Sam Kranzpnu-esz'mz-nrade-rtqmz (68)
Zmatq Ngr Gct Mz Nzaclve-krde Lr Israel
Nabz ne Devet kx yrbzle mz kxrmailz ngr dzbe kxnzngrng.
Nzmyalzkr Gct
1 Mz nzvz-krm Gct, enqmi rdeng nzodalitipeng.
X kxnzpxtxpx-ngrdr nide nzdwaszlr nide.
2 Milxtxole nidr mz nzapu-krdr zsikapu kc tqwqplx nenq.
X nibqtile kxdrka'-ngrng mz nzapu-krdr kadol kc tqyrle mz nzngc-krde.
3 A' nigu kxnztubqng abrtzlvzku nzmnc-aepztr-krbzku bade,
Mz nzbilvz-krgu x nzmalqlvz-krgu nide mz nzelangr.
4 Naglqlzku Gct mz nzangrlvz-krgu drtqde.
Na-amyalzku nide kc tqvoom mz dcbz.
Drtqde Yawe x na-abrtz-ngrgu nzmnctr-krbzku mz mzte.
5 Gct mnc Mangr-nzangiongr.
Apubzle trte mz doa kxnzbzszng x aclve-kzle olvz kx nzbzszng ncblo ngrdr.
6 Kxnzmncng esz'-krdr amnctr-lxblr-kzleng mz neidung,
X kx drtqdr tropxu vzmi-kzleng
Murde namnc-zpwxng.
A' krkcng tzesablqtilr nide, avzpx-nrbalqleng.
Mzli Kc Lr Jiu Tzrlasz-ngrdr Ijipt X Tzprtr-ngrdr Lzke ✡ Nzrlaszngr 13:17—19:19
7 Mz nzrlaszkr leplz ne Gct Ijipt, vzmitrleng lzke.
X mz nzmailz-krde nidr, mncpxm mz nyr x dcbz.
8 Nide Gct r lr Israel kc tqaelwapxle zmatq ngrde mz Newz Saenae.
Murde mz nzvz-krmle, nengq x tewa kxnzetung nzvz-kzpqng.
Mzli Kc Lr Jiu Naprtr-ngrdr Mz Drtc' Kc Tqpibz Yawe Badr ✡ Josua 6:1—11:23
9 Gct avzo-ngrmle tewa,
Murde na-alu-moule drtc' nyzde kc tqmingrpe.
10 Neidu lrde kxtrnzrngiscung amncleng mz drtc' lc,
Mz nzrka-krbzle badr da kx nzmnctxpx-ngrdr.
Mzli Nyz Kxnzryrlqng Drtwr ✡ Kxnzryrlqng Drtwr 5:16, 24, 30-31
11 Kxetu rgu Gct kapxle natq
Kx olvz kxnzkqlung napipxlr nrpa lcde seng,
12 “King x ami nedrng nzdwang.
X nigr olvz akitikr dztu enqmi kcng tztwz ncblo ngr vea negrng.
13 Akitikr da kxlqngi kxlqlwx kx nzwzngr mz silvz x gol.
?Myx kxmule, kzdung nimu ncblo trnzprtr-ngrdru mz vea?
14 Murde Gct kc tqrninr milxtxole king kcng,
X namz ngrdr nztwzbene-krdr apule lrdz kx lvxlz nrc mepz.”
Mzli Kc King Devet Tqyrlq-ngrde Jerusalem Mz Nzngini-krde Mzteadau Nyzde ✡ 2 Samwel 6
15 Mzli kc King Devet tqyrlq-ngrde Mzteadau nyzde mz Newz Saeon,
Newz Basan apule ncblo kx angya drtwrde nzyckr Mzteadau mrlc.
A' Devet ayzlubzle natqde mz nzrpi-krbzle kx,
“Newz Basan, kxmule-esz' matq-esz'ngrn x myatxlzq,
X nra nyzmqng ngi rtrngr,
16 A' bzkq obqszoq newz kc tqmcpx Yawe kx namnc-ngrde,
Murde sa namnc alo elr.”
Yawe Aovxiole Enqmi Rdeng X Vzdz Mangr-nzangiongr Jerusalem
17 Gct vom mz siu ngr sariot scdeng,
Mz nzprpx-krmle mz Newz Saenae x nzprtr-krde Mangr-nzangiongr.
18 Kxetu vzdz-ngrde wq,
X aovxiole enqmi kxkqlu.
X nzkabzlr da bade, mz nzmetx-krbzlr bade,
Kxmule-esz' kxnzxpqbrlr-ngrdr nide mzli kc. ✡ Efiszs 4:8
19 Naglqlzku Kxetu kc tqatu-amqngile nigu mz zbq kang kqlu.
Murde nide Mevalu rgu.
