Pol ile malueng ako i wat i a toko lemioongare nge ako o voth a rem a Pilipai
Pilipai
Ritetong nge a Pilipai
Nge wop lemi ako Pol i plosa ma i es ako la a epee a Masedonia mo aro i panongpol or nge Panongpolong Sivenga, i es ako a rem pomnga a Pilipai. (O thepola Pakekere ole Omaing 16:9-40) Na ile panongpolong aken i pavelpol toko lemioonga pelie a rem aken. Lamako i los lelpot or. Na tovu po pelie i vus, lamako o rere a Pol a rem relnga e, ma o paeso i a mang a midenga lemi. Na toko powe ninengare o ri ve i voth a mang a midenga ako a rem pomnga a Rom. (Pakeke 28:14-31) Na Pol i wat malueng ake a mang a midenga lemi mo i ri ve aro i ri sivenga nge Pilipai angare, ke o seveal opoaling e sungongre a i nge. (1:5; 4:10-19) Na i ritet mun or nge ile menong ako a mang a midenga lemi. Na toko pelie o sis ve aro o pavelpol mun matheong pelie a Pol nge, aveto Pol ilemi voth mos nge matheong aken tomo nge ile menong a mang a midenga lemi, kene avele. Avele, ilemi sivenga inga ako Panongpolong Sivenga i kima a pen elonga. (1:12-26) Na lemi sivengaing a vothung ini ur aolonga ako malueng ake i ri nge. (1:4; 1:18; 2:2; 2:17-18; 2:28-29; 3:1; 4:1; 4:4) Na Pol i pator toko lemioongare ako o voth a Pilipai mo o mit engeng na o ngeip avele nge Panongpolong Sivenga panesnga. Na o mothong tova o ngange nge areko o sis ve aro o pakerenga or. (1:27-30) Aken ini ur aolonga ako i voth a malueng ake lemi. Na Pol i nin mun Pilipai angare ve aro o paruru osivenga mo o opoal tokokoere, ranga ve ako Krais i oma i. Krais ini a God, aveto i paruru isivenga ma i velpol ini toko neneanga, na i ranga ve ini toko umonga ako i opoal it. (2:1-11) Na i ria mun or ve aro i pake toko sivenga or aini a or nge, ini a Timoti ome a Epaproditus. (2:19-30) Na i tor mun ole nge pamirealonga le apaltetongare ako o ri ve, i pavurvur toko i velpol ini toko vengvenga a God itheki, tova ve i panes vothung sivenga ako toko ulue angare o ri nge. Aveto Pol i ri ve, aro lemiro inga nge a Krais, aken aro te velpol ini toko vengvengare a God itheki. (3:1-21)
Pilipai angare o velpol ini a Pol itein sivesivengare, mako Pol ilemi sivenga rintet nge or
1
(Vonge 1:1–4:23)
1 Tho a Pol tomo nge a Timoti, them ini a Krais Jisas ile umongare.
Na tho wat malueng ake a thomu areko ini a God ile tokokoe alavusnga areko o teo a Krais Jisas nge, ako o voth a Pilipai, tomo mun nge areko or ini lotu a mukalingare ako ole lemioong i motu, na ole opoalingare mun. 2 Aro thomu o el themosaling na lemi moring a Titemer a God tomo nge ar Pomnga a Jisas Krais nge.
Pol ilemi rum Pilipai angare ole sungong a i nge ma i ri sivengaing a God nge.
3 Tho ri sivengaing a God nge, nge lomu lemi rumong alavusnga nge tho. 4 Na nge lek nongong alavusnga, tho nong a God nge, nge thomu, ma tho nong tomo nge riseaing, 5 eneke thomu o opoal tho nge Panongpolong Sivenga panongpolnga ako nge lomu sungong. Na lomu omaing aken i patea nge nang ako thomu o nongpol tel panongpolong aken, na i mul nge ponange. 6 Na tho nong mun venen aken, eneke lemik mire ako i nunganga lale ako ve, God ako i patea ile omaing sivenga a lomumu, aro i kis ile omaing aken i mul nge ako aro i pavus i, nge nang ako Jisas Krais aro i lo werer nge me.
7 Na i vengveng ako aro lemik i voth venen aken nge thomu, eneke ok sagu rintet thomu, eneke aro ve tho voth a mang a midenga, eve tho mit nge riong mo tho lel nge panongpolong ako tho panongpol nge, na tho pathengal i ako ve, Panongpolong Sivenga aken i nunganga, aken kene thomu o opoal tho nge lek omaing nge Panongpolong Sivenga panongpolnga ako God i sungu i a tho nge, nge ile themosaling, na thomu o opoal tho nge aken nge lomu sungong a tho nge. 8 Na God ilemi mire ako lek riong ake i nunganga ako tho ri ve, lemik i engeng ve aro tho voth werer tomo nge thomu, na ok sagu thomu nge a Krais Jisas ile asaguong ako i voth a tho nge.
9 Na lek nongong nge thomu i vene: Aro thomu o rong esa lomu asagupeling nge ako aro lomu mire i aolonga nge a God, naro lomumu i nine nge ur alavusnga. 10 Na tho nong ve aro thomu o venen re aken, mo aro thomu o pavurvur ako aro o avrum senu vothung kathnga ako i sivenga rintet, na nge ako aro thomu o riri, na toko e avele i pavurvur aro i teltun omu. Na ake ini lomu omaing ako o monsi nge nang ako aro Krais i lo werer nge me. 11 Na tho nong mun ve aro thomu o vual nge vothung vengvenga ako Jisas Krais i pavelpol i a lomu mimiong mo aro tokokoere aro o thopol lomu mimiong aken, naro o papomnga a God na o risea i nge.
