1 Siaken, mepakay a peden memallì te inangen ko, so siaken se sogounun i Cristo, aw kinità ko se Pengolo tadon si Jesus, aw sikiyo se nemenal kandin pineokit te pegtoladà ko. 2 Pengkey doen doma otaw eg-aneng-aneng te kenà a sogounun i Cristo, meneng sikiyo se netaga-taga kenyan, so pineokit te pegtoladà ko, nemenal kaw aw yan se pengilala te sogounun a i Cristo. 3 Yan se ipegtaba ko diyà te menge otaw eked pemenal te insogò a din. 4 Pengkey wedà a niyo togpoi, meneng ikà niyo eg-aneng-aneng te eked iyan kepakay. 5 Simpana doen esawa ko, mepakay aw ipetaking ko pengkey kenan a pesalo, so doen man esawa ipegpetaking te menge doma sogounun i Cristo, pengkey si Pedro aw menge kedowa i Jesus. 6 Pengkey wedà kay togpoi te menge simbahan, meneng ikà niyo eg-aneng-aneng te olò sikami si Bernabe se keilangan megterbaho amon doen ibayad day te kànen, 7 so se otaw megpagod, keilangan doen ontong din. Wedad palos sondalo menogpò te kandin pegkeotawun. Wedad heman otaw eked kaen te pongo te intanem din. Wedad heman otaw telediyaga eked inem te gatas lekat te baka tinonggoan din.

8 Lekat te keogpà tadon se tegdeyanan ko seini, meneng onawa heman se toladà diyà te kagi te Timanem insolat, 9 so doen punù te Timanem ingkeliwat i Moises insolat,

Pengkey mepakay aw memoyò kay te togpò lekat kenyo, meneng wedà kay palos pemoyò. Pengkey nelimahan kay, meneng wedà kay palos pemoyò lekat kenyo, amon eked kebelebagi se menge otaw menenalan te Mèpiya Indan intoladà day tepad ki Cristo. 13 Netegahan niyo den ini. Se menge otaw egterbaho doton te dakel simbahan te Judiyo doton te Jerusalem, yan se doen ilas dan diyà te kànen egpengibingen doton te simbahan te Judiyo. Se menge otaw egsonog te ayam-ayam doton te dakel simbahan te Judiyo, yan se begayan te tengà te kànen kidoen ipegpemegay diyà te Timanem. 14 Iling kenyan, migpunù se Pengolo tadon te keilangan togpoan te otaw menenalan se otaw megtoladà kandan te Mèpiya Indan tepad ki Cristo.

15 Meneng siaken, wedà a palos pemoyò lekat kenyo. Se tod ko te pegsolat ko kani, kenà amon megpetogpò a kenyo, so kenà niyan se ibeg ko. Wedad otaw meketodà te peg-eked ko te pegpenogpò niyo kanak. 16 Eked ko duyuni se pegkeotawun ko te migtoladà a te Mèpiya Indan, so insogò a te Timanem megtoladà kenyan, aw ipelumun a din aw eked a tolò. 17-18 Meneng aw lekat te kanak ibeg se pegtoladà ko, yan se ontong ko aw togpoan a. Meneng kenà iyan lekat te kanak ibeg, so insalig te Timanem kanak se pegtoladà te Mèpiya Indan tepad ki Cristo, aw se keluba ko te pegtoladà ko, yan se ontong ko pengkey eked ko sikiyo petogpoi. Pengkey mepakay aw togpoan a te otaw toledaan ko te Mèpiya Indan, meneng eked a palos pemoyò te togpò lekat kandan.

19 Pengkey mepakay aw memallì a peden te inangen ko, aw wedad otaw mekeleges kanak, meneng migpeinang a iling te allang megtabang te kedita te otaw, amon pineokit kanak, medita se otaw memenal ki Cristo. 20 Seini se eg-inangen ko. Aw menge Judiyo se toledaan ko, egtoloen ko se ketanem dan amon memenal dan te kebenalan itoladà ko. Pengkey netegahan ko te mepakay aw eked ketolò se punù ingkeliwat i Moises, meneng egtoloen dan se menge punù sìyan, aw yan tomolò a heman kenyan amon memenal se menge Judiyo te kebenalan itoladà ko tepad ki Cristo. 21 Aw menge otaw kenà Judiyo se toledaan ko, tomaking a heman kandan te eked tolò te punù ingkeliwat i Moises, amon memenal heman se menge otaw kenà Judiyo ki Cristo. Meneng kenà te linèpangan ko se punù te Timanem, meneng se kebenalan, timolò a man ki Cristo. 22 Peg-ilingan ko se inang te menge otaw wedà ontò ketoledai tepad te pegtaking ki Cristo, amon ketebangan ko dan. Gayed a timaking te inang te kedita te otaw, amon pineokit te pegtoladà ko, doen menge otaw mekelowà lekat te pegpelumun te Timanem. 23 Yan se eg-inangen ko amon ketegahan te kedita te otaw se Mèpiya Indan tepad ki Cristo, aw amon mekeontong a heman doton te langit.

24 Netegahan niyo den, aw doen koyà, pengkey medita se otaw komagnan, meneng sebad olò se kebegayan te ontong. Tayod kaw heman te pegtaking niyo ki Cristo amon mekekinawà kaw heman te kenyo ontong. 25 Se kedita te otaw komagnan, doen eked dan kepakay inangen amon eked ketostos se kagsen dan. Aw tomayod dan kenyan, doen mekeabat te ontong, pengkey ininang iyan te dawen melanes te eked kenamay. Meneng sikitadon egpemenal ki Cristo, ibeg tadon kinewaen se ontong wedad palos temanan. 26 Yan se doun te egpekagsen a te pegtaking ko ki Cristo, iling te otaw egpekagsen se egkagnan lamig domateng te temanan. Iling a heman te otaw egpesontokay gayed egpekesogat te timbang din. 27 Gayed ko egnedamen se lawa ko te sontok amon melomì ko meibing se lawa ko, so eked a keibeg te penga te pegpeakop ko te doma otaw, eked a pekeakop se kanak.