EVANELIA LUKA
1
Lohia taumu Teofilo e: hutuma ese ta abi dae herevadia vada e tore, matadia amo e ita bona matamana amo e harorolai taudia ese e henidava heḡereḡerena; taunabunai lau danu hereva iboudiai vada na tahu ḡoevaḡoeva, matamana amo, bena na tomamu namona binai, lau ma baina tore lou oiemu. Vada ba diba, e hadibamuiva herevadia be momomo-kakani.
Sakaria bona Elisabeta
Herod ese Iudea e lohiaiava negana ai, hahelaḡa tauna ta e nohova, ladana na Sakaria, Abia ena orea tauna. Adavana be Aaron ena iduhu hahinena, ladana na Elisabeta. Idia raruosi na kara maoromaoro taudia Dirava vairanai, Lohiabada ena taravatu bona ena haheḡani iboudiai e badinava, asi toutoudia. A raruosi na asi natudia, Elisabeta e gabani dainai, bona raruosi vada e buruka.
Sakaria ese hahelaḡa karadia e karava Dirava vairanai, ena orea taudia edia nega ai. Bena edia kara heḡereḡerena ai ia vada e abia hidi, gabu helaḡana lalonai muramura mai bonana baine gabua; taunabunai ia na e raka vareai muramura igabuna totona, 10 a taunimanima iboudiai na murimuri ai e noho, e ḡuriḡuri. 11 Una negana ai, ia ese Lohiabada ena aneru ta e itaia, muramura mai bonana patana idibana kahana ai e gini. 12 Sakaria ese e itaia, bena kudouna e hetaha, bona gari ese e butua tao. 13 A aneru ese e hereva henia, eto, Sakaria, asio gari, badina be emu ḡuriḡuri vada e kamonai, adavamu Elisabeta ese natumu ta do baine abia, ladana ba hatoa IOANE. 14 Ba moale, ba moale hisi dae, hutuma danu ia baine vara dainai bae moale. 15 Badina be Lohiabada vairanai ia na baine herea; ia ese vine ranuna bona kekero muramuradia basine inu, bona dounu sinana bogana ai na Lauma Helaga ese baine rohea. 16 Ia ese Israel memerodia hutuma baine hakerehaidia, Lohiabada, edia Dirava, bae lou henia; 17 bona Lohiabada vairanai baine raka, Elia ena kara bona ena siahu heḡereḡerena. Tamadia lalodia natudia laloda ida baine hatamonadia; gwau-edeede taudia aonega baine henidia, kara maoromaoro taudia ai baela; bona bese ta baine abia heḡaeḡae, Lohiabada ena.
18 Sakaria ese hari aneru e hamaoroa, eto, Ina na ede baina diba toma? Lau na iahu; adavagu danu vada e buruka.
19 Aneru e helada hato, eto, Lau na Gabriel, Dirava vairanai na gini; ihereva-henimu bona ina harina namona ihamaorolaimu totona e siaigu. 20 Benaini, vada ba mu, basio hereva diba, ela bona ina hereva anina baine vara dinana, badina be egu hereva na tome abia dae; to, ena nega korikori ai do baine momokani.
21 Taunimanima ese Sakaria e naria mase, bena e hoa, badina be gabu helaḡana ai e halahe. 22 Bena e raka lasi ai na asi hereva dibana. Bena lalodia e parara, ia na gabu helaḡana ai vada e mata hanai. Bena ia ese toa amo e hadibadia, vada e mu.
23 Ena ḡaukara dinadia e haḡuḡuru, bena ena ruma korikori ela. 24 Gabeamo, ia adavana Elisabeta vada e rogorogo, bena hua ima e noho hehuni; 25 eto, Lohiabada ese ini vada e karagu toma, ena ura negana vada eme haḡeregu, egu hemarai taunimanima vairadiai vada eme abia oho.
Maria
26 Hua ihatauratoina, Dirava ese aneru ladana Gabriel e siaia, Galilea hanuana ta ladana Nasaret ela. 27 Haneulato ta be unuseni ai, ia na David ena iduhu tauna ta, ladana losef, maohenina; haneulato ladana be Maria. 28 Aneru na ia dekenai e raka vareai, eto, Ba mauri, e lalokau henimumu hahinemu! Lohiabada ese baine bamomu. 29 Una hereva dainai ia na kudouna e hetaha, bona lalona e haguhi, una hahenamo anina be dahaka. 30 A aneru ese e hamaoroa, eto, Maria e, asio gari, badina be Dirava ena harihari ome abia. 31 Oi na do ba rogorogo, mero ta bavabia, ladana ba hatoa IESU. 32 Ia na baine herea dae, Herea Mikamika Natuna bae gwauraia; Lohiabada Dirava ese tamana David ena terono na baine henia; 33 Iakob ena iduhu baine halohiaia hanaihanai; ena basileia na basine doko.
34 Maria ese aneru e hamaoroa, eto, Lau na tau asi dibagu, ina be ede baine vara toma?
35 Bena aneru na e haere, eto, Lauma Helaḡa na latamu ai baine diho, bona Herea Mikamika ena siahu ese baine hakerukerumu; bena oiemu amo baine vara merona helaḡana na Dirava Natuna bae gwauraia. 36 Ba diba danu, oi varavaramu Elisabeta na burukana ai vada e rogorogo; gabani e gwauraia, to ena hua ihatauratoina binai. 37 Badina be Dirava na ḡau iboudiai ikaradia mai dibana.
