Dos Sulat Atag to mgo
HEBREO
Unna nod Bosan
Inin libru, waa nosorolli ko ondoy kos tohodsulat woy ingkon kos id popiyoddan. Piru otid bosan ta ini, od koovottan ta no id popiyod ini atag to id lolivuung nod pompomakoy no mgo Judio. Dos mgo Judio, od ngoranan mandad no mgo Hebreo pomon poron to timpu ni Abraham, woy id ngoranan mandad sikandan no koubbaran ni Israel, su koubbaran man sikandan taddot apu-buwoo ni Abraham, no id ngoranan ki Juda no anak ni Jacob. Na ini si Jacob, id ngoranan mandad ki Israel.
Inis mgo Hebreo, id posupittan pomon to kopomakoy ran ki Disas Krays (10:32-34; 13:3, 13). De-en iddos duma, id mohonnow ron kos kopomakoy (12:12), woy dos duma, id soro riyot kodlolivuung amoy od simba ki Disas Krays (10:25), oyyos od livod don nanoy sikandan diyot tapoy no pomokayon dan no mgo Judio. Purisu id sulat ini amoy'd mosalig kos kopomakoy ran.
Dos po-ukit to tohodsulat amoy'd kopuungan idda, id posaddoo rin no si Disas Krays kos lampas to langun. Duwon otollun id paabbotlabbot din kandan moka-atag ki Disas Krays.
Unna, sikandin kos Anak to Monama, de-en lampas pa sikandin taddot mgo propeta iling ki Moises woy taddot mgo ponolihan.
Iko-oruwa, lampas pa kos koru-anon to id puungan ni Disas kuntra taddot pinuungan to mgo tohodbuwis no Judio.
Iko-otollu, ukit ki Disas Krays, od kotobbus en kos mgo minuvu, oyyos sikandin kos timbang buwis no od tuman taddot mgo Suhu ni Moises, su amoy konnad ko-ilangan nod bovuwis pa sikandan to oyama amoy'd koposinsyan kos saa to mgo minuvu.
Mid inniyat iddos tohodsulat, no ko-ilangan morumoruma ran tod Longaggon woy od ti-is to mgo kodposuppit. Id inniyat din mandad sikandan no diid aang-aang nod porani to Monama, oyyos si Disas Krays man kos daan ta riyot Monama (4:16; 6:20; 10:19-23). Id ituu mandad taddot tohodsulat iddos moka-atag to id puungan taddot novantug dangan no mgo minuvu to Monama pomon to kandan no kopomakoy. Ahad mosuppit iddos no-ukitan dan, waa ran id tanan to kopomakoy (11:1-39).
Diyot kotompusan ka-ay'n sulat, id pomonduwan din sikandan no diid poriyu ki Disas, ko konna, od ilingan dan iddos ko-ubpa tod pompomakoy dangan no id kahaa-i to Monama.
Dos mgo Nokota-aw:
Mid ikahi kos Monama keta ukit to Anak din no si Disas Krays (1:1-3)
Lampas pa iddos Anak to Monama taddot mgo ponolihan (1:4 taman to 2:18)
Lampas pa si Disas ki Moises (3:1 taman to 4:13)
Lampas pa si Disas ki Aaron woy taddot langun no tohodbuwis (4:14 taman to 7:28)
Lampas pa no moppiya iddos lammin tandu to Monama no notuman ni Disas Krays (8:1 taman to 9:28)
Lampas pa no moppiya iddos kodbuwis ni Disas Krays (10:1-18)
Od ponayun ki nod salig taddot id immanan ta (10:19-39)
Dos kopomakoy dangan to mgo minuvu to Monama (11:1-40)
Dos pomandu atag to ko-ubpa tod pompomakoy (12:1 taman to 13:19)
Kotompusan no mgo pomandu woy kodpongumusta (13:20-25)
1
Mid Ikahi kos Monama Keta Ukit to Anak Din no si Disas Krays
1 Na dangan no timpu, komo-uraa id posaddoo to Monama iddos ponudtulon din diyot keton kovuyyahan* Sikandan en kos kovuyyahan to mgo Hebreo no id ngoranan mandad no mgo Judio. ukit to mgo propeta, woy nokod-osso-ossa kos po-ukit to kodposaddoo rin tadda. 2 Piru inin morin mgo allow, id posaddoo idda to Monama keta ukit to Anak din. Woy ukit en kandin, id bovallan to Monama kos langun diyon to langit woy ka-ay't ingod, woy id aam sikandin to Monama no od pongomunoy to langun. 3 Diyot kandin, od kokita kos langun no se-aa to kotuusan woy kopiyannoy to Monama, oyyos waa ko-ossan din to Monama.* Od kovasa ini riyot Colosas 1:15-16. Sikandin kos id somad to langun no riyot langit woy ka-ay't ingod ukit to kotuusan to kahi rin. Nopongnga ki nikandin id linisan pomon diyot mgo saa ta, id livod sikandin diyot datas to langit woy mid unsad lomig to kowanan to Monama no Motuus to langun.* Od kovasa ini riyot Salmo 110:1.
