Aneꞌ Keneꞌka-naneꞌ
JOONIE
Daarivuuꞌnaneꞌ
Kumponing Bakaang Kara Pinkaꞌampiri Oovunaꞌ Kareaamaing Beiꞌbeiꞌarampiai
1
(1:1-13)
Aung aneꞌ karavoto˜ ninge dootuuꞌkoo urantai daariamang daꞌ eeꞌnani ovorinaang Kumponinge miruꞌduuꞌnani-anko eeꞌnoko teing daurukaaꞌ.* Ani ovorinaang nani masikani deeaꞌ pa. Navitu dootuuꞌnavitu miruꞌui teeꞌ daarivuuꞌ deeꞌma, baurukaaꞌ teing dootuuꞌnupoong miruꞌui. Diiꞌdovo tevo ninge aaꞌnaꞌ masikaꞌ piaarampimanavo eeꞌnoko ning narunge deeaꞌ, teka teing nariꞌ tee kara masikung noruꞌaining, aiꞌ tee kara masikung niiꞌ ookara-koo dupui otomaung eeꞌnoko teeꞌ nariꞌ niiꞌ ninka otomatoai ookara doong-koo.
Teie Kumponing Niumai tee ninka Bauring Jiisuuꞌ Karistooꞌ ninka aaꞌning oko-antamaariaing: biraanke mooꞌdopa, piaa unaa-anta, eeꞌnoko mooa, tee ninka kara masikung eeꞌnoko tee aarumo piaa.
Piaa Masikung Siompampimatoai
Ning tee bakei dotumaramang ninge ooaramira niiꞌning teing-koo daurukaaꞌkoo tampaꞌ siompaako tee kara masikung, teeꞌ eeꞌnaꞌ nariꞌ Niumai botomuruꞌnaꞌ. Eeꞌnoko enang tee aaꞌdamaang daꞌ eeꞌnani, niiꞌ ookara narunaꞌ narunaꞌ piaameerimatoai. Aung tee nerakung boto deeaꞌ daꞌ daarireromaatomaung, teka tee aung tee boto tutuntoma-ita otoꞌmemurimaung: Narunaꞌ narunaꞌ piaameeriaing. Kumponing-koo piaa eeꞌ siraꞌkoo makosi: Niiꞌke teeꞌ nkoampiaing tee kapooꞌ naumurimaung. Eeꞌnoko teie tee niiꞌ tutuntoma-ita narunaꞌ narunaꞌ piaameerimatooꞌnaang naumuruꞌ.
Karistooꞌ Bakaang Kara Tampaꞌ Pinkaꞌampiaing
Bakei, mmauꞌ nantoong tosi nkonuka aunge kansiꞌke avitoitoi nanaamaung, teing tanaꞌeriko penkemparima aaꞌpaamaing, “A, tee Jiisuuꞌ Karistooꞌ naning-naumpui poaruuꞌnung.” Teing teing eeꞌning tosi nkonuka eeꞌnoko Karistooꞌkoo tooꞌde-nupoonge teing. Tarerariri otoriai tee kapooꞌ poreꞌdorimaung nkaveriaruꞌneenga, aaꞌnaꞌ teka ootukuarioꞌ tee mooꞌ nkaveriai. Baa tee naning Karistooꞌ bakaang naunau divuꞌui niiꞌnung siompumaung tee Kumponing bakaning-koo narung deeaꞌ, teka baa tee naning tee kara pinkaꞌui otoing tee, tee tekang ookakang beekaning-koo narung deempari otong aaꞌnoko Bauma eeꞌnoko tee Bauring. 10 Niiꞌnung naning oovunamuriiꞌ naunau ninka diiꞌanko poko deekoꞌ diikanooꞌ pava-koo bokueriaukaꞌ, eeꞌnoko onkeonkeꞌeriaukaꞌ. 11 Baa tee naning tee onkeonkeꞌuaing tee, tee bakaang orakaꞌ nko-koo kantoꞌparamaung.
Jooni Teing Oo-koo Piavouꞌnaꞌ
12 Ning tee kapooꞌnanka mmauꞌ diiꞌ daarirerompipeuꞌning otoꞌmemung, teka ninge teing ookara aneꞌkoo daari-koo piamoaꞌ. Teka eeꞌ noruꞌamaang diiꞌanko pa dueꞌka mora oing oomeeri karompiaing doturotue maantoꞌmuriainaꞌ. 13 Teinge toireꞌke teni daꞌmaikoꞌ Kumponinge miruꞌuuꞌnani baurukaaꞌke tampaꞌ tang daꞌanko botoaamang. Otoko, ee.

*1:1: Ani ovorinaang nani masikani deeaꞌ pa. Navitu dootuuꞌnavitu miruꞌui teeꞌ daarivuuꞌ deeꞌma, baurukaaꞌ teing dootuuꞌnupoong miruꞌui.