3
Epen nagahapifa Kraisi, usiꞌin endilisi
Ipaꞌ alipipai, aeꞌ aꞌi iꞌi basef aeꞌafi hiꞌilif naꞌamba. Ipaꞌ sonendahepa ma Dembinai. Aeꞌ ina okom nimanima endaꞌ basef ifimba atif dokoꞌ aliꞌ agaꞌipasafi, owaꞌ. Ifimba fegalaꞌambemepa ma amam awami.* Sam 22:16,20; Re 22:15; Fl 2:18
Ipaꞌ solawaipa ma amam amamba mandaꞌ waf awafii siꞌi nombagw alupumii. Amom maꞌi miꞌipipa dindinipa mohondoꞌ ukup ipeꞌipi pegatopaꞌ alop ipeꞌipi ma pigaila muꞌuli fowaꞌ God nagasoꞌ Mosesani.* Ro 2:29 God atona nandandepapa mape ananipai. Ambal buꞌunai Godi atona deiꞌ mandaꞌ lotumana mafela agol Jisas Kraisi atogol. Apaꞌ ina mahapifa waf sagatopaꞌ alopafi fegatopalopapa, owaꞌatin.* 2 Ko 11:18,21 Anis epes Juda ukup paꞌi, “Apaꞌ Juda epes buꞌupai mandaꞌ waf apeꞌifi hiafi andeandeꞌ datima siꞌi magatopaꞌ alopafi.” Apaꞌ owaꞌ, aeꞌ ikilaꞌasa waf afambai. Aeꞌ Judaiwai endilisi.* Lu 1:59; Ro 11:1; 2 Ko 11:22; Ap 23:6 Deiꞌ main, nemaf afamba ataꞌ saꞌowe agape nimaguf 8-pelaif fagaleꞌe amom matopaꞌ alop aeꞌapi. Aeꞌ epen Israeliwai. Aeꞌ wambota Benjamini. Aeꞌ esimbel atembel esis Hibrui. Aeꞌ Farisi, epen agaila muꞌuli Godi fowaꞌ nagasoꞌ Mosesani. Aeꞌ aila muꞌuli inimba datima ikilaꞌ hiasi.* Ap 8:3 Aeꞌ okom mohafel banagem aꞌowaꞌ ma andaꞌ maol Godi. Fowaꞌ andaꞌ maola agaha esis sios amam nematawa Kristen. Iꞌi epes sowaloge ma waf agaila muꞌuli inimbafi, aeꞌ kofagema ake.* Mt 13:44,46 Apaꞌ aeꞌ okom mandandaꞌma Krais atona eaꞌ aꞌi hiahaom amamba hiami aliꞌ andaꞌami, amamba falafumi atom.* Ro 3:21-22 8-9 Aeꞌ ina aꞌi hiahaom amamba atom, owaꞌatin. Aeꞌ okom mandandaꞌ ma Jisas Krais atona Dembinai aeꞌanai ma hiahaom hiami aliꞌ andaꞌami. Gawa inimba endilisini nikilaꞌ. Eaꞌ ewaꞌ alafugama hiahaom amamba hiꞌalam aꞌi falafumi atom siꞌi alapita. Ahapila Krais atona tatalaꞌina, ape sisihiwi ma anen. Aeꞌ andaiwaꞌma egefaꞌ agol agalemba aman boꞌowe hililiꞌi ma muꞌuli esis Juda sagailani, owaꞌ. Aꞌi efaꞌ agol usiꞌigili ma waf naꞌambaifi. Aeꞌ ahapifa Krais deiꞌ God naꞌi aeꞌ aman buꞌuwai hililiꞌi.* Ro 6:3-5; Ro 8:17; Ga 6:17 10 Aeꞌ aꞌi egawa Krais endilisi noloma banagami God nasaꞌmana nogosafelami. Aeꞌ aꞌi elomana ondaoꞌoma ma waf afamba ogofaꞌ akafimi ma igahapila nomonas atifis isimba siꞌi anen okom magapomas nemaf afamba nagagaꞌafi.* Ap 4:2; Re 20:5-6 11 Aeꞌ aꞌi endaꞌas naꞌamba ma anaf God nogosaꞌme wapani wandof.* 1 Ti 6:12,19; Ap 9:5-6
Pol nasagih totol mehip nafeꞌ nataga alol