Lampas pa iddos Anak to Monama taddot mgo Ponolihan
4 Na pomon ka-ay, id pokita to Monama no lampas iddos Anak din taddot mgo ponolihan, su iddos ngaran no id boggoy kandin to Monama, lampas pa kos bantug taddot ngaran to mgo ponolihan.
5 Oyyos waa en ponolihan no id osengan to Monama no,
“Sikkow en kos Anak ku.
Inin allow, id pokilaa ku no Amoy a nikkow.”* Od kovasa ini riyot Salmo 2:7; Pinuungan 13:33.
Woy waa en mandad id oseng kos Monama moka-atag taddot ahad ondoy no ponolihan no mid ungketen to,
“Siyak, od ka-amoy rin don
woy sikandin, od ka-anak kud.”* Od kovasa ini riyot 2 Samuel 7:14; 1 Cronicas 17:13.
6 Na, diyot timpu no id popiyod don to Monama ka-ay to ampow't ingod iddos Anak din no ponganoy,* Diyot botasanon to mgo Judio, iddos ponganoy no anak no mama kos od dokollan to koru-anon. De-en id ngoranan si Disas no ponganoy, oyyos sikandin kos lampas to langun no duwon koru-anon, woy id posivontuhan sikandin to Monama no Amoy rin. mid ikahi sikandin to,
“Ko-ilangan no od simba kandin iddos langun no ponolihan.”* Od kovasa ini riyot Deuteronomio 32:43.
7 Woy ini en kos id oseng to Monama moka-atag to mgo ponolihan, kahi rin to,
“Sinuhuwan ku iddos mgo ponolihan, woy kopakoy nod bovallan ku sikandan iling to apuy woy kaamag no od tuman to suhu ku.”* Od kovasa ini riyot Salmo 104:4.
8 Piru riyot Anak din, mid ikahi iddos Monama to,
“Sikkow en kos Monama. Od hari ka to waad tomanon, woy motallong kos kodhari ru to kikow'n mgo minuvu.
9 Id kahaa-i ru kos motallong no pinuungan,
piru id kolingasa-i ru kos kororattan.
Idda en kos unayan no siyak no Monama ru,
id aam ku sikkow nod boggayan to bantug woy kahaan no lampas pa taddot langun no duma ru.”* Od kovasa ini riyot Salmo 45:6-7.
10 Duwon mandad id ikahi to Monama riyot Anak din no mid ungketen to,
“Sikkow, od Longaggon, diyot tigkonayan, mid bovaa ka to ingod
woy ukit to bollad du, novovallan iddos langun no riyot langit.
11 Od kowora man kos langun, piru sikkow, od taman en to waad tomanon.
Langun ka-ay, iling to tapoy'n umpak no dii ron od kahamit.
12 Woy iling to tapoy'n umpak, od luppiyon du kos langit woy ingod, woy od buwassan du to lammi.
Piru sikkow, dii ka en od kopalin, woy dos umuu ru, od taman to waad tomanon.”* Od kovasa ini riyot Salmo 102:25-27.
13 Na atag mandad taddot mgo ponolihan, waa en ahad sokkad kandan no id osengan to Monama iling ka-ay't id oseng din diyot Anak din, kahi rin to,
“Unsad ka lomig to kowanan ku, taman tod kotalu kud iddos od pongkuntra kikow woy id po-iraom ku sikandan to kikow'n kodponguu.”* Od kovasa ini riyot Salmo 110:1.
14 Na, ko ungketen, iddos mgo ponolihan, mgo ispiritu sikandan no sinuhuwan to Monama amoy od tavang to langun nod kotobbus.
*1:1 Sikandan en kos kovuyyahan to mgo Hebreo no id ngoranan mandad no mgo Judio.
*1:3 Od kovasa ini riyot Colosas 1:15-16.
*1:3 Od kovasa ini riyot Salmo 110:1.
*1:5 Od kovasa ini riyot Salmo 2:7; Pinuungan 13:33.
*1:5 Od kovasa ini riyot 2 Samuel 7:14; 1 Cronicas 17:13.
*1:6 Diyot botasanon to mgo Judio, iddos ponganoy no anak no mama kos od dokollan to koru-anon. De-en id ngoranan si Disas no ponganoy, oyyos sikandin kos lampas to langun no duwon koru-anon, woy id posivontuhan sikandin to Monama no Amoy rin.
*1:6 Od kovasa ini riyot Deuteronomio 32:43.
*1:7 Od kovasa ini riyot Salmo 104:4.
*1:9 Od kovasa ini riyot Salmo 45:6-7.
*1:12 Od kovasa ini riyot Salmo 102:25-27.
*1:13 Od kovasa ini riyot Salmo 110:1.