havapela vakanava kwona utawala wa Nnungu wida na dimongo.”
Yesu ankujalukanga pamevo pave
Mateu 17:1-13; Lukashi 9:28-36
2 Akapite maduva sita, Yesu akantwala Patulu, Tiyagu namu Nshuwau kuvaukanavo kushinu kwagweka kulishinga lyakukulumuka. Koko ko, nae kujalukanga pamevo pave; 3 dinguvo dyake kuva dyanashwe na dyakushenga namene, kushwalela kwákaulula nkúshapa woewoe wamushilambo ashi kuwisha shilinga asho. 4 Popo po kwaneka Liyashi, Musha vatangola namu Yesu. 5 Patulu kutwala kumwaulila Yesu kushidoni, “Labi, ni shambone mwatupagwididye pashinu apa, leka tukandyange mautu matatu akwikala limo lyako, linji limwe Musha na linji live limwe Liyashi.” 6 Nae hashimanya shashitangola mwaa vovo vo vashindajopa.
7 Bai kutwala kushuluka lyundi kuwa kuvainikidya, mo mulyundi mo kwigwinika lidi litédoni, “Aju ni mwanangu waninnagwaledya! Jojo jo mwigwilile!” 8 Kwashingangala vakalalyange nyenje mwave vanu vo vavagwene vyo, ngwee kumwona jo Yesu aju gweka na vanavo.
9 Napanelo pavashishuluka mulishinga Yesu andívaleya havanammalangangile munu vinu vyavagwene mpaka palota kudyuka Mwana Wamunu pakati pavakupela. 10 Bai vanavo vandípiyanga ing'ano ayo vaudyania shivenevene mana akudyuka aku pakati pavakupela. 11 Nadoni vakwoda vake vandímudya, “Mwaa shani vamwalimu vadishaliya vankushidoni, ‘Ivaikidilé Liyashi ave ntandi kwida?’ ”* Lola Malakiya 4:5-6. Mulibuku limwe Malakiya vandyándika doni, likanava kuwika Liduva limwe Umu shitandi andaida Liyashi ndapanganianga vinu uti. Mwimbandi ai Yesu ankunninganianga Liyashi kuva Nshuwau Wakubatisha. Namomo ankushidoni, “Elo Liyashi paida andapanganianga vinu uti kanji likanava kuwika Liduva limwe Umu, Mwana Wamunu andapela.” Nae ashitangola davo mwaa vanu havashikumbukila kenga Klistu inimmaikila auvauvange. 12 Yesu do, “Mwiu paida Liyashi, andapanganianga vinu uti. Kanji mwaa shani indyandikigwa imwamba Mwana Wamunu doni, ‘Inimmaikila auvauvange vinu vyoe na ailudyangigwe’? 13 Nangu apa ninkumwaulila doni, Liyashi jo andida na jojo jo, vanintenda uti vyavalatile kwodamwaa indyandikigwa imwamba nae.”
Yesu ankumponia ndyoko walijini
Mateu 17:14-21; Lukashi 9:37-43
14 Napanelo vanavo pavawikile pavavéle avalá vakwoda vanji vandyóna imbumba ing'umene yavanu ivatang'anadidye na vamwalimu vadishaliya vataukananganavo. 15 Imbumba po paingwene Yesu indyángaikanga kutwala kuntukutila kuka ndamuudyanga. 16 Nae kuvaudya vamwalimu vadishaliya, “Da mwenu mutaukananganavo nyamani?” 17 Munu jumo mwimbumba mo patwete kulijang'ulidya kushidoni, “Mwalimu, ndimwidanavo mwanangu kwako wako, nae ankuvanavo lijini ántaa ububu. 18 Lijini aju pashinu poepoe panankodya, anángwiidya pai, nkanywa mo kutuka shulu akuno akwishakwishanga meno na andájuma do, go. Ndivajugwa vakwoda vako pakulota vankumulange kanji vanavo vanintatakela.”
19 Yesu do, “Shasho! Mwenu mmanu mmaimbula íkakulupila! Da nangu ndapagwa namu mwenu mpaka duvani? Nannaga mwenu mpaka duvani? Bai pane mwidenavo akuno ndyoko jo!” 20 Vanavo kumwidanavo. Napanelo lijini po pangwene Yesu aníntainneu shalala ndyoko jo, ndyoko kugwa kunneka agalagata pai na atuka shulu nkanywa. 21 Yesu kumudya tatake mwana, “Shitendo ashi shinditwala wakati woe tangu shintunduvange?” Tatamunu kushidoni, “Tangu shidyoko shake. 22 Nomomo myanda vyoe anánjela pamoto na mmedi alota ammyae. Napanelo ukaulula kutenda shinu shoeshoe, twanangila shididi, tupwashela!” 23 Yesu kushidoni, “Ukaulula? Vinu uti vinkuululika kwa aijá ákulupila.” 24 Tatamunu kutangalenneu pashanya po aashidoni, “Nangu ninkukulupila ila ngupwashela kutema ungakulupila wangu.”
25 Napanelo Yesu pagwene iminga yavanu yumbalanila anínshulanga lijini nshapu jo kushidoni, “Wako lijini bubu na úkaigwa, nangu ninkukulamulila kuma mumili mwandyoko aju na haunainjile kavili!” 26 Lijini akuno akuta kungwiya ndyoko jo na dimongo kuma kunneka ndyoko àlele kenga andipela mpaka kuvatadya vanu kushidoni, “Alo, andipela!” 27 Yesu kanji kunkamula ndyoko jo nkono kuntakatuwa kutwala ndyoko jo kwimila. 28 Bai Yesu painjidile nng'ande vàvele gweka vakwoda vake vandímudya doni, “Da mwaa shani wetu hatuulwile kunkumulanga lijini jo?” 29 Nae kushidoni, “Lijini wakuva doni ankuululika kukumulangigwa kwaindila yakushwali bai.”
