GALESIYA
KUIMP TEPA IK KɄⱠ
Ya Buk Ei Nga Puⱡ Ei:
Ya buk ei, Kraist nga rapa tenda wamp kʉⱡ wi ropa tʉpa ronduⱡ mondʉk pilik, Jisas Kraist kʉn wei muⱡeing.
Ya Buk Ei Nam Ndi Rurum:
Ya buk ei, Pol ndi mon rurum.
Mon Ropa Nam Ngurum:
Ya buk ei, Pol ndi, mon ropa, Got nga ropa tenda ila wamp met Galesiya kona ila mormʉn kʉⱡ kʉn ropa ngurum.
Ui Nant Ila Rurum:
Ya buk ei Pol ndi, Andiyok kona ila moⱡpa rurum. Ei, Kraist metʉng ei kʉn, mbuldung orunga pana 57 (AD) ila mon kʉⱡ rurum.
Ik Ronduⱡ: Galesiya 5:1
Kraist ndi, tʉn kan ila pilinga ndurum uⱡ ei ndi, akup tʉn wei mormun. Enim uⱡ ei, pilik ronduⱡ mundʉk muⱡʉi! Jura wamp nga etmin uⱡ mbʉ ndi, enim kindmant indi nʉndangga mon!
IK PENG KɄⱠ
Rump
1:6-1:10 - Rʉnang ik ei, tenda mint tetʉm
1:11-1:23 - Got ndi, Pol wi ropa tʉpa nombuⱡa rung wu mundrum
2:1-2:10 - Pol kʉn, nombuⱡa rung wu kʉⱡ
2:11-2:14 - Pol ndi, Pita Andiyok kona ila ik ngurum
2:15-2:21 - Mondpa pili uⱡ ila mint Got ndi, wamp pora etpa tʉmba
3:1-3:14 - Mi ik ei kʉn, mondpa pili ik ei kʉn
3:15-3:20 - Mi ik kʉⱡ kʉn, Got nga nimba mʉi rurum ik ei kʉn
3:21-3:29 - Mi ik kʉⱡ etpa petʉm mel nant
4:8-4:20 - Pol, Galesiya wamp kʉⱡ nga numan ou ndupa pitim
4:21-4:31 - Amp Eikar kʉn, Sera raⱡ nga ik timan ei pilʉi!
5:1-5:15 - Kraist ndi, tʉn etpa wei mundrum ei mel muⱡmin
5:16-5:23 - Muⱡnga Wingti nga numan ei kʉn, wamp nga numan ei kʉn
6:1-6:10 - Angmʉn wamp mat nga mbun koma rundʉmʉn
6:11-6:18 - Rawe ik nimba pora ndurum
1
Na Pol, nombuⱡa rung wu mor ei, wamp ti ndi, tʉpa mundi nʉmʉndrʉm, muna wamp nga ronduⱡ ila kep mon ku. Got Tipam ei ndi, Jisas Kraist wamp kuⱡi uⱡ ila, etpa kont titim. Wu ei ndi, na etpa nombuⱡa rung wu ei mundrum. Na kʉn, na nga angmʉn mbʉ kʉn, rʉp rop moⱡpʉn, enim Got nga rapa tenda ila wamp mbʉ, met Galesiya kona ila mormin mbʉ kʉn, mon ropʉn ngunmʉn.
Got Wuta kʉn, Nuim Jisas Kraist raⱡ nga wamp poⱡ ti uⱡ mbʉ, wote numan wang ndui uⱡ mbʉ, enim kʉn omba piyangga!
Akup ui kit mbila, Kraist ndi, tʉn etpa tʉmba pilpa kʉn, Got Wuta nga numan pʉtʉm uⱡ ei teng ndupa, elim nga kʉng kʉⱡ wak ropa, tʉn nga uⱡ kit mbʉ nga mundpa kurum. Ei nga, Got nga mbi ou tʉpa, eng nomba tetʉm uⱡ ei mel, uⱡ nga kʉnt nga tepa mint pangga. Ei kupa.
