Aneꞌ
PILEMONI
Paulaꞌke Daarievuuꞌnaneꞌ
Paulaꞌke Pilemoni Pia-antavuuꞌnaꞌ Onesimas Tontaꞌanta-koo
1
(1:1-25)
Aung aneꞌ karavoto˜ ninge Paulaꞌke daariamang anke Karistooꞌ bakaang doorenang siraꞌpamaunge kiimatamauꞌnooꞌke oꞌnoi. Napoꞌ Timotiꞌke tee neeꞌmaikoꞌke daari-koo pakumui diiꞌanko daariampemaang, aaꞌnoko Pilemoni, neeꞌmaikoꞌ piaavampemaung eeꞌnoko Karistooꞌkoo kuunge nariꞌ mintoomarimaung; Apia, teni niiꞌmari Karistooꞌkoo kuunge; napoꞌ tee Akipas niiꞌ ninka mantaꞌ Ovorinung piikonara; napoꞌ teing Karistooꞌnavitu daꞌ Pilemoni dakanava-koo dootuuꞌariiꞌnaang oosiarimaing-anko. Biraanke eeꞌnoko mooa diiꞌkoo otoaing Kumponing Niuma-itaing eeꞌnoko teieta Ovoring Jiisuuꞌ Karistooꞌ.
Pilemoni Bakaang Aarumo Tampara Noruꞌura Paulaꞌ Dotuaruꞌnaꞌ
4-5 Tampaꞌ tampamaung tee-koo nkaang Kumponing-koo ookara batei-koo kunsimarama daꞌ pakuransi, taararama dake Ovoring Jiisuuꞌ masikaꞌantavemaung-koo eeꞌnoko teing bakanavitu piaaverikooꞌ ookara. Eeꞌnoko tee kunsimaramaung tee dakaang masikaꞌanta minkuei tankaampeko ookara kapooꞌ tampeng niiꞌke Jiisuuꞌ Karistooꞌ koo kompampimaing siraꞌparaaꞌnaang. Aiꞌ ninge tee doturotu pankaing eeꞌnoko dunsirunsi˜anta nkavamaung dake mmaikoꞌke teing Karistooꞌnavitu piaaveri biikaang domang kuaaꞌantaveriko.
Pilemonie Onesimas Tampaꞌ Onkeonkeꞌuaing Baaraꞌmaꞌnung Masikung-pinaꞌ
Temeng-koo noruꞌama, bane Karistooꞌ bakaang kara-okomui-nkanara deemari ning makosi daꞌ etu-koo aarumo koontoꞌnamuriau nko-koo; Teka piaae daiꞌmuresioꞌ tamung eentaramang dake Onesimas tontaꞌantaveeꞌnaang orakaꞌ nkoruuꞌnung-koo; 10 Ninge Paulaꞌke pankarai eeꞌnoko enang Jiisuuꞌ Karistooꞌkoo kiimatamari oꞌnong, bauma deemari oꞌnoi anke kiimatanooꞌke daꞌ baitoramang tee Onesimas daꞌanko poko oovera taveaꞌ onkeonkeꞌeaing, nnuring makosi deemparioꞌ Karistooꞌkoo kuunge. 11 Tero tee dakaang botovotonaaꞌ deempari teie daꞌ tampaꞌ pakuruarukotaaꞌ mmaruuꞌ daꞌankoita, teka Karistooꞌ nau-antavansioꞌ bereꞌarara tampara pakupakunara deemparieeng neekaang. 12 Ninge tee enang daꞌanko botoamaang nkaang domange aaꞌnaꞌ daiꞌansi. 13 Anke ning-ankoi otoꞌkoo aaꞌnaꞌ piamoi otong ning tampara doorenang-koo kiimatamauꞌ nooꞌke oꞌnoko pakumuuꞌnaang dake pakumepeuꞌnooꞌ makosinooꞌ. 14 Teka makosi ninge pinkaꞌampaukaꞌnung dake tauraꞌpearuko deekoꞌ. Ninge daꞌ eturamparooꞌnaang ning aunge pakumuuꞌnaang, daka dakaang arooꞌketa teeꞌ nko-koo makosi.
15 Eeꞌkoo daꞌankoita okiꞌnaa batei-koo tenkenuuꞌnooꞌkoo Kumponinge damaꞌke daꞌ ninka ookara batei-koo otoreeꞌnaang miruꞌ uuꞌnung, tamung botovotonaaꞌpinaꞌ kato noruꞌeaꞌ, teka botovotonaaꞌ puruꞌuioꞌ neeꞌmaikoꞌ noruꞌeai, neeraꞌmaꞌnung makosi deemparioꞌ. 16 Eeꞌ, ninge tee aaꞌnaꞌ tampaꞌ noruꞌamaung deemparako dake napoꞌ deto basinooꞌ noruꞌeaing, aiꞌ tee tee dakaang naning, dakaang botovotonaaꞌ deempari otoko. 17 Teeꞌkoo dake ning daꞌmaikoꞌpinaꞌ noruꞌmemaung deekoꞌ, aung kiimataveaꞌ tee ning onkeonkeꞌmepeuꞌnaꞌ onkeonkeꞌeaing. 18 Eeꞌnoko daꞌ orakaꞌ nkoruuꞌnung deekoꞌ niiꞌnooꞌ bakiaaꞌderuuꞌnung deekoꞌ ning nkaang komaaru˜ deeng-antaveko mooꞌampaing. 19 Aung avaro kara ninge Paulaꞌke nkaang birenge daariama aaꞌpamaang, “Damaꞌke mooꞌampaing,” teka ninge napoꞌ minkuampaukaꞌnung daꞌ Pilemoni pakuransioꞌ domaang isikung nkaveuꞌnung-koong komaaru ning-aape otoing. 20 Eeꞌ, ee mmaikoꞌ, tampaꞌ onkeonkeꞌeaing tee dakaang botovotonaaꞌ dake ning dotu-antameainaꞌ Ovoring-koo nkaang domang kuaaꞌantamema Karistooꞌkoo.
Siꞌnooraꞌaape-naare
21 Aung kara eeꞌ noruꞌansi daarireromaang dake koontoꞌ meumeeꞌnaang minkuansinaꞌ divuꞌui otoko dau basinooꞌ. 22 Napoꞌ aaꞌdamaang, “Pava-koo-navaro maamu-antamemuai mora aatumpainooꞌ, aiꞌ tee ninge eeꞌ noruꞌamaang kiimatanooꞌketa bake-antamaavaꞌnaang kunsi-koo pakumerimaung-koo.
23-24 Teie napoꞌ Epaparasie niꞌninka nariꞌ Karistooꞌkoo kiimatamaresi oꞌnoremaunge tampaꞌ tang botorerurimaang, napoꞌ ainge niꞌninka nariꞌ mintoomarimaing aaꞌninge neeꞌ kiimatanooꞌka pakumaarekooꞌ: Maakaꞌ, Aristakas, Dimas, eeꞌnoko Luukeꞌ.
25 Tee biraanke tee niikaang Ovoring Jiisuuꞌ Karistooꞌ bakaang diiꞌ diikaang tanuaang ninka nariꞌ otomatoaing. Eeꞌ, Masikung.