Jesos Odanodaganan Odijitcige8ini8an
Enadjimomagag oo mazinaigan
Nijin ojibiiganan kitcit8a Lok (Luc) ogi ijinijaama8an pejig naben Teopil (Théophile) ka ijinikazonigobanen. Nitam ii8eni, Jesosan omin8adjimo8ini ogi ojibian. Midac iima ka iji 8a8idamagedj adi Jesosan ka ikidondjin acitc ka pi inadizindjin ooma 8akidakamig. Mi oo8e eko nijinigin omazinaiganan, taji e iji tibadjimomaganig adi ka pi ijitcigendjin Jesos Odanodaganan. Ii dac apitc, aja Jesos ogi odji nda 8abamagoban Odadaman 8ak8ig acitc dac ka8in aja opaba 8idji8asi8abanin Odanodaganan. Anic dac Mino Manido ogi pidigecka8an ini8e ka teb8etamindjin, acitc ogi minan macka8izi8ini.
Oo8e dac mazinaiganikag, Lok 8idamage adi kitci mane a8iagon ka iji ani teb8etamindjin 8edi Jerusalemikag, acitc adi ka iji ani ma8adjiidindjin ka teb8etamindjin kidji aiamiendjin. Mina8adj dac 8idamage adi ka iji kitci obeckamaganig Jesos omin8adjimo8in mizi8e Israel akikag, pinici 8edi akin ka samisinigin Medjiterani (Méditerranée) kitcigamini. Coda8inni8ibanig nitam ka madji teb8etamo8adj a8iagog, nage dac, ega ka Coda8inni8i8adj ke8ina8a ogi madji teb8eta8a8an Jesosan. Kinabo8adananan dac ooma mazinaiganikag adi kitcit8a Pon ka apitci kitci pabamadizidj kidji nda paba tibadjimodj Jesosan omin8adjimo8ini. Kinisidotananan acitc nanigodin Lok egi 8idji pabamadizimadjin Ponan, osa mega acidji8indizo apitc ako mikodag egi kitci pabamadizindjin Ponan. Ogi 8idji8an Ponan apitc Rom kitci odenag ka ijandjin. 8idamage Lok acitc adi kagi ikidondjin acitc adi kagi todamindjin kodagian Jesos Odanodaganan. Ki8abadananan dac egi paba tibadjimota8a8adjin Coda8innin acitc ega ka Coda8inni8indjin Jesosan omin8adjimo8ini. Acitc Mino Manido ogi minan a8iagon kidji ani teb8eta8andjin Jesosan.
Igi8e ka nabo8adamo8adj oo8e mazinaigani, omamidonendamiigona8a adi enendagozi8adj kidji todamo8adj, 8ina8a ka teb8eta8a8adjin Jesosan. Mi pejig8an enendagozi8adj kidji todamo8adj tabickotc ka todaminipanin ka teb8etamindjin 8eckadj, kidji paba tibadjimota8a8adjin Jesosan omin8adjimo8ini kakina a8iagon mizi8ekamig, naben acitc ik8e8an, ka tabasendagozindjin acitc ka niganizindjin, ka 8anadizindjin acitc ka kidimagizindjin. Oga minigo8an dac Mino Manidon omacka8izi8ini ii kidji iji kackito8adj, tabickotc kagi toda8agani8indjin 8eckadj ka teb8etaminipanin.
1
1-2 Kin Teopil (Théophile), aja mina8adj kidojibiamon. Nitam mazinaigan kagi ojibiaman, nigi tibadjimonan kakina Jesos kagi ijitadj acitc kagi kikinoamagedj, apitc ka madjitadj omikimo8in pinici kidji icpikadj 8ak8ig. Ab8amaci dac 8ak8ig icpikadj, ogi 8idama8an adi ke todamindjin ini Odanodaganan kagi onabamapanin, Mino Manidon egi odji kikinoamagodjin ke ikidodj. 3 Apitc ka ick8a nibodj, mane8inaj ki nagoidizo Odanodaganikag kidji gi odji ketcinamendamindjin teb8e e pimadizidj. Nimidana (40) tasogon inigik kiabadj ki paba 8abamagani8i acitc omikodanaban Kije Manidon Odogima8i8ini. 4 Nigodin e 8idji 8isinimagobanen Odanodaganan, ogi inan: “Ka8in nagadakegon oo Jerusalem odenag. Kiga pitona8a ii8e Nidadam kagi ikidodj kidji migi8edj, kagi mikodamonagok. 5 Cabadis (Jean-Baptiste) nibini ogi abadjiton e sigaadagedj, midac ka8in aja kin8ej, Mino Manidokag kiga iji sigaadagom,” ogi inan.
Jesos ka icpikagobanen
6 Meg8adj dac Anodaganag e paba 8idji8a8agobanen Jesosan, ogi k8ag8edjima8an: “Tebendjigean! Mi na ii apitc ke koki minad8a Israel a8iagog mina8adj kidji tibendamo8adj odogima8i8ini8a?”
7 Jesos ogi nak8e8ajian: “Ka8in kiminigosim kidji kikendameg anapitc kegon ke ijiseg acitc adi ke iji8ebag. Nidadam mega aja 8in ogi onendan, 8in sa kakina kegoni ka tibendag. 8 Macka8izi8ini dac kiga minigo8a, apitc Mino Manido odisigo8eg. Midac kiga mikomijim adi eji kikenimijieg, iima Jerusalem odenag acitc mizi8e Coda (Judée) acitc Samani (Samarie) akig, pinici mizi8ekamig,” ki ikido. 9 Apitc ii8eni ka ick8a 8idamagedj, meg8adj e kana8abamigodjin Odanodaganan, Jesos ki icpika 8ak8ig pinici pejig 8ak8ini kidji nigeckagodj.
