JA NØKY MIDI JA PABLO TYANƗGAJX JA FILEMÓN
1
Yɨdeꞌen ja Pablo tnɨjayɨ ja Filemón
1-2 Øts ɨdøꞌøn Pabloꞌa̱jtp. Øts ya̱m tsumy ku nwɨndsønꞌa̱jtɨm yjaꞌ nbaduujnɨ. Ɨxya̱m mee nnɨjayɨ møøt yø Timoteo pøn jaty namyukɨdɨp jam mdøjkjotp, jøts nayɨdeꞌen øø nja̱ꞌmyech ja ndsøꞌ Apia jøts Arquipo midi nayɨdeꞌen tump sa̱m øts nduñ. Pa̱a̱ttɨ meets nɨdukɨꞌɨyɨ ja Dios Teety jøts ja nwɨndsønꞌa̱jtɨm Jesucristo kyunuuꞌkxɨn møøt ja yꞌøyꞌa̱jtɨn.
Sa̱ ja Filemón tjagyepy ja tsojkɨn ja paꞌayoꞌowɨn møøt ja Diosꞌajotꞌa̱jtɨn
Ku øts ja Dios nꞌajotꞌaty nxumɨkajxajkpy øts ja Dios ku me nja̱ꞌmyech, jaꞌagøjxp ku tø nnɨja̱wɨ ku mets nayɨdeꞌen xtsojkɨ ja nwɨndsønꞌa̱jtɨm Jesús yjaꞌ, jøts pøn jaty ja janchja̱ꞌwɨyɨp. Nꞌamɨdøøpy øts ja Dios jøts tja̱ꞌgyukɨyɨdɨt yikxon ja yꞌøyꞌa̱jtɨn midi nba̱a̱jtyɨndɨp ku njanchja̱ꞌwaꞌandɨ ja nwɨndsønꞌa̱jtɨm. Waꞌnts tum jadeꞌen ttundɨ, pønɨ sa̱ tø xukmadøy pøn jaty tø tpabøktɨ. Janch jotkujk øts ɨxya̱m ku nmadøy ku xpaꞌayøy ja mmɨguꞌuk jøts xka̱jpxjotꞌamøkɨ, jøts jadeꞌen xyikjotkujkꞌaty.
Ku Pablo tꞌamɨdøy ja mayꞌa̱jtɨn jøts yikupøkt jadɨgojk ja Onésimo
Øy øts ja Cristo kyutujk nayɨdeꞌen njamøøtꞌaty jøts me nꞌanaꞌamt pønɨ ti jaty mduꞌump, kaꞌats mets ɨxya̱m nꞌanaꞌamwa̱ꞌa̱ñ jaꞌagøjxp øts ɨxya̱m mɨguꞌukꞌa̱jtɨngøjxp tuꞌuk ja mayꞌa̱jt nꞌamɨdoowa̱ꞌa̱ñ. Møja̱a̱ꞌñɨp øts ɨxya̱m jøts tsumyɨm nꞌity nwɨndsønꞌa̱jtɨmgøjxp, 10 paty mets nꞌamɨdøy ja mayꞌa̱jtɨn jøts xkupøkt jadɨgojk ja Onésimo midi øts ya̱m tø ndukja̱ꞌgyukɨ ja Dios yjaꞌ.
11 Ku ojts jawyeen nmøøtsɨna̱a̱y yø Onésimo, kaꞌap øy yꞌijty ti tꞌødyuñ. Nꞌajotꞌa̱jtnaꞌamp ɨxya̱m 12 paty ndanɨguexy jadɨgojk jøts xkupøkt, ¿kidits øts jeexyɨp xkupiky? 13 Jadeꞌen ø njatsøkyꞌaty jøts ja ya̱m jeexyɨp tyañ, jøts øts ja jeexyɨp xpudøkɨ sa̱m mets jeexyɨp køꞌøm xpudøkɨ. 14 Ɨxya̱mts mets ja ndanɨguexy jaꞌagøjxp ku kaꞌap mɨba̱a̱t ja mgutujk njɨna̱jxɨt, jabɨ yɨdeꞌenxɨ njawa̱ꞌa̱ñ pønɨ xunwa̱jnɨp meets ja mayꞌa̱jtɨn, kaꞌap ja xuꞌunt anaꞌamɨngøjxp, mgøꞌømdsojkɨngøjxp ɨdøꞌøn ja xuꞌunt. 15 Pø jaꞌagøjxp ɨdøꞌøn ja ojts chøøñ jøts ja mnɨwɨmbetɨyɨt jadɨgojk xemɨkøjxp, 16 jɨts kaꞌap jadeꞌen xꞌukyiktunɨt ejxɨm jɨyujkɨn, jadeꞌen xja̱wɨt ejxɨm nꞌuchɨn ejxɨm nmɨguꞌukɨn. Njanchpaꞌayøøpy øts yøꞌ, jawaanɨ møk mets yø xpaꞌayoꞌot, kaꞌ nugo ja̱a̱ꞌy xꞌext, jadeꞌen xꞌext sa̱m adømɨn, tøxɨ tpabiky ja nwɨndsønꞌa̱jtɨm yjaꞌ.
17 Paty ø nwa̱ꞌa̱ñ, pønɨ xmɨguꞌukja̱ꞌwɨp øts, kupøk ejxɨm øts jeexyɨp xkupiky. 18 Pønɨ tø mmɨdundɨgøyɨ, uk japts mmɨyojɨyɨ, øts ja ngubajtkøjxp. 19 Køꞌøm øts ɨxya̱m nwa̱ꞌa̱ñ jøts ngubajtkøxt ja yoj, paty ø køꞌøm ndyimyja̱ꞌa̱y; kaꞌ yja̱wɨ njadukja̱ꞌmyajtswa̱ꞌa̱ñ ku me tø mnañɨtoꞌjknɨyɨ. Kidim xjanchja̱ꞌwɨñɨ, taxiꞌiky yøꞌ. 20 Sa̱m ø nwa̱ꞌa̱ñ, tun waanɨ ja mayꞌa̱jt jøts ø xyikjotkujkꞌa̱tt jaꞌagøjxp ku tuꞌugyɨ njanchja̱ꞌwɨndɨ ja nwɨndsønꞌa̱jtɨm.
21 Nnajtsja̱ꞌwɨp øts ku xpadungøxt sa̱ jaty øts ɨxya̱m nwa̱ꞌa̱ñ. 22 Jøts nayɨdeꞌen xꞌawejxtɨp øts; jotmøñ mee nnɨnijkxy sa̱ jam ja Dios xꞌamɨdowdɨ.
Ku ja Pablo tꞌukya̱jknɨ ja ka̱jpxpooꞌkxɨn jøts ja kunuuꞌkxɨn
23 Nayɨdeꞌen mdanɨguexyɨdɨ ja ka̱jpxpooꞌkxɨn ja Epafras, pøn øts ɨxya̱m møøt ndsumchøønɨ nwɨndsønꞌa̱jtɨmgøjxp. 24 Nayɨ kyajxtɨp ja ka̱jpxpooꞌkxɨn ja Marcos, møøt ja Aristarco, møøt ja Demas jøts ja Lucas, midi øts xpudøjkɨdɨp.
25 Mba̱a̱jtɨdɨp ja nwɨndsønꞌa̱jtɨm Jesucristo kyunuuꞌkxɨn ja yꞌøyꞌa̱jtɨn. Jadeꞌen ɨdøꞌøn ja yja̱tt.