Yesu ankumanyiya kavili yakupela na kudyuka kwake
Mateu 17:22-23; Lukashi 9:43-45
30 Vanavo vandyúma palyutu alyo kupitila ku Galileya. Napanelo Yesu hashilota vanu vammanye pavele 31 mwaa ashindavapundisha vakwoda vake kushidoni, “Mwana Wamunu vanannimya kunkamudya kumakono kwavanu, vanavo vanampedya, ling'oto lyakupela, muliduva lyantatu lyake andadyuka.” 32 Vakwoda vake havashigwa shashamba vanavo vashindajopa kumudya.
Nyani nang'olo pakati pavakwoda?
Mateu 18:1-5; Lukashi 9:46-48
33 Bai vanavo vandíwika ku Kapalanaumu. Napanelo àvele paing'ande andívaudya vakwoda vake kushidoni, “Da mwenu ndila amulá mushitaukananga nyamani?” 34 Vanavo kummalalanga mwaa vashipita vataukananga vammanye nyani nang'olo pakati pave. 35 Yesu kwikala kuvashema avalá kumi na mbili kuvaulila doni, “Munu akang'ang'anikila ave ntandi andava wamwisho na andava ntumika wavanu uti.” 36 Nae antwete ndyoko ndikidiki kumwimidya shing'ati shave kunkamula kushidoni, 37 “Munu woewoe ámpwashalela mwana ndikidiki kenga aju palina lyangu nangu, angupwashalela nangu; woewoe ángupwashalela nangu i do angupwashalela nangu gweka, ankumpwashalela momo aijá ángutumididye.”
Ákatuvangedya ankupagwa upande wetu
Lukashi 9:49-50
38 Napanelo Nshuwau andítangola kushidoni, “Mwalimu, tungwené munu akumulanga majini palina lyako, wetu kunneya mwaa nae hashitwoda wetu.” 39 Yesu kushidoni, “Mene, mukananneye. Hapali munu álota kutenda makango palina lyangu, jojo jo kuulula kungutangalenneu kunyata 40 mwaa munu ákatuvangedya ankupagwa upande wetu. 41 Ninkumwaulila mwiu doni, aijá álota kumupa luwene lwamedi mukumbila palina lyangu nangu kwamwaa wakuva mwenu mmake Klistu, mwiko munu ajo hakatoka shinu kupata lidaka lyake.
Shambyombyo shakutadya kukuvala
Mateu 18:6-9; Lukashi 17:1-2
42 “Munu woewoe akantadya kukuvala ndyoko jumo pakati pavadikidiki ava vangukulupila nangu, kudyanga munu ajo kumuungila lijanga lyakwidopa pang'ulo kutwala kunjela mwimanga.
43 “Nkono wako ukakutadya ukuvale, lumula. Kudyanga kwinjila mushingumi ùlamele kuliko kuvanavo makono uti mavili kutwala kuka kushena kumoto úkadimika. 44 † Mumaandiko anji kanji ákavele akala uti, vandyánjedya inamba idikidiki ya 44 ilinganána na inamba ya 48. 45 Lidodo lyako likakutadya ukuvale, lumula. Kudyanga kwinjila mushingumi ùlamele kuliko kuvanavo madodo uti mavili kutwala kukujela kushena. 46 ‡ Mumaandiko anji kanji ákavele akala uti, vandyánjedya inamba idikidiki ya 46 ilinganána na inamba ya 48. 47 Liu lyako likakutadya ukuvale, usha. Kudyanga kwinjila muutawala wa Nnungu na liu limo kuliko kuvanavo mevo uti mavili kutwala kukujela kushena, 48 kushinu
“ ‘kwákawa shong'o wave
na moto úkadimika.’§ Lola Ishaiya 66:24.
49 Mumanye kenga kula munu vanantakila munyu na moto.** Vayuda pavashintandela Nnungu shadaka shakutaa moto, vashitumila munyu uvanavo mana aimbodi namu Nnungu. Linganianga: Valawi 2:13; Kuma 30:35; Eshekieli 43:24. Apa Yesu ankutangola ing'ano yakulyumya. 50 Munyu, wambone kanji ukadalala ulota kuujidya dashi kavili kuva munyu? Mwenu avanavo munyu mmili myenu na avanavo amani munu na munumwagwe.”
*9:11 Lola Malakiya 4:5-6. Mulibuku limwe Malakiya vandyándika doni, likanava kuwika Liduva limwe Umu shitandi andaida Liyashi ndapanganianga vinu uti. Mwimbandi ai Yesu ankunninganianga Liyashi kuva Nshuwau Wakubatisha. Namomo ankushidoni, “Elo Liyashi paida andapanganianga vinu uti kanji likanava kuwika Liduva limwe Umu, Mwana Wamunu andapela.” Nae ashitangola davo mwaa vanu havashikumbukila kenga Klistu inimmaikila auvauvange.
†9:44 Mumaandiko anji kanji ákavele akala uti, vandyánjedya inamba idikidiki ya 44 ilinganána na inamba ya 48.
‡9:46 Mumaandiko anji kanji ákavele akala uti, vandyánjedya inamba idikidiki ya 46 ilinganána na inamba ya 48.
§9:48 Lola Ishaiya 66:24.
**9:49 Vayuda pavashintandela Nnungu shadaka shakutaa moto, vashitumila munyu uvanavo mana aimbodi namu Nnungu. Linganianga: Valawi 2:13; Kuma 30:35; Eshekieli 43:24. Apa Yesu ankutangola ing'ano yakulyumya.