38 Maria eto, Lau na Lohiabada ena hesiai hahinegu; emu hereva heḡereḡerena ai egu ai baine vara.
Bena aneru na iena amo e raka oho.
Maria Elisabeta ida
39 Unu dinadia ai Maria e tore isi, e raka haraḡa Iuda ororodia hanuana ta ela, 40 Sakaria ena ruma ai e dae Elisabeta e hanamoa. 41 Elisabeta ese Maria ena hahenamo herevana e kamonai negana ai na natuna na bogana ai vada e marere; bona Elisabeta na Lauma Helaḡa ese a rohea. 42 Bena e hereva badabada, eto, Hahine iboudiai bogaragidiai oi mo sibomu namo herea, bona bogamu anina danu namo herea. 43 Egu namo be dahaka bena egu Lohiabada sinana dekegu vada ema? 44 Badina be emu hahenamo mamina na taiagu ai e vareai negana ai na natugu na bogagu ai e marere, moale dainai. 45 Abidadama hahinemu, vada o namo; badina be Lohiabada ena amo o kamonai herevadia do bae momokani.
Maria ena moale anena
46 Bena Maria eto,
Lau lalogu ese Lohiabada eme imodaia,
47 Bona laumagu ese danu ihamaurigu Diravana eme moalelaia;
48 Badina be ia ese ena hesiai hahinena ogoḡamina e haḡerea,
Taunabunai ini amo uru iboudiai ese bae hanamogu;
49 Badina be Siahu Diravana ese hoa karadia egu ai eme havara;
Ia Iadana na Helaḡa.
50 Ena hebogahisi na uru uru idoidiai
Ia garina e garimu taudia latadiai.
51 Ia imana ese ena goada vada e hahedinaraia:
Lalodia e hekokoroku taudia ia ese e hakarohodia,
52 Bona Iohia na edia helai ḡaudia amo ia ese vada e dolidia dobi,
A ogoḡami taudia ia ese vada e abidia isi;
53 Hitolo taudia ia ese ḡau namodia amo bogadia vada e hakunu,
A taḡa taudia ia ese ima kavakavadia e haloudia.
54 Ena hesiai besena Israel ia ese vada e kahaia,
Ena hebogahisi vada e helalolaia une,
55 Seneda e gwau henidia hamata heḡereḡerena,
Abraham mai garana ida do baine bogadia hisi hanaihanai eto.
56 Bena Maria na Elisabeta ida e nohova hua toi, gabeamo ena ruma e lou henia.
Elisabeta e mara
57 Elisabeta ena mara neganla e gini dae, mero ta vada e abia. 58 Bena dekena taudia bona varavarana ese Lohiabada ena harihari-bada ienai vada e vara harina e kamonai, idia na ia ida e moale hebou. 59 Dina ihataurahanina ai, idia na mero iperitomena totona e hebou, bena ladana bae hatoa Sakaria, tamana baine nemaia eto. 60 To sinana e haere, eto, Lasi, ia ladana na Ioane. 61 Idia eto, Be, una na emu iduhu tauna ta ladana a? 62 Bena idia ese tamana matadia ai e kunumaia, mero ladana ede bae hatoa toma. 63 Ia ese toretore ḡauna ta e gwauraia, bena ini e torea toma: ia ladana be Ioane. 64 Una negana ai uduna e haḡaia, malana danu e maoro, bena e hereva, Dirava e imodaia. 65 Taunabunai, dekedia taudia iboudiai na gari ese e butudia tao; bona unu kara haridia na Iudea ororodia hanuadia iboudiai lalodiai vada e piua. 66 Bena e kamonai taudia iboudiai e lalo tao; eto, Ina mero na ede baine heto? Badina be Lohiabada imana na ia latanai.
Sakaria ena moale anena
67 Lauma Helaḡa ese mero tamana Sakaria e rohea, bena e haroro, eto,
68 Lohiabada, Israel ena Dirava, aita hanamoa,
Badina be ia ese ena bese taudia vada e vadivadidia bona vada e hamauridia.
69 Hahemauri badina ia ese vada e havaraia ita eda,
Ena hesiai tauna David ena iduhu amo,
70 Ena peroveta taudia helaḡadia ududia amo e gwaurai herevadia na heto,
Tanobada matamana amo ema hari;
71 Inaida bona e badu henidamu taudia imadia amo
Ia ese baine hamaurida.
72 Tubuda tamada e bogadia hisi;
Ena gwauhamata helaḡana e laloa tao;
73 Ita seneda Abraham e gwau henia hamata,
74 Ita inaida amo baine hamaurida eto,
Bena isiaina baita lao henia, asi eda gari,
75 Mai helaḡada bona mai maoromaoroda ida ia vairanai baita raka,
Eda mauri dinadia iboudiai.
76 Natugu e, oi danu Herea Mikamika ena peroveta tauna bae gwauraimu,
Badina be oi na Lohiabada vairanai do ba raka,
Ena dala ba lailaia.
77 Mauri dalana oi ese ena bese ba hadibalaidia,
Edia dika igwau-taodia,
78 Iseda Dirava ena hebogahisi dainai,
Daba e rotoa na heto, atai amo bainema, baine igoda ita;
79 Dibura ai bona mase laulauna ai e nohomu taudia baine hadiaridia,
Bona ita aeda maino dalana ai baine hakaudia.
80 Bena hari mero na e bada oho bada oho, bona lalona e goada; bona tano ḡaḡaena ai e nohova ema bona Israel ediai e hedinarai dinana.