2 KORINTIENS
2 Korintienson Vuak Amur
For madu fas igi isoime e Korintko ai Mesedonia guf ijia karinva iji nijiain. Mai Korint fuka mai bomana be fu moik Akaia ko Gris guf ijia. For fu amur fas be fu isoime e Korintko iji nijiainma iji fu vuak gigikin kafo kuardian. Regavo rad fu vierafe fu e Taitas kuaga fur va ijia izeg bu karijo iji giame una ro fu kuardakro fu ijefuon kuama fu vain. Areme Taitas fu una ro For izeg E Korintko roin bu Foron vuak iji faime oi karoiknum vo madu izeg e roin bu daro fuon uzavo ijin For kuardain. Regavo una fas igia For fu isoinma ijia fu vuak nokarok ga nokarok (4) ka ma ijin isoin. Regavo vuak amur fu isoinma iji fu e iji bu oi karoinva ijiebuon oimarenma ijin. Regavo ura vuak be iji fu Jesu Kuraison vuak ma iji fu bu nijaidiakro vierafenma iji isoime nijaidiain. Revo ura vuak be iji fu e iji eraneb bu sinuom bakin karioijo iji mon kafo vajiakfuon iji isoime kuardiain. Regavo vuak radkma iji fu vuak fuon izeg fu ma e afasor renma fu ijin isoime kuardiain.
2 Korintiens guf ijia vuak kafokafo fu isoinma ijin
1:1-11 For izeg fu e Korintko iji anadiainma ijin.
1:12–2:13 For izeg fu e Korintko bu For dab unam kafokafo ijia oifian main gavo fuka uria Godon vuak ma iji nijaidiakro vierafenma ijin.
2:14–6:10 For izeg fu e God ma vierafejo bu Godon unam iviamkor ijia kegokfuon kuardiainma ijin.
6:11–7:16 For izeg fu e Korintko buifuon reoinma ijin.
8:1–9:15 For izeg fu e sinuom bakin Jerusarem ijia karinva iji mon vajakfuon kuainma ijin.
10:1–12:21 For fu izeg e bu ma afasor rene ik reokfuon fu kuainma ijin.
13:1–13:13 For izeg fu e Korintko iji vuak fuon radkma iji nijaidiaknum anadiainma ijin.
1
Na For e iji God fu fuon vierafenma ijia kiega na Jesu Kuraison afasor rene ikrejo iji nar e Timoti uviainuvuon ijek fas igi isoime ja nijiav. Fas igi no isoime e God ma vierafejo bu afuime ai Korint guf ijia karinva ijiga Godon e fok ai Gris guf ijia karinva iji nijiav. No vierafe God Asoinuvuon ijiga E Bomana Jesu Kurais bu tavan bog ja ma rediaknum mukorigia samuagdiaga ja afuime kariokfuon.
Na vierafe noka God nuvuon E Bomana Jesu Kuraison Asoij iji fu e mardiaknum oijmiame ifejdiamo ijefuon oimarek. Ijefuon maiji fur e iji bu oifian abeknum afikin biediavo iji tavan bog ifejdiam. Fu ijeg tavan bog ifejduomo ijefuon nosik unam besum ijeg una e iji oifian abejo iji mukorigia tavan bog ifejdiakfuon. No vierafe noka izeg Jesu fu vajai fian abenma no madu noka ijeg vajai fian abekfuon. Regavo madu Jesu fu vajai fian abega God fu ifejdainma ijeg God fu una Jesuon duadok ijia no dasumduome mukorigia ifejduom. Regavo tavan iji no Godon vuak abe kuaimoijo iji noka vajai fian abej. Regavo vuak iji no abe kuaimoijo iji fun ja ifejdiame karauniamo ijefuon noka bomana oimarev. Regavo madu izeg no vajai fian abeko God fu ifejduomo ijeg nosik una ja ifejdiakfuon. No ja ifejdiaga ja giriesame irenki ja kabuaikabuaikin unam vajai fian abejo kafo bu jon roko ja iji biediakfuon. Regavo kaifnun no ma vierafe ja uria giriesame karij. Regavo no vierafe unam izeg no vajai fian abejo iji jak jaka ijeg vajai fian abej. Regavo madu no vierafe izeg God fu no uruvana ifejduomo ijeg fu madu ja ifejdiam.
