Pol ile malueng ako i wat i a toko lemioongare nge ako o voth a epee a Galesia
Galesia
Ritetong nge a Galesia
Toko pelie ako a rumremre ako a epee a Galesia o velpol tel ini toko lemioongare nge ako o nongpol Panongpolong Sivenga ako Pol i panongpol nge. Toko pelie olemi ve i oma omaing aken nge ile esong teltelnga, na toko pelie olemi ve, i oma i nge ile esong aininga. Na tokokoe areken o voth a epee a Galesia or ini Judare. Ave o panes a Moses ile patorong avele. O nongpol Panongpolong Sivenga mako olemio nge a Jisas ma God i pamimi or. Aveto palolo avele nge ako Pol i los lelpot or, nako pamirealonga le apaltetongare o velpoltun toko lemioonga Galesia angare ma ole apaltet or ve, “Aro ve toko e ilemio nge a Jisas inga, i pavurvur avele ako aro i el mimiong ako aro ile vusonga avele, aveto aro i panes mun a Moses ile patorong, naro i el mun paatealing ako ini toko ini peti isnga mo i velpol ini a God ile toko.” Ma Pol i nongpol ako ve patoraling aken i velpoltun or ma ilemi kling rintet nge, ma i kukuk nge Galesia angare ako o ta otelnga nge patoraling ako i rel rintet nge Panongpolong Sivenga ako Pol i panongpol or nge ma o elo i a olemi. (1:6-9) Mako Pol i wat malueng ake a or nge mo i pathengal or ve, Panongpolong Sivenga aken ienga i pavurvur aro i pamimi or. Pol i pathengal or ve, ile panongpolong aken i nunganga, eneke God isivenga i ateal i mo i velpol ini ile pakeke, ma i sung mun panongpolong aken a i nge. (1:11–2:10) Na ur aolonga ako i voth a Panongpolong Sivenga lemi, na i voth mun a malueng ake lemi i vene: Toko i velpol ini toko vengvenga a God itheki, ako nge ile lemioong inga nge a Krais, na nge a Moses ile patorong panesnga, eve nge vothung sivenga omanga, kene avele. (2:16-21) Pol i pathengal ako ve, toko e avele i pavurvur nge a Moses ile patorong panesnga, maken God i sis inga ve aro ler lemioong i ranga ve ini a Abraham ile lemioong, moro aken aro te velpol ini toko vengvenga a God itheki, naro te vthopot mun nge a Moses ile patorong engenga panesnga. (3:1–4:31) Aveto it areko te vthopot nge a Moses ile patorong panesnga, aro te oma vothung kerenga avele. (5:1-15) Avele ako, ler lemioong i pavthopot it nge aken, maken te pavurvur nge vothung sivenga panesnga ranga ve ako Oni Riringa i paengeng it nge omanga. (5:16-26)
God isivenga i ateal a Pol mo ini ile pakeke
1
(Vonge 1:1–2:14)
Tho ini a Pol, tho ini pakeke, ave ini tokokoere ako o ateal tho na o pake tho, kene avele. Na tho ini tokokoere ole riong elnga avele. Aveto Titemer a God ome a Jisas Krais ako i palos werera i nge rinong, o ateal tho ve aro tho ini ole pakeke na ole riong elnga. Na toko lemioongare ako o voth tomo nge tho, them pasong malueng ake a thomu toko lotuongare nge ako o voth a rumremre ako a epee a Galesia.
Aro thomu o el themosaling na lemi moring a Titemer a God tomo nge ar Pomnga a Jisas Krais nge. Na Jisas Krais i panes inga Titemer a God ilemi, mako i sungu isivenga ile mimiong mo aro i pavthopot it nge ler vothung kerenga, na i el werer it nge vothung ulue anga ako i kerenga rintet ako i voth tomo nge it ponange ake ru a ulue. Maken evelelnga aro te risea a God iion roro na ler riseaing aken aro ile vusonga avele. I nunganga.