Rʉnang Ik Ei Tenda Mint Tetʉm
Na enim nga orunga pilip, min ngun mundunt ei ka! Ti Kraist Jisas nga wamp poⱡ tʉtʉm uⱡ ila, Got ndi, enim wi ropa titim. Uⱡ ei, rʉk rʉk wak rok, enim ndi, rʉnang ik elpa kat ku pep ronmin. “Rʉnang ik elpa kat,” ti natʉtʉm mon. Wote na ndi, ei mel nʉnt ei nambuⱡ emel, wamp mat ndi, ruk molk Kraist nga Rʉnang Ik Kai ei, tʉk ropʉl rok, ik elpa ti mel nilingina, enim nga numan orunga rok mbuⱡ mbaⱡ endinmin. Wote tʉn kep, muⱡ kona anggelo ti kep, muna wamp nam ti rʉnang ik ei, tʉn unt nʉmp ngurmʉn ni mel ni nandpa, ik elpa ti mel mbo endʉm ndam, koⱡpa ndip kona ila mba ye! Tʉn unt nitmin ni mel, na ik ei aldpa nʉnt. Wote, wamp nam ti ndi, Rʉnang Ik ei, tʉn ndi, enim unt mbo inditmin ei mel kelpa, ik elpa ti mel nim wamp ei, koⱡpa ndip ila pangga!
10 Na akup ya ik nʉnt kʉⱡ, wamp mbʉ ndi, na kandʉk neing nʉmp nʉnt muna, Got etʉp kai mundimp pilip nʉnt nda? Wamp mbʉ ndi, na kandʉk neing nʉmp nʉnt ndam, na Kraist nga kongun kindmant wu kupa ti, muⱡi nambʉⱡʉmba, mon.
Got Ndi Pol Wi ropa Tʉpa Nombuⱡa Rung Wu Mundrum
11 Angmʉn, enim pileing nʉmp nʉnt ei, na Rʉnang Ik puⱡ nʉmp ngur kʉⱡ, wamp ti ndi, mim iti nʉtʉtʉm. 12 Wamp ti ndi kep, na nimba ngumba, wote mbo endpa uⱡ ti, iti nʉtʉtʉm mon ku. Jisas Kraist ndi, na nanim kun ik kʉⱡ tʉpa ora ndupa nguⱡnga tit.
13 Enim pʉtmin ni, na unt Jura wamp mbʉ atinga rormin uⱡ mbila pep rop kʉn, Got nga rapa tenda ila wamp mbʉ, rop etʉp kit mondʉp, ama ombil pendʉp rop wei ai indimp pilip it. 14 Jura wamp mbʉ, mbi paka rondʉk, namba uⱡ etʉng mbila, na nga wu peng tenda Jura wu mbʉ, tʉp akil ndup na kuimp ila mur. Na nga anda kouwʉmʉn kʉⱡ nga mbo uⱡ etʉng mbʉ, ronduⱡ mundʉp pep rur.
15-17 Wote, Got nga wamp poⱡ ti uⱡ ila, na unt mi nʉmi kʉn, na mbi ropa tʉpa, elim nga kongun indeimp nimba pitim. Wote ui ila nga, elim nga kangʉm ei, na tʉpa ora ndupa elinga, na ndi, elim nga Rʉnang Ik Kai ei, mbo wamp mbʉ, nʉmp ngeimp nimba pitim. Wamp ti ndi, na man ngeing nʉmp pi nʉpʉr mon ku, muna Jerusalem kona ila nombuⱡa rung wu kuimbal morung kʉⱡ, mbo kandʉp uⱡ ti, iti natʉt mon ku. Na Ereipiya kona ila tʉngʉnda mbo, wote Damaskas kona ila yant ur. 18 Pana raldika omba puⱡnga, na Jerusalem kona ila Pita kʉn ik mat pilimp nʉmp pur. Wote, na Pita kʉn moⱡmba rumbʉⱡ 14 omba purum. 19 Na ndi, nombuⱡa rung wu mat kʉni nʉkʉndʉr, Nuim ei nga ʉngʉn wu Jeims mendpʉⱡ kʉndʉr.
20 Ik ya enim kʉn mon rop ngunt kʉⱡ, Got nga kuimp keta ila, ik kupa kʉⱡ nʉmp ngunt, kol rop ni nanʉnt mon!
21 Wote akil tepa, na Siriya kʉn, Silisiya kona raⱡ ila pur. 22 Na pur ui ei kʉn, Juriya kona ila Kraist nga rapa tenda ila wamp, mormin kʉⱡ ndi, na kandʉk mbi ndui nandrʉng. 23 Wamp mat ndi, na nga puⱡ orunga timan rok nʉtʉng ik ila, na mendpʉⱡ pʉtʉng. “Wu ti unt tʉn ropa etpa kit mondpa, wote mondpa pili uⱡ ei, etpa kit mondrum wu ni ndi, akup mondpa pili uⱡ ei, elim ndi, mbo endnim,” nʉtʉng. 24 Got ndi, na kʉn namba uⱡ itim ei nga ik timan ei pilik, Got nga mbi ei paka rondrʉng.