Izeg no Esia ijia vajai fian abenva ijin
8-9 Regavo kaifnun igia faif. No ai Esia ijia afikin iji no biediainva iji buka mamkanuk no izeg giriesame asusekfuon bakin no ijin biediain. No afikin iji biediame noka uruvana vajai fian abeknum vierafero non aoikro no ijeg vierafen. Regavo no vierafe noba aoikfuon ijefuon maiji no vierafe God fu e aoivo iji fu kiaga bu una urij. Regavo ire iji bu nuvuon rejo iji no daro nuvuon ijia biduakva bakin. Regavo noka Godon daro ijia biduakuai bu ijefuon nuvuon ren. 10-11 Regavo God fuka unam ni kafokafo no aoikfuon fu ijia karaunuin. Regavo madu fur tavan bog no karaunuomo ijefuon nok fu ma vierafej. Regavo jaka e uruvana no ifejduome Godon sirimamejo ijefuon God fu tavan bog no karaunuok. Regavo fu no mukorigia ifejduomo ijefuon e uruvana bu una nuvuifuon Godon bomana oimarkfuon.
For unam iji fu dasume una be amarenma ijin
12 No ire ijiebuon no bomana aroikaravo ijefuon no oinuvuon ijekma noka ma kuardiav. Regavo ik anej ijia ire igi no kuardiakrejo iji fu Godri ifejduomga ire fok no moikigia reoknum vo jon reoinva iji noka ma vierafeknum reoin. Regavo iji no renva iji no e moikigia oijo ijiebuon vierafenva ijia renva bakin. Revo ire fok no reoinva iji fun Godri no ma reduome daro muokoga no ire ijin reoin. 13-14 Regavo vuak igi no isoinva iji no vuak sauivkin iji isoivo bakin revo noka vuak iji ja samakaf dame faikfuon ijin isoiv. Ijefuon na vierafe ja izeg no ma afasor renva iji jan sibank fain revo rad ja vuak nuvuon fok faime vierafekfuon. Ja tavan afikin iji E Bomana Jesu Kurais fu una roko ijia ja vuak ma iji no nijaidiainva ijefuon nuvuon oimarme aroikarak. Regavo madu no izeg ja vuak no nijaidiavo ja faime jajiavo ijefuon noka jon oimarknum aroikarak.
15-16 Na ijeg vierafenva ijefuon unam iji na igeg amaren. Na Mesedonia vako ijia na ja giame vainki una roko ijia na madu una giame ruakro na ijeg amaren. Regavo unam ijeg na rejo ijia ja na tavan nokarok (2) giekva ja una oimarknum daro abekfuon. Na ja giaga jar ifejdiega na unam nun amarme ai Judia vak. 17 Regavo ja vierafega unam iji naba vierafeknum amaren? Regavo be iji jakafu vierafero na ema moikigia oijo ijiebuon vierafenva ijia jame amaren. Ijefuon maiji e moikigia oijo bu ire kafo rekuai kuaivo iji bum ir ijia kuai keno kuaiv revo bu oibuon ijia bu rekuai vierafejo bakin. 18 Regavo God fu ire kafo rekafa kuaimon iji fu aremo bakin gavo fuka ren. Ijegvo nak na unam besum ijeg irerag na kuaivo iji naka rej. 19 Regavo na Sairas ko Timotina vuak iji no Godon Farif Jesu Kuraison kuardiainva iji no kufui kuardiainva bakin. Ijefuon Jesu Kurais irerag fu rekafa kuaimon iji fu aremo bakin gavo fuka ren. 20 Regavo God vuak fok fu rekro kuainma iji fun Jesu Kuraisri rega vuak fu kuainma iji fuka ijekma riaren. Ijefuon no vuak iji Jesu fu God igame ire fok renma no ijefuon God dab aroikfuon. 21-22 Regavo fun Jesur irerag fu nuvuifuon renma ijia fu no kege jana besum amarduoga no e darokin rene una efuon ren. Regavo fu Kaven Akai fuon iji kege oinuvuon ijia anf igeg naduoma no e fuon redo no ire ma iji God fu kuainma no ijin kekfuon.
23 Regavo vuak igi na kuardiavo iji God fun gieme vierafenma ijefuon naka ma kuardiav. Na vierafe na una ai Korint vuakva naka afikin abe miak. Ijefuon na unam iji na ijia vuakfuon amarenva iji na areme una unam be amaren. 24 Regavo no jon izeg ja God ma vierafejo iji no nor samuagdiavo bakin ijefuon maiji no vierafe jon ja ma vierafejo ijia jaba zazaiv. Regavo ik igi no reoijo iji nom ja ifejdiaga ja oimarknum mukorigia ikrekfuon.