Panongpolong Sivenga ini a God ile riong nunganga, na toko e i mothong tova i eksing ol i.
Lemik i ngo tangatun nge lomu vothung ako tho lo lelpot thomu, na palolo vet avele, nako thomu o lo lelpot a God viri viri. Na nge a Krais ile themosaling i ateal thomu, aveto thomu o lo lelpot i viri viri, na thomu o panes panongpolong relnga mun e. Na panongpolong ol e avele ako ini Panongpolong Sivenga, aveto tokokoe pelie o papelekpol a Krais ile Panongpolong Sivenga na o palemi pelekpol mun thomu nge. Aveto aro ve them eve ensel ako i esu a Pen a Urvet me, aro ve o panongpol nge panongpolong ako i rel nge Panongpolong Sivenga ako them panongpol tel thomu nge lale, aken tho nong nge a God ve aro i paomelal toko aken nge paomelaling ako aro ile vusonga avele. Na tho ria mun ako ranga ve tho ria thomu nge lale, aro ve toko e i panongpol thomu nge panongpolong ako i rel nge Panongpolong Sivenga ako thomu o elo tel i lale, aken tho nong nge a God ve aro i paomelal toko aken nge paomelaling ako aro ile vusonga avele.
10 Ava thomu o rivenga tho ri riong ake mo i oma tokokoere mo olemi sivenga nge tho, e? Avele! Tho sis inga ako ve, God aro ilemi sivenga nge tho. Na aro ve rongan tho engeng inga nge tokokoere opamolomolonga venen aken, aro tho ini a Krais ile umonga nunganga avele.
Pol ia tenesing ako i velpol ini a God ile pakeke.
11 Titeikre tho sis ve aro lomumu mire ako ve, Panongpolong Sivenga ako tho panongpol nge, ini toko ulue angare ole avele. 12 Na tho el i a toko e nge avele. Na toko e i patoral mun tho nge avele. Aveto Jisas Krais isivenga inga ako i pathengal i a tho nge.
13 Thomu o nongpol lale nge lek vothung ako tho oma i nomenga ako tho panes senu Judare ole vothung. Na tho pakerenga rintet a God ile toko lemioongare, na tho engeng ako ve, aro tho pavus or. 14 Na tho engeng rintet nge ok pompome Judare ole vothung panesnga, na nge lek vothung aken, tho mukal rintet nge thengengek Juda pulua ako emem tovu po i thun. 15 Na rongan nina i pop tho rongan, na God i themosal tho, na i ateal tho mo tho ini ile umonga. Lamako nge nang omole ako God i ateal i, 16 i pathengal tho nge Itun mo aro tho panongpol nge i nge areko or ini Judare avele, na nge nang aken tho el torong a toko e nge avele. 17 Na tho es mo aro tho thopol areko o velpol ini pakeke tel nge tho ako a Jerusalem, kene avele, aveto a ur e avele, nako tho es inga a pen polpolnga ako a Arebia, lamako tho lo werer a rem pomnga a Damaskus la.
18 Na tovu po or me i vus ma tho esa a Jerusalem mo aro tho leng leng tomo nge a Pita na tho voth tomo inga nge i, nge nang or mule pa omole pothoi or lim. 19 Na tho thopol tomo mun a Jems ako ini a Jisas itein, na tho thepol ol pakeke mun e avele. 20 Na tho ri nunganga a thomu nge, ako a God itheki, lek riong ake tho wat i a thomu nge, kene lek apaltetpot thomu nge avele. 21 Nge nang areko tho voth tomo nge a Pita i vus lamako tho es a epee a Siria na Silisia. 22 Na nge wop lemi aken, Krais ile toko lemioongare ako o voth a epee a Judia o thopol thekik rongan. 23 Aveto o nongpol nge iok le kimaing ve: Toko aton nomenga i pakerenga it, ponange i panongpol ol nge lemioong ako te voth nge, ako nomenga i sis ve aro i pavus i. 24 Na o risea a God iion roro, eneke o nongpol ako God i eksing lek mimiong.