Mzli Kc Gct Tqnibqti-ngrde King Nede Ehab X Nqvi Lrde Mz Nzayrplapx-krde Nidr ✡ 1 King 21:19; 2 King 9:24, 36
20 Gct rgu nide Gct kc tqarlapxle leplz.
Yawe nide Kxetu kc tqkapxmle nigu mz mq enqmi rgung.
21 X sc tqtaputibzle nardr,
Murde nzvz-rbr-zvzng.
22 Rpimle bagu kx, “Kxmule-esz' enqmi rmung nzdwalzng mz newz
O drlve keng mz nzakitikr nrlc nidr, a' sa nayzlutibong.
23 Murde navznenamu mz nzrnzlvzo-krmu mepyr ngrdrng,
X kuli nemqng drtwrdr naesatxpx zpwx mz nzrmnq-krdrle.”
Nzakaputr-ngrm Nzamyangr Mz Mzli Nyz King Hesekaea ✡ 2 Be Ngrdr 30
24 Leplz amrlx nzmclr nzvztr-krmqng leplz neng Gct Mrkc Tqtr,
Mz nzangrlvz-krdr Gct x King rdr.
25 Dzbe kxnzngrng nzrtwayzbzng, vz-nqblqbz olvi kx nzelang x nzayrlewzng nrasrpwale.
X kxnzayrning gita nzrmnr-ngrmqng.
26 Kxmu nzngr-krdr nide sele,
“Naglqlzku Yawe, nigu leplz nedeng, mz nzyrlwr-lxblr-krgu.
Naglqlzku Yawe, nigu kcng tqngi nqvi lr Jekop.”
27 Neidu lcng tzvz-kzpqng, Benjamin, Judz, Sebyulon, x Naftzli.
Neidu ne Benjamin krkc tqtopwz rtwayzbz badr,
X mz nibrdr kxnzetung r Judz x leplz nedrng.
X rmnr-ngrbz neidu kx nzmncomqng mz nort, kxnzetu r Sebyulon x Naftzli.
Lr Jiu Nzkrka'-ngrdr Lr Mrkzbleng
28 Gct, aelwapx-moungr zmatq ngrm,
Kc tqaelwapx-ngrn tqokatr-ngrn nigr mzli kc.
29 Kapxbz natq kx king kcng tqaovxiopeq nartwzmqng da bam,
Mz nzmnc-krm Mangr-nzangiongr.
30 Ayrplapx Ijipt kc tqapule trmwzlogo kc tqmnc-kapqpxm mz nabr kc tqlvcpulzm mz nqlvi lr Lue Nael,
Ayrplapx nidr badr kztedeng murde mrlz-zvzbz badr nzotangr.
Aodali lr mrkzble lcng,
Navz navz nakrlzbzle mzli kc tzyrngzo-ngrbzlr bam.
31 Murde kxnzetung ngr Ijipt navzmqng bam,
Nidr badr lr narnrlc amrlx kcng tzaxvctrng badr,
X naxpeng trau, silvz, x da kxlqlwx
Mz nzaovxio-krm nidr mz vea.
Nzmyalzkr Gct
32 Nimu lr nrlc amrlx,
Nangrlvzamu Kxetu Gct.
33 Murde sc tqvzne mz bongavz, kc tqwz-ngrde mzli kc bqnc.
X nzxplrkr natqde apule natq bzlrmei.
34 Napipxku zmatq ngr Gct, kc tqaelwapx-ngrde mz dcbz,
X mz nzaclve-krde nigu lr Israel.
35 Kctitxpx-zlwzku Gct rgu Mrkc Tqtr.
X nide kc tqrkam bagu nzxplrngr x zmatq. Takitrde nzrglqlz-zvzngr nide.
✡Sam Kranzpnu-esz'mz-nrade-rtqmz (68):6 Nzrlaszngr 13:17—19:19
✡Sam Kranzpnu-esz'mz-nrade-rtqmz (68):8 Josua 6:1—11:23
✡Sam Kranzpnu-esz'mz-nrade-rtqmz (68):10 Kxnzryrlqng Drtwr 5:16, 24, 30-31
✡Sam Kranzpnu-esz'mz-nrade-rtqmz (68):14 2 Samwel 6
✡Sam Kranzpnu-esz'mz-nrade-rtqmz (68):18 Efiszs 4:8
✡Sam Kranzpnu-esz'mz-nrade-rtqmz (68):19 1 King 21:19; 2 King 9:24, 36
✡Sam Kranzpnu-esz'mz-nrade-rtqmz (68):23 2 Be Ngrdr 30