Siosna Misog El Hibru Kristen Elim Ginofeni
Ohuna buk enaig esog
Afa ohuna ginof Kristena olug onigigim kweganig. Afa mingnag Kristen ogna heafgelni olug onigigim wahiyi mahim mingnag el ehengelim pigau pegonigba afa kinig faigonig. Ohuna buk ehengelni olug onigigim kifuti hianigeg afa ehengelim nalig gafugag wagfunig eso God Sisas Krais nai yi esena. Afa Krais mungo feg bigim God na inim minaba wagfunig.
Ohuna bukba sambaga mungo mog mo sihig. (1) Sisas eba inim Godna Leg feg. Mahim Sisas bite wa gofenaba afa ehe kaksag kinig fana afa nalig tautig kahalana. Afa enag mina wa, God Sisasim esenaba yuwanam eso bigim mungwali elim kwaganig (2:10) Eso Sisas hugna nalig fegim afa autunai Godna mo fi sihiaule elim gosinig afa ofwanai elim gaba gwenaig esenig afa Mosesim gaba hugna nalig fenagim gosenag. (2) God ehe Sisasim gishu wahiag so ehe prisni misog el feg so higeg gofif. Afa ehe Ju elni misog Prisim gosinig. (3) Sisas eba misog pris feg ehe heven wa go, afa eheba nalig fegim so elim piske wambuf aman so inim ehem olug onigignag. Afa Mosesna nihe mo i afa Ju elni lofuna nihei eba sugwagim wagfug nalig gafugag Sisas so esena.
Ohuna buk eba elni olug onigigim kifutignugeg eso enaksag mo sihiageg autunam Israel elni olug onigigim kifutignugena eso enam wagfug. Sapta 11 eba enam sihig: Afa ming mo enaig esog afa ahanaig ahanaig kinig negelim pugunifiba so na nimbiafna olug onigigim mo hugna lahlag kehlif ogfufum so wahag nem pugunif. Afa negelni nofug so na Sisasim nangwafufum afa heafna nihem pahlukui eso kinig i afa tautig i mas negelni olug onigigim enam filafati (12:1-11).
1
Sisas Krais Godna Leg ofwanai elim gosinig
Autunam God bigelni Ju elni simbianigam mo faigim Godna mo fi sihiaule elni mengig wa sihi wahiana. Afa ahanaig ahanaig was mi afa ahanaig ahanaig mina mi God sihi wahiagim Afa yawo awaiegim osuna muhwa fegim ofeba God heafna Legna bigelim sihinig. Afa ena Luwalna ehe mungwali gawig eseageg wahiagba afa mahim sumi yi osuna awaiegim ofehba God ehem ati gishu wahiag eso ma ehe enaig gawigim wambuf. Afa ena Luwalba eba God lofug mungwalofug eso ehe Godna afwambusugug wagfuf. Afa heafna kifutig mo mungwali gawigim kike wambku gufuf. Afa ehe mahim elim mina gafugagfenibi eso afsug fif ehe ati heven gam ikag Godna sisyi nemugna pegag sime muhwa wa go.*(1:3) Afa el muhwa God nai yi go eba wagfug enag el eba lahlag unehlagna feg.
Eso ehe ofwanai elim gosinig. Afa unehlag God ehem faigba eba ofwanai elni unehlagim gosinig. Afa enag moba Sisasna unehlagim fingi fukug afa God mas ofwanai elim enaig esonig mo ehe enaig esog;
Neba kana Leg feg afa ohunag osunaba ka ambagwa sihig ka neana Awag fef. Sam 2:7
Afa ena gaba mas enaig moba ofwanai elim esonig mo;
Eba ka ehena Awag fef afa ehe kana Leg fef. 2 Sml 7:14
Afa God gofwanai Luwalim onigihiafiba eso ehe enaig esof og
Sa ma mungwali Godna ofwanai el ehena unehlagim fingi fi.
Afa ofwanai elbi eba God enaig esonig;
Ka kikeafna ofwanai elim esenibi so ma fufei lofi afa enag gafugag el so ma suwi meleg lofi. Sam 104:4
Afa Luwalimba eba God enaig esog;
Neba God feg eso ne higeg misog el gofuf afa ne mungwali elim numwehe kwefihiagenam afa nangwagihiagef. Afa lahlag nihe mo ne membeg afa amtakwalig nihe mo ne olug kakagenag. Eso kaba neana God ka neana unehlagim fingi feg afa so neana sifakaleg naligfeg. Afa ne nimbeafna hihem gosinig. Sam 45:6,7
10 Afa God heafna Legim mingnag mo mahimsi sihinago og;
O Ainiyag, autunam ne ohuna bitem esegba afa nimbiafna ningana ne ofum eseg wahiag. 11 Afa enamba eba awaief afa nimbiafba ne higeg gofuf. Afa enamba ofenaiba lofug muhunagim afa piplehiagof. 12 Afa ne mumwanefku fakaf ofenaiba el lofug hugufakagim afa yimieg fatig. Afa ne gwese gofuf afa ne mas muhunafe. Sam 102:25
13 Afa God heafna Legim enaig esonag og;
So na kana muhwa pegaiba ka mahim neana angoluwagim filafe aitiba so ma ehengel nem ahnai skaugfini. Sam 110:1
Afa sohnaig moba God mas ofwanai elimba esonig mo. 14 Afa mungwali ofwanai el eba sungwag figim afa Godna gafugag el fig. Afa so God ningitigiba elim God so ogna wambum enam kwaganig.

*1:3: (1:3) Afa el muhwa God nai yi go eba wagfug enag el eba lahlag unehlagna feg.