PAULO ENA REVAREVA
FILIPI
TAUDIA EDIA
1
Paulo bona Timoteo, ai Iesu Keriso ena hesiai taumai, ese umui Keriso Iesu ena helaḡa taumui iboumui ai Filipi ai o nohomu, bona heitatao taumui bona diakono taumui, a tore henimuimu: harihari-bada bona maino, Tamada Dirava ena amo bona Lohiabada Iesu Keriso ena amo, bavabi.
Hahenamo herevadia
Na lalomuimu negadia iboudiai egu Dirava na hanamoamu; bona umui daimui ai na noinoimu negadia iboudiai, na ḡuriḡurimu mai moalegu ida; badina be lalomui ai o matamaia dinana ema bona hari, sivarai namo ḡaukarana ai o kahagu dainai. Badina be dibagu kara namo lalomui ai e matamaia Diravana ese baine haḡuḡurua, ela bona Iesu Keriso ena dina.
Umui iboumui ai ini na lalomui tomamu na maoro, badina be lalogu ai na lalomui taomu; dibura rumana ai na nohomu ai bona sivarai namo na gwauraiamu ma na hamomokaniamu ai, umui bona lau harihari-bada tame abia hebou. Dirava hari dibana, Keriso Iesu ena hebogahisi ai umui iboumui ai na ura henimui lalo-dikamu. Egu noinoi binai: emui uraheni baine vara badabada mai diarina bona mai aonegana ida; 10 bena ḡau namodia toadia ba diba, bona ba noho mai ḡoevamui, asi bebeka-bebekamui, ela bona Keriso ena dina. 11 Kara maoromaoro huahuadia ai ba honu; idia na Iesu Keriso ena amo e maimu, Dirava iheatolaina bona ihanamona totona.
Egu noho
12 Varavaragu e, na uramu ba diba, egu ai e vara ḡaudia na sivarai namo ihapere-rohorohona ḡaudia ai vada ela. 13 Ḡaubada ena hegima oreana idoinai bona taunimanima iboudiai gabu idau-idau ai danu dibadia lau na Keriso dainai dibura rumana ai na nohomu; 14 bona varavaragu na gwauraidiamu taudia na lau iḡuigu dainai lalodia eme goada Lohiabada lalonai, bena Dirava ena hereva e gwauraiamu mai goadadia ida, asie garimu. 15 Momokani, haida ese Keriso na vaḡeḡe ai bona heai ai e harorolaiamu; a haida be lalo-namo ai e harorolaiamu. 16 Ini idia na uraheni dainai e haroromu; dibadia lau na sivarai namo ihamomokanina dainai na ginimu. 17 Unu idia na heiri-heiri dainai e haroromu, dia lalodia amo; dibura rumana ai na nohomu ai egu hisihisi bae habadaia e tomamu. 18 Herevana! Dibaka ai eiava momokani ai Keriso e harorolaiamu; una dainai na moalemu.
19 Oibe, bona baina moale. Badina be lau dibagu ini amo hahemauri baina abia, emui noinoi daidiai, bona Iesu Keriso ena Lauma ena hekaha dainai. 20 Egu ura bada bona egu helaro bini: ḡau ta ai basina hemarai, a nega idoidiai heḡereḡeredia harihari danu baina goada mo; bona maurigu ai eiava masegu ai lau taugu ese Iesu baine imodaia. 21 Badina be lauegu ai mauri be Keriso, a mase amo ḡau namo-hereana baina davaria. 22 A taugu ai bama mauri noho, egu ḡaukara anina bama itaia; una dainai asi dibagu edena baina abia hidi. 23 Egu ura na rua; na daradaramu. Na ura badamu Keriso dekena bainala; una bema namo herea. 24 To umui daimui ai taugu ai baina noho baine namo. 25 Una na dibagu; bena na laloamu do baina noho, umui ida baita noho hebou, emui abidadama bona emui moale ihabadana. 26 Taunabunai, Keriso Iesu lalonai emui heaḡi baine bada, badina be lau na umui dekemui ai dainai.
Emui noho
27 Ḡau tamona, Keriso ena sivarai namo ihaheḡereḡerena karadia mo ba kara; bena baina vasi itamui eiava dauhai mo harimui baina kamonai, lau baina diba umui na lalo tamona ai o gini tutuka-tutukamu, bona ura tamona ai sivarai namo ikamonai-henina o goadalaiamu. 28 E inai henimuimu taudia na garidia basio gari; una na idia edia mase toana, a umui emui ai Dirava ena hahemauri toana. 29 Vada e henimui hariharina binai: dia Keriso iabiabiraina mo, a hisi ianina danu ia dainai. 30 Emui tuari be o itaguva na goadalaiava bona o kamonaimu doini na goadalaiamu tuarina.