10 Meg8adj kakina e icpanabi8adj adi Jesosan ka iji icpikandjin, nijin naben e 8abiginokonaendjin kitata ogi odji 8idjigaba8itago8agoban. 11 Ogi igo8an dac: “Galilee a8iagog! 8egonen 8edji nepidji icpanabieg 8ak8ig? Kigi 8abama8a Jesos ka naganigo8eg, 8ak8ig ka iji icpikadj. Mi maia pejig8an ke ijinagozidj apitc koki tag8icig kagi ijina8eg e madjadj,” ogi igo8an.
Judas ka nabickagodjin
12 Olip (Oliviers) pik8adinajicikag te8agoban kakina Anodaganag. Midac ki koki ki8e8ag Jerusalemikag. Ii dac pik8adinajic 8aiej abita tibaigan inigik apisinag8anoban Jerusalem odenakag. 13 Apitc Jerusalem odenani ka oditamo8adj, ki ija8ag icpimisagog migi8amig mojag ka ija8apan ako. Iima tebanig Pien, John, Jak (Jacques), Andre, Pilip, Tomas, Batelemi (Barthélemy), Matio (Matthieu), Jak, 8in Alpi (Alphée) og8izisan, Judas, 8in Jak og8izisan, acitc Simon, 8in ka acidagimagani8igobanen taji ka iji ma8asag8akonidindjin ega ka nda8endaminigobanen kidji tibenimigo8adjin ogiman Rom ka odjindjin. 14 Ma8asag kakinagotc e taci8apan ma8adjiidibanig ako kidji aiamie8adj. Ik8e8ag ka teb8etamo8adj ogi 8idji8a8an, acitc Mani, Jesos odjodjoman acitc Jesos o8idjiki8en.
15 Ii dac apitc, nigodin igi8e ka teb8etamo8adj ki ma8adjiidi8ag. 8aiej dac midasomidana acitc nijidana (120) tacibanig. Pien ki pazig8i nena8idj acitc ogi 8idama8an: 16 “Nidjiki8eg! Aja ki inateban kidji ijiseg adi Mino Manido kagi ikidopan Kije Manidon Omazinaiganikag. Ogi anim8ean Davidan, kijadj e tibadjimodj Judasan kidji niganindjin apitc nda takonagani8indjin Jesosan. 17 Judas dac kina8itinakag acidagimagani8iban acitc ke8in ki minagani8i kidji 8idji mikimomigo8ak,” ki ikido Pien.
18 Judas dac ogi kicpinadonagoban akini, conian kagi minagani8idj e kijika8agani8idj kagi iji madji inakamigizidj. Ki pakodjicin e onijagodjig acitc mizi8e ki sagidjinagijicin. 19 Kakina dac a8iagog Jerusalem ka tajike8adj ki nodage8ag. Midac ka ijinikadamo8adj ii akini “Akedama” (Akeldama) 8ina8a odijigij8e8ini8a, mi ekidomagag “Misk8i8aki.”
20 Mina8adj Pien ki ikido: “Mi oo8e mezinadeg 8eckadj Kitci Nigamo8inan Kije Manido Omazinaiganikag:
‘Apanigotc kidji pijicig8atenig ka iji tajikegobanen,
acitc ega a8iag kidji k8ag8e tajikedj.’Psaume 69.26(25)
Mi acitc mezinadeg:
‘Kodagian a8ian kidji nabickagodjin ka iji mikimodj.’Psaume 109.8
Mi ekidomagag.”
21-22 “Nogom dac kida onabamanan a8iag kidji nabicka8adjin Judasan. Nandam a8iagog apanigotc kigi 8idjiogonanag adi Jesos ka Tibendjigedj ka paba tedj, ka ako madji kikinoamagedj Cabadis kidji sigaadazonani8anig, pinici 8ak8ig kidji iji icpikadj Jesos. Ijinag8an dac pejig a8iag ka taci8adj kidji acidagimagani8idj kina8itinakag kidji pi 8idjiinak kidji tibadjimo8ak Jesosan ka Tibendjigendjin odabidjiba8ini,” ki ikido Pien.
23 Nijin dac a8ian ogi onabama8an, pejig Josep Basabas (Barsabbas), Jostos (Justus) acitc ka ijinikanagani8idj, acitc kodag Matias (Matthias). 24-25 Ma8asag dac kakina ki aiamie8ag: “Tebendjigean! Kin ka kikenimadj pepejig a8iag adi ejideedj. 8abadaicinam a8enen e niji8adj kagi onabamadj kidji nabicka8adjin Judasan, kidji gi mikimodj acitc kidji gi Anodagani8idj ke8in. Judas mega ogi pagidinan omikimo8in kidji ijadj 8edi kagi iji kackitamadizogobanen,” ki aiamie8ag. 26 Pejig dac a8iag ki 8ikobinagani8i kidji onabamagani8idj. Midac Matias (Matthias) ki odapinagani8i kidji acidagimagani8idj, midac ki midatcin acitc niji8ag Anodaganag.