Pol ile esoong a mang a midenga i paengeng tokokoere nge Panongpolong Sivenga panongpolnga.
12 Titeikre, tho sis ve aro lomumu mire ako, ur ako i velpoltun tho, ako o paeso tho a mang a midenga, i mit roal Panongpolong Sivenga panongpolnga avele, aveto toko pulua rongan o nongpol nge. 13 Ranga ve ako mit tetalonga alavusnga ako o theal nepes a Sisar ile vel, tomo mun nge toko alavusnga ako o voth a pen ake, olemi mire ako tho voth a mang a midenga ake, eneke tho oma a Krais ile omaing. 14 Na toko lemioonga pulua o thopol a God ile opoaling nge tho, ako tho voth a mang a midenga ake, mako ole lemioong i engeng nge a Toko Pomnga, mako ole ngeipong ol e avele na o panongpol engeng nge a God ile riong.
15 Na i nunganga ako toko pelie oni plong nge iok le kimaing na oni silal tho, mako o panongpol nge a Krais ile riong. Aveto pelie o panongpol, eneke ole lemi rumong i sivenga nge tho. 16 Or ini areko o panongpol, eneke oa sagu tho, na olemi mire ako, tho voth a mang a midenga mo aro tho mit nge riong, naro tho lel nge Panongpolong Sivenga ako tho panongpolong nge. 17 Aveto areko oni plong nge iok le kimaing, o panongpol mun nge a Krais ile riong, eneke o sis ve aro o theal osivenga, na ole lemi rumong i vengveng avele, na olemi ako ve, o pavurvur ako aro o rong esa matheong mun a tho nge, ako tho voth a mang a midenga lemi. 18 Na i vava nge aken? Aro ve ole lemi rumong i sivenga eve i kerenga, ur e avele, eneke ake ini a Krais ile panongpolong ako tokokoere o nongpol i, na lemik i sivenga nge aken.
Pol i sis ve aro ile mimiong alavusnga aro i papomnga a Krais iion.
Na o sis ve aro o palemi kerere tho, aveto aro tho kis inga riseaing, 19 eneke nge lomu nongong a God nge, nge tho, na nge a Jisas Krais Ioni ile mit tomoing nge tho, kene lemik mire ako ur areken aro i pavelpol lek mimiong el werernga. 20 Na lemik ve aro i velpol venen re aken, eneke tho sis rintet ve aro tho oma ur e avele ako aro lek mara nge, ave tho sis ve ponange na panen aro tho mit engeng, na evelelnga aro tho papomnga a Krais nge lek mimiong tomo mun nge lek rinong. 21 Na lemik i vene, eneke aro ve tho mimi, aro tho papomnga inga a Krais. Na aro ve tho rin, aro i sivenga nge aken. 22 Aveto aro ve rongan tho mimi, tho pavurvur aro tho oma a Krais ile omaing mun pelie. Naro tho panes kathnga? Aro tho mimi eve tho rin? I pavurvur aro tho ritet thomu nge avele. 23 Eneke lemik aini aini tun nge, tho sis ve aro tho rin mo aro tho voth tomo ol nge a Krais, eneke aken i sivenga rintet nge mimiong ake ru a ulue. 24 Aveto nge thomu, i sivenga ako tova ve aro tho mimi ake ru a ulue mo ako aro tho opoal thomu. Na opoalngomu aken kene i aolonga rintet nge lek esoong a Pen a Urvet. 25 Na lemik i engeng ve lek omaing rongan i voth ako aro tho opoal thomu nge, aken lemik mire lale ako ve, aro tho mimi, naro tho kis inga nge opoalngomu mo aro lomu lemioong i motu, naro lomu lemi sivengaing nge lomu lemioong aken aro i aolonga. 26 Na nge ako tho velpol werer a thomu nge, aro tho opoal thomu venen aken mo aro thomu o vual rintet nge a Krais Jisas iriseanga, eneke tho ake aro tho voth tomo werer mun nge thomu.
O mit engeng nge lomu lemioong na o el inga matheong, eneke God i sungu or alaini a thomu nge.
27 Na ur inga ako i aolonga ini lomu mimiong ako aro i panes vothung ako Krais ile Panongpolong Sivenga i ri nge. Na aro ve tho es na tho thopol thomu, eve tho voth mela nge thomu, aro thomu o oma venen aken mo aro tho nongpol ako rongan thomu o mit engeng, na lomumu omole ol inga nge ako lomu vur engeng ranga ve ini toko omole, nge lomu lemioong panesnga ako Panongpolong Sivenga i pavelpol i a thomu nge. 28 Na tho sis ve aro tho nongpol mun ako thomu o mit engeng nge ako saluk thomu tie avele nge lomu ngarangre. Na aro ve saluk thomu nge lomu ngarangre avele, aken i pathengal or ve, God aro i pakerenga or, na i pathengal mun thomu ve, God aro i pamimi thomu. 29 Naro o mit engeng, eneke God i oma senu nge thomu, ako isa wompot thomu ve aro o oma a Krais ile omaing, na ilemi inga ve aro lomumuo inga nge i avele, aveto aro o el mun matheong, eneke thomu ini ile. 30 Na ur aken i nunganga, eneke thomu o el matheong ranga ve ako thomu o thopol i ako tho el i nomenga, na ponange thomu o nongpol mun ako rongan tho el i.