3
Nnungu ni wakukulupilika
1 Napanelo muyuda ankuvanavo mana shani? Kwali kukumuligwa likumbi inkupagwa paida shani? 2 Oe! Ankupagwa kula upande! Shitandi vayuda vandikulupiligwa malove ake Nnungu. 3 Napanelo ilota kuva dashi ikava kenga vanji havakulupidíle?* Kwali: …ikava kenga vanji havakulupilike? Da ungakulupilika wave… Da ungakulupila wave undatadya kuputanga kukulupilika kwake Nnungu? 4 Ata padyoko vela! Nneke Nnungu ave waumwiu ata ikava kenga kula munu ni wakushang'apa kenga indyandikigwa,
“pakulota uvenavo ishaliya mumalove ako,
na paukumu po, uteme.Ӡ Lola Dimu 51:4.
5 Kanji napane ikava kenga ungave-shaliya wetu unkulodya ishaliya yake Nnungu, tulota kwamba nyamani? Kwali tutangole do, Nnungu havenavo ishaliya patandedya shitundi shake? Ngutangola kenga nimunu. 6 Ata padyoko vela! Leka ìvele davo, Nnungu akaulwile dashi kuukumu shilambo? 7 Kanji ikava kenga kwaindila yakushang'apa kwangu umwiu wake Nnungu unkuumbaligwa kwalishangelo lyake mwaa shani nguukumigwe kenga ninkútega? 8 Kwali mwavataukangila vanji vyatutangola wetu avi, “Tutende wakunyata pakulota wide wambone.” Ukumu yave ni yashaliya.
Uti vandyashalanga
9 Napane tuushidashi? Da wetu tuvayuda ni túvapunda vanu vanji? Mene, ata padyoko! Mwaa ndivalanganga tayali doni vayuda pamo namu vamidi uti vankupagwa mukutawaligwa na lidambi 10 kenga indyandikigwa,
“Hapali waishaliya ata jumo,
11 hapali munu ámanya,
na hapali ánnambela Nnungu.
12 Uti vandyashalanga,
kwaunapamo vandilitenda vákave mana.‡ Lola Dimu 14:1-3; 53:1-3.
Hapali átandedya wambone,
kulamana na jumo vela.
13 Ding'alongo dyave ni makabuli avé mwandwa,§ Lola Dimu 5:9.
dindimi dyave vankutumila mukushang'apa.
Mudindomo dyave munkupagwa ishumu yanyoka,** Lola Dimu 140:3.
14 ndikanywa dyave mundyumbala dilana na kukalala.†† Lola Dimu 10:7.
15 Madodo ave ankutukutila kukujaa myadi,
16 mudindila dyave mo, kubamola na madembe,
17 na indila ya amani havamanyite.‡‡ Lola Ishaiya 59:7-8; Mikong'o 1:16.
18 Hakupali kunjopa Nnungu pamevo pave.”§§ Lola Dimu 36:1.
19 Napane wetu tundimanya kenga uti vitangóla mulilamulo vinkutangola kwa avalá vatawalígwa na lilamulo kwambangidya dashi, dikanywa uti dimalale na shilambo uti shikapagwe muukumu yake Nnungu 20 mwaa kwaindila yashimadengo shalilamulo hapali álota kuvalangiligwa kuva ishaliya pamevo pake pakuva kwaindila yalilamulo inkutadya lidambi limanyike.
Uti vankupalavalela lishangelo lyake Nnungu
21 Ambi napane ishaliya yake Nnungu indililodya yapukananga na lilamulo; ata lyo lyene lilamulo na vakulava vankumya ushuda wake, 22 doni, ishaliya yake Nnungu kwaindila yakunkulupila Yesu Klistu kwa avalá uti vankulupíla nae. Hakupali kuvilingananga 23 mwaa uti vanditega na kupalavalela lishangelo lyake Nnungu 24 vavalangiligwa kuva ishaliya muumonyo wake kenga inudyo kwaindila yakwambola kupagwíte nkati mumwe Klistu Yesu. 25 Nae jo, Nnungu andimumya kenga shadaka shakudimanga shitundi shake kwamyadi vyake kwaindila yalikulupililo*** Kwali: Nae jo, Nnungu andimumya kenga shadaka shakudimanga shitundi shake kwaindila yakukulupila myadi vyake… kwambangidya dashi ililodye ishaliya yake mwaa kwaupole wake, andíleka madambi akunyuma 26 pakulota alodye ishaliya yake muwakati au na ave waishaliya namomo wakummalangilila ishaliya aijá ánkulupila Yesu.
27 Napane shakwashi shakulota kulitamangila? Hashipali! Kwalilamulo shani? Lilamulo lyashimadengo? Mene kanji kwalilamulo lyakukulupila. 28 Mwaa wetu tunkwakikisha kenga munu ankuvalangiligwa ishaliya kwalikulupililo lyapukanánga na shimadengo shalilamulo. 29 Kwali Nnungu jo ni wavayuda gweka? Da nae po hanava shinu momo Nnungu wavamidi? Elo, ni wavamidi momo 30 pakuva Nnungu avelé jumo bai na kwalikulupililo tu, nae andavavalangilila ishaliya vakumulígwe na vákakumuligwe. 31 Da doni po tunkuputanga lilamulo kwaindila yalikulupililo? Ata padyoko vela! Kanji lyanavo lyo, tunkunonowanga.
*3:3 Kwali: …ikava kenga vanji havakulupilike? Da ungakulupilika wave…
†3:4 Lola Dimu 51:4.
‡3:12 Lola Dimu 14:1-3; 53:1-3.
§3:13 Lola Dimu 5:9.
**3:13 Lola Dimu 140:3.
††3:14 Lola Dimu 10:7.
‡‡3:17 Lola Ishaiya 59:7-8; Mikong'o 1:16.
§§3:18 Lola Dimu 36:1.
***3:25 Kwali: Nae jo, Nnungu andimumya kenga shadaka shakudimanga shitundi shake kwaindila yakukulupila myadi vyake…