12 Aeꞌ ina okom mandandaꞌ aꞌi aꞌ efaꞌ waf afamba Kraisi hiꞌalaf ape boꞌowe hililiꞌ, ataꞌ owaꞌ. Deiꞌ ape sisihiwi ahapila waf afambai tatalaꞌif. Deiꞌ main? Anen nofale nandandepe ma egape ananiwai siꞌiwi. 13 Ipaꞌ alipipai, aeꞌ ina aꞌ okom mandandaꞌ aꞌi efaꞌ waf afambai eaꞌ, ataꞌ owaꞌ. Ahapila okom atotom naꞌamba. Okom maseꞌe hiahaom hiami fowaꞌimi maloma hiahawes fowaꞌ sagatagamai eaꞌ deiꞌ andaꞌ maol banagambela egefaꞌ hiahaom anafimi siꞌi epen nasagih mehipa nigikilaꞌ.* 1 Ko 9:24 14 Aeꞌ asagih mehip totol etaga alola egefaꞌ agola waf buꞌwafi. Isimba naꞌamba. Krais Jisas nandaꞌ maol buꞌwani natopalope ape sisihiwima anen. Deiꞌ God nofale ma efeꞌ egape lifilafi heven.* 1 Ko 2:6 15 Apaꞌ hiapai mahapila ukup pagataga siꞌi epes eaꞌ dambesi ma waf buꞌwafi, apaꞌ aꞌ ukup pendafeꞌ atifipa basef ifiꞌi aliꞌ andaꞌafi. Ama iꞌi ipaꞌ anis nomonas daiasa, bola God nisindiꞌamona ukup ipeꞌipi wapani.* Ga 6:16 16 Apaꞌ mondape naꞌamba. Waf buꞌwafi mogofaꞌaf eaꞌi, afamba mondahapilaf sisihif.* 1 Ko 4:16; 1 Te 1:7; 1 Pi 5:3
17 Alipipai, ipaꞌ hipai pindaila waf aeꞌafi. Eaꞌ pendandepas andeandeꞌ epes sagaila waf afaꞌifii ma pigailas.* 1 Ko 1:23; Ga 6:12 18 Nimaguf hiafi aꞌipipa basef ifimba ma bousi Kraisi eaꞌ. Deiꞌ naꞌamba atin aꞌipipaef wapani aloma embif fetah naep aeꞌapi. Epes hiasi saila waf awafi eaꞌ sataga bousi ma basef buꞌwafi Krais nagagaꞌ lawag usiꞌigai tiꞌwanaegai.* Ro 16:18; Ro 8:5-6 19 Ukup asasipi pagapoma alop atona asasinai amamba siꞌi god asasinai. Esis saꞌi esis atis agufisi sandagala ma waf naninani aunai ambagof awagufunai. Eaꞌ ukup pandapoma hiahaom itapami atom. Epes isimba anaf higililas wambel awambili hel.* Ef 2:6,19 20 Apaꞌ mape amam nematawa ilifapai, wambel apeꞌimbili heven. Eaꞌ mape mohafa Dembinai Jisas Krais anaf nokwaha heven nisilaꞌi ma nofaꞌapa mogatambel.* Ro 8:29; 1 Ko 15:28; 1 Ko 15:43-53 21 Anaf nondomba alop anaꞌe apeꞌinai aꞌ notaga boꞌona nogalaꞌ gambigambis aꞌowaꞌ siꞌi alop ananipi. Anen nondaꞌama banagami ananimi atom. Banagami amamba nondaꞌ hiahaom hiami mofeꞌ mogape lafela anen atona.

*3:1: Sam 22:16,20; Re 22:15; Fl 2:18

*3:2: Ro 2:29

*3:3: 2 Ko 11:18,21

*3:4: Lu 1:59; Ro 11:1; 2 Ko 11:22; Ap 23:6

*3:5: Ap 8:3

*3:6: Mt 13:44,46

*3:7: Ro 3:21-22

*3:8-9: Ro 6:3-5; Ro 8:17; Ga 6:17

*3:10: Ap 4:2; Re 20:5-6

*3:11: 1 Ti 6:12,19; Ap 9:5-6

*3:13: 1 Ko 9:24

*3:14: 1 Ko 2:6

*3:15: Ga 6:16

*3:16: 1 Ko 4:16; 1 Te 1:7; 1 Pi 5:3

*3:17: 1 Ko 1:23; Ga 6:12

*3:18: Ro 16:18; Ro 8:5-6

*3:19: Ef 2:6,19

*3:20: Ro 8:29; 1 Ko 15:28; 1 Ko 15:43-53