1 Je² qui³si³cˀe¹yo³con³-no³ nca³ jon² xi³ jo³-ni³ tsa² xi³ ti³yo³cˀaon³ xi³ to⁴tˀa³tsˀe⁴ cjoa⁴tsˀen⁴ cao⁴ je¹-no³. 2 Nca³sˀa⁴ xi³ cja⁴ˀai¹ ni⁴čhjin³ cˀoa⁴-sˀin² tsa³qui³ma³-jion³ je² cjoa⁴-ve⁴ jo³ cji³ma³chon³ son³ˀnte³, jo³-sˀin² nca³ me³-le⁴ je² xi³ nca³jco⁴-le⁴ xi³ ya⁴ tjin¹-le⁴ nca³nˀion¹ jin³sen¹. Je² ni¹ xi³ nca³jco⁴-le⁴ nai⁴² xi³ nta³jin³ xi³ ntˀai⁴-vi⁴ si¹xa¹jin³ cho⁴ta⁴ xi³ xi¹jin³. 3 Cˀoa⁴-ti⁴sˀin² tsa³qui³yo³coai⁴-jin⁴ yao³-na⁴jin⁴ nca³tsˀi³⁴-jin⁴ nca³sˀa⁴, jo³ tso² cjoa⁴tsjoa³-le⁴ yao³-na⁴jin⁴. Cˀoa⁴qui³nˀiain²⁴-jin⁴ to⁴jo³-sˀin² coan³me³-le⁴ yao³-na⁴jin⁴ cao⁴ cjoa⁴faˀai³tsjen³-na⁴jin⁴. To⁴xa¹ cjoan³ ni¹⁴jin⁴ cho⁴ta⁴ xi³ sˀe⁴-le⁴ cjoa⁴ñˀain³, jo³-ni³ tsa² xi³cˀa³. 4 To⁴nca³ Ni³na¹, nca⁴ cˀoa⁴-sˀin² to⁴tse³ cjoa⁴ma⁴ta³con² tjin¹-le⁴, cjai¹nca³ nˀion¹ coan³tsjoa³que³-na¹. 5 Nta³ tsa² ña¹ xi³ jo³-ni³ tsa² xi³ ti³yo³cˀen³² xi³ to⁴tˀa³tsˀe⁴ cjoa⁴tsˀen⁴-na¹, to⁴jnco³ cao⁴ Cristo qui³si³cˀe¹yo³con³-na¹. To⁴tˀa³tsˀe⁴ cjoa⁴nta³-le⁴ ji²tjo⁴ntjai²-nio³. 6 To⁴jnco³ qui³si³cja³ˀa¹ya³-na¹, cˀoa⁴-ti⁴sˀin² qui³si³ca³tio²tˀa³-na¹ ya⁴ ncˀa³jmi³ cao⁴ Cristo Jesús, 7 jme¹-ni³ nca³ je² ni⁴čhjin³ xi³ nčhoa¹-sa³ coa⁴co²-si¹ni³ je² cjoa⁴nta³-le⁴ xi³ li² to⁴jo³ xi³ cji³tse³, nca³ cˀoa⁴-sˀin² qui³sˀe³-le⁴ cjoa⁴ma⁴ta³con² tˀa³tsan⁴² nca³ ti³yo³coa⁴² Cristo Jesús. 8 To⁴tˀa³tsˀe⁴ cjoa⁴nta³ ji²tjo⁴ntjai²-nio³ nca³ ma³cjain¹-no³. A³li² je²-jin² xi³ tsaon⁴³ je²-vi⁴, nca⁴ cjoa⁴tjao² ni¹ xi³ Ni³na¹ tsjoa¹. 9 A³li² tˀa³tsˀe⁴ xa¹-jin², jme¹-ni³ nca³ ni⁴to⁴ˀya³-jin² xi³ cˀoa⁴sje³je³ya³-si¹ni³ yao³-le⁴. 10 Nca⁴ ña¹ nia¹ xa¹-le⁴ Ni³na¹. Ni³na¹ cˀoa⁴-sˀin² qui³si³nta³-na¹ nca³ ti³yo³coa⁴² Cristo Jesús, jme¹-ni³ nca³ nta³ si⁴xa¹-nia³² jña³-le⁴ xi³ Ni³na¹ to⁴nqui³-ni³ tsa³cˀe¹nta³ nca³ cˀoa⁴-sˀin² coi⁴ma³coa⁴² cjoa⁴-vi⁴.

