Nitam John odojibiigan
Enadjimomagag oo mazinaigan
Mi aa kitcit8a John kagi ojibiag oo mazinaigani. Mi aa pejig Jesos okikinoamaganibanin, aa ka ojitodj mazinaigani “Min8adjimo8ini kagi ojibiag kitcit8a John” ka ijinikadenig.
John ogi ojiton oo8e ojibiigani kidji kadjinija8adjin ka teb8etamindjin kidji pec8abamandjin kabe Kije Manidon kigi Og8izisini Jesosan. O8idama8an kidji sagiidindjin kakina pepejig e tacindjin, kidji odji 8abadai8endjin adi eji teb8etamindjin.
O8idama8an acitc kidji iag8amenimandjin ini8e anodj ka iji kikinoamagendjin. Paba kagik8e8agoban ako igi kikinoamage8innig ka iji tendjin ka teb8etamindjin. Ikido8agoban ega Jesosan e aiaa8indjin ini Kije Manido Og8izisan kagi pi anicinabe8iidizondjin. Megadacta John 8edji ki kitci mikomadjin Jesosan, e ikidodj maiagotc Kije Manido ini Og8izisan Jesosan kagi pi anicinabe8iidizondjin.
Igi ka kagina8icki8adj kikinoamage8innig ikido8agoban acitc ega odji pejig e apitendag8anig adi eji pimadizinani8anig ooma akikag, ka8in mega apitendag8asinon oo aki acitc oo pimadizi8in. Midac John okitci mikodan sagii8e8ini odojibiiganikag. 8idamage adi ejinag8anig Kije Manidon osagii8e8ini, acitc adi Jesosan ka apitci sagiandjin a8iagon pinici kidji nibondjin 8ina8a odji. Acitc dac ogi inan panima ke8ina8a pejig8an ki iji sagiidindjin kakina pepejig e tacindjin.
1
“Kije Manido Odanim8e8in” ka ijinikazodj,
8in ka migi8edj pimadizi8ini
8in ka migi8edj pimadizi8ini
1-2 Kidojibiamagom kidji mikomagidj aa a8iag “Kije Manido Odanim8e8in” ka ijinikazodj, 8in ka migi8edj pimadizi8ini. Aja tegoban ab8amaci kakina kegoni madjisenigiban, e 8idji8apanin Kije Manidon Kidadaminani. Midac ki pi anicinabe8iidizo ooma akikag. Nina8it dac nigi noda8anan ekidodj acitc nigi 8abamanan. Nigi kana8abamanan acitc nigi taginanan. Mi ii 8edji mikomagidj. Ki8idamagom aja egi odisigo8ak aa8e kidji migi8edj kagige pimadizi8ini. 3 Ki8idamagom dac kagi 8abadamag acitc kagi nodamag, kekina8a acitc nina8it kidji mama8ino8ak teb8etamo8inikag, e mino mama8iseiak Kije Manidokag Kidadaminan acitc Og8izisikag Jesos Christan. 4 Kidojibiamagom dac oo, mizi8e kidji gi modjigendamak.
Kije Manido kikasiamagonan ka iji patadiak
5 Mi oo ka pi tibadjimodj Jesos, Kije Manido Og8izisan, midac nogom ki8idamagom. Kije Manido mi tabickotc 8asea8in ejinagozidj. Ka8in kegoni manadasini 8inikag. 6 Apitc a8iag ikidodj: “Nimama8ise Kije Manidokag,” pekic dac nta patadidj, kagina8icki 8aa acitc ka8in omin8endamiasin Kije Manidon. 7 Anic dac, kicpin 8asea8inikag iji pimadiziak, tabickotc Kije Manido ka iji 8aseanig ka tedj, kimama8inomin kakina ka taciak, acitc Jesos, Kije Manido Og8izisan, kikasiamagonan kakina ka iji patadiak, egi pagidenimidizodj kidji nibodj tcibaiatigokag kina8it odji.
8 Apitc a8iag ikidodj: “Ka8in nipatado8inni8isi,” 8aiejimidizo acitc 8abadai8e ega e kikendag Kije Manidon oteb8e8ini. 9 Anic dac kicpin 8idama8aiak Kije Manido egi patadiak, kiga kasiamagonan ka iji patadiak acitc kiga paiekideeigonan. 8in mega teb8eiendagozi acitc kabe k8aiak inakamigizi. 10 Apitc a8iag ikidodj: “Ka8in 8ikad nidodji patadisi,” mi tabickotc ikidopan e kagina8ickindjin Kije Manidon. Kije Manido mega ki ikido kakina a8iag e patadindjin. Ka8in dac oteb8etasin Kije Manidon ekidondjin.