Sam Kratrtqki-esz'-nrade-rtqmz (108)
Mnc-xgle-txpwzkr Nim Mz Na-aovxio-krm Enqmi Rgrng
Nabz ne Devet.
Sa Na-angrlvzx Nim
1-2 Sa na-angrlvzx nim mz nabznge atwrnrngr mz nzayrni-krbo gita bam,
Murde abrtr-zvzbo drtwrnge bam.
Nilz r nepi adwalzmle ninge mz zbq kang kqlu.
A' mz nzdwalz-krmc mz nourla kx topwz,
Na-apule nabz nenge adwalzmle nepi,
Mzli lc tqglqlzpex nim.
3 Yawe, sa na-awibo bam mz mzlir lr mrkzbleng,
X na-angrlvzx nim mz mzlir neidung.
4 Murde nzaodu-zvz-krm myalz krlzlzle bongavz,
X nzangidati-zvz-krm natqm. ✡ Sam 36:5; 71:19; 103:11
5 Lr Heven namclr nzmyalz-esz'ngr-krm,
X lr nrlc namclr nzaovxio-krm. ✡ Sam 57:7-11
Gct Ayzlu-ngrmle Natqgu
6 Mz zmatq ngrm, arlapx nigr kcng tqaodu-zvzq,
X ayzlu-ngrme natqgr.
Da Kc Tqpi Gct
7 Gct, natqmqng nzvzpxmqng mz Mangr-nzangiongr, mz nzrpi-krdr kx,
“Mzli kc na-aovxio-ngrne, sa na-akipxbo mz leplz nengeng
Drtc' kcng mz nrlar LueJodzn rlilr.
8 Murde neidu lr Gilead nengeng.
X nqvi lr Manase nenge-kzng.
X neidu lr Efrem tum mz nibrnge.
X nqvi lr Judz kx na-aclve-zvzng mz zmatq rnge.
9 A' enqmi rmung trna-aovxiolru nimu.
Murde lr Moab sa nawztrpqng bange
X lr Edom sa nametxmqng bange.
X sa namalqlvzx nzmilxtxo-krnge lr Filistia.”
Natq King
10 ?Gct, sa na-atutrq natqm lc mz nzokatr-krm ninge,
Nzprtr-krnge mz lrpalvc ngr mzteadau nyzdr lr Edom?
11 Murde mzli kc axtxpeq nigr,
X trokatrwq ami negr mz nzotangr.
12 Gct, okatrp nigr mz nzota-krgr badr enqmi rgrng mzli ka.
Murde mane nzmnc-xgle-krgr ncblo nzarlapx-krdr nigr.
13 X krlzkr kx mz nzmnc-krme bagr,
Sa narnzlvzokr enqmi rgrng mz nzokatr-krm. ✡ Sam 60:5-12