11 Xi³ coi³, jon² xi³ cho⁴ta⁴ xi³ li² judío-jin² jo³ cjoan³ yao³-no³, cho⁴ta⁴ xi³ tsi² tsˀe⁴ cjoa⁴circuncisión tsa³cˀin²-no³. Cˀoa⁴qui³tso²-no³ je² cho⁴ta⁴ xi³ tsˀe⁴ cjoa⁴circuncisión xi³ je² ntsja³ cho⁴ta⁴ si¹nta³-ni³ yao³-le⁴. 12 Ti⁴cja³ˀai³tsjen³jion³ jo³-sˀin² nca³sˀa⁴ li²jme³ xi³ qui³sˀe³-no³ tˀa³tsˀe⁴ Cristo. Tˀa³xin² tsa³qui³yo³-lao⁴³ na⁴xi⁴na³nta¹-le⁴ Israel. Cho⁴ta⁴cja⁴ˀai¹ nio¹³ nca³ tsi² coan³-no³ ˀnte³ tˀa³tsˀe⁴ je² cjoa⁴ xi³ qui³sˀe³nˀion¹ xi³ Ni³na¹ qui³si³sˀe³nqui³. Li²jme³ xi³ qui³cho²ya³-lao⁴³ nca³ tsa³qui³yo³tˀa³xin²-lao⁴³ Ni³na¹ i⁴ son³ˀnte³-vi⁴. 13 Nca⁴ ti³yo³cao⁴³ Cristo jon² xi³ nca³sˀa⁴ cjai¹nca³ cjin³ ti³yo³, ntˀai⁴-vi⁴ je³coan³čhian³tˀao³ xi³ to⁴tˀa³tsˀe⁴ njin¹-le⁴ Cristo. 14 Ti⁴je²-ni³ xi³ qui³si³qui³njen³nchˀan¹ cjoa⁴ tˀa³tsan⁴². To⁴jnco³ qui³sˀin³-na¹ nca³ joa³². Qui³si³qui³xo²ya³ čhjao¹ xi³ jao²ya³ ma³-ni³na¹, xi³ coi³ cjoa⁴co²ntran⁴. 15 Cao⁴ yao³-le⁴ tsa³cja³ˀa¹xin² je² cjoa⁴co²ntran⁴, cˀoa⁴ je² cjoa⁴te¹xo³ma³ xi³ vˀe¹ne². Qui³si³nta³ya³cho⁴tse⁴ nca³ to⁴jnco³ coan³ nca³ jao² nca³ tjio¹cao⁴ Cristo. Cˀoa⁴-sˀin² qui³si³qui³njen³nchˀan¹jin³-le⁴. 16 To⁴tˀa³tsˀe⁴ cro² Cristo qui³si³cjao²nta³-ni³ Ni³na¹ cao⁴ xi³ jao²ya³ cho⁴ta⁴, nca³ to⁴jnco³ yao³ coan³ nca³ jao². Ti⁴ya⁴ tˀa³cro² qui³si³cha³jin³-ni³ cjoa⁴co²ntran⁴. 17 Ja³ˀai³ Jesús, qui³nchja⁴ya³ cjoa⁴ xi³ nchˀan¹ tjin¹. Qui³nchja⁴ya³jin³-no³ nca³ jon² xi³ cjin³ ti³yo³, cˀoa⁴ cao⁴ je² xi³ čhian³ tjio¹. 18 To⁴tˀa³tsˀe⁴-ni¹ ña¹ nca³ joa³² tjin¹-na¹ ˀnte³ nca³ cjoi³cho³chon³-le⁴² Nˀai³-na¹ xi³ to⁴tˀa³tsˀe⁴ to⁴jnco³ Espíritu Santo. 19 A³li²coi³ ti⁴cho⁴ta⁴cja⁴ˀai¹-nio³, ni⁴to⁴ti³ma³-jion²³. To⁴jnco³ na⁴xi⁴na³nta¹ vˀa³cao⁴-no³ cao⁴ cho⁴ta⁴-le⁴ Cristo, cˀoa⁴ xi²nqui⁴ mao³ cho⁴ta⁴-le⁴ Ni³na¹. 20 Cˀoa⁴-sˀin² jon² qui³sˀe³yo³son²ncˀao³ je² čhjao¹ja⁴ma⁴ xi³ je² pa²stro⁴ cao⁴ xi³ qui³nchja⁴ya³ tˀa³tsˀe⁴ Ni³na¹. Je² lao⁴ xi³ ti¹tjon² ti¹jna³ ya⁴ xi⁴nqui⁴-le⁴, ti⁴je²-ni³ Jesucristo. 21 Jo³-sˀin² cjio³ˀncho²-le⁴ xi¹ncjin¹ xi⁴ˀnte⁴, cˀoa⁴ tjio¹cjao²nˀion¹, cˀoa⁴-sˀin² ti¹mi³ jnco³ yo⁴nco⁴ xi³ tsje³. Cˀoa⁴ti⁴sˀin²ni³ ti³yo³cjao³cao⁴³ Nai³-na¹. 22 Cˀoa⁴-ti⁴ jon², nca³ ti³yo³cao⁴³ Nai³-na¹, cˀoa⁴-ti⁴sˀin² sˀe⁴cjao³nˀion¹ cao⁴ xi²nquio⁴³, jme¹-ni³ nca³ ntˀia³-le⁴ Ni³na¹ coan⁴-si¹nio³ to⁴tˀa³tsˀe⁴ je² Espíritu Santo.