Ojibiama8agani8i8ag ka teb8etamo8adj
Kalecia akikag
Enadjimomagag oo mazinaigan
Aja 8eckadj, kitcit8a Pon ki paba tibadjimogoban min8adjimo8ini, Jesosan e mikomadjin. Kalecia (Galatie) ka ijinikadenig akini ki paba ijagoban, acitc nandam a8iagog iima ka tajike8apan ogi onendana8aban Jesosan kidji teb8eta8a8adjin ke8ina8a. Ka ick8a paba tibadjimodj min8adjimo8ini 8edi Kalecia akikag, Pon ki paba ijagoban kodagini akini, kiabadj e paba tibadjimodj min8adjimo8ini.
Kegapitc dac, nandam a8iagog ki odji tag8icinog Kalecia akikag, e paba kagik8e8adj ke8ina8a, ka8in dac teb8e8ini kikinoamagesibanig. Ikidobanig ka8in 8in ii tibise e motci teb8eta8agani8idj Jesos. Panima a8iag ki nosoneagin Coda8inni Inakonige8inan kidji gi k8aiak8abamigodjin Kije Manidon, acitc panima ki pak8ej8agani8idj, mi ekido8apan. Nandam dac ka teb8etamo8adj 8edi Kalecia ogi teb8eta8a8agoban ini8e anodj ka iji kikinoamagenipanin.
Apitc ka nodagedj Pon egi pakebinagani8indjin o8idji8aganan, ki kitci kackendamise. Ogi ijinijaama8an dac oo8e ojibiigani, kidji 8idama8adjin adi enendagozindjin kidji iji teb8etamindjin acitc adi enendagozindjin kidji inadizindjin.
Pon dac ki ojibiige e 8idama8adjin adi ka ijisedj apitc ka madjitadj kidji anokita8adjin Jesosan. Ogi 8idama8an egi nd8e8emigodjin Kije Manidon, ka8in 8in a8iagon. Ogi 8idama8an egi onabamigodjin Kije Manidon kidji a8i paba tibadjimota8adjin min8adjimo8ini ega ka Coda8inni8indjin.
“Ka8in 8in e nosoneamegon Coda8inni Inakonige8inan ke odji k8aiak8abamigo8eg Kije Manido,” odiji 8a8idama8an. “Mi eta panima teb8eta8eg Jesos kegi odji k8aiak8abamigo8eg,” odinan. Omika8asoman 8egoneni kagi ojibiigadenigobanen Kije Manidon Omazinaiganikag, kidji 8abadaadjin ega enendagozindjin kidji tibenimigo8adjin Coda8inni Inakonige8inan.
Odinan ega kidji tibenimigondjin kegoni. Tiegodj dac oda pagidina8an Mino Manidon kidji 8abadaigo8adjin adi ke iji pimadizi8apan. Oga 8idjiigo8an dac Mino Manidon kidji k8aiak8adizi8adj acitc kidji sagiidi8adj.
Midac pejig8an nogom ka teb8etamo8adj a8iagog, ijinag8ani kiabadj kidji kitci apitendamo8apan ii kikinoamage8ini. Panima ki teb8eta8a8adjin Jesosan kicpin nda8endamo8adj Kije Manidon kidji k8aiak8abamigo8adjin. Ka8in kodag kegoni ke k8ag8e todamo8adj ogagi 8idjiigosina8a kidji gi k8aiak8abamigo8adjin Kije Manidon. Ogi pagidabaogo8an Jesos Christan ega kegoni kidji tibenimigo8adj. Panima dac ki iag8amendamo8adj, ega mina8adj kegoni kidji koki tibenimigo8adj. Tiegodj panima oga pagidina8an Mino Manidon kidji 8abadaigo8adjin adi ke iji pimadizi8adj. Oga 8idjiigo8an dac kidji k8aiak8adizi8adj acitc kidji sagiidi8adj.
1
Nin Pon kidojibiamonom. 8in tibina8e Jesos Christ kagi onabamijidj Odanodaganan kidji inagimigo8an, acitc dac ke8in Kije Manido Kidadaminan, 8in kagi abidjibaadjin Jesosan. Ka8in dac 8in a8iagog kagi onabamiji8adj, ka8in kek8an pejig a8iag kagi anonijidj.
Kina8a ka teb8etameg, pepakan ka ma8adjiidieg kidji aiamieieg 8edi Kalecia (Galatie) akikag, kidanamikonom, nin acitc kakina ka teb8etamo8adj ka 8idji tajikemag8a ooma.
Nipagosenimag Kije Manido Kidadaminan acitc ka Tibeniminak Jesos Christ kidji ca8enimigo8eg acitc kidji minigo8eg pekadendamo8ini. Jesos ki pagidenimidizo kidji nibodj, adi kagi iji nda8endamindjin Kije Manidon Kidadaminan, kidji gi odji kasiamago8ak kipatado8ininanan, ega dac mina8adj madji inadizi8in kidji tibenimigo8ak, tabickotc ka iji8ebizi8adj igi8e ega ka teb8etamo8adj ooma akikag. Kagige kada icpendagozi Kije Manido. Amen.
Pejig eta tag8ani Kije Manido omin8adjimo8in
Kikitci mamakadeniminom adi ejitcigeieg! Kitci 8ibadj kigi pakanendana8a, e 8ebineg Kije Manido kagi nd8e8emigo8eg e abadjiadjin Jesos Christan kidji kitci ca8enimigo8eg. Nogom dac kodag tibadjimo8in kinadotana8a, nandam a8iagog ka ikido8adj Kije Manidon omin8adjimo8ini ii. Anic dac pejig eta tag8ani Kije Manido omin8adjimo8in, teb8e ka8in kodag tag8asinon. Nandam dac a8iagog ok8ag8e adjitona8a min8adjimo8ini, kagi odji kikenimagani8indjin Jesos Christan. Kinada8enimigo8ag dac kidji adjito8eg adi eji teb8etameg. Kitci 8e8enda nigi paba kagik8emin min8adjimo8in kina8akag. Kicpin dac a8enenigotc pakan iji kagik8edj, oga kitci sogi pajacteogon Kije Manidon. Misa8adj nina8it kek8an ajeni 8ak8ig ka pi odosedj ii todag, oga kitci sogi pajacteogon. Kiabadj kikoki 8idamonom, aja kagi ininagogiban. Kicpin a8iag pakan iji kagik8edj, e adjitodj min8adjimo8ini kagi odisigo8eg, oga kitci sogacteogon Kije Manidon.
10 Kidinendana8a na e nanada 8abadaman kidji mino mikomiji8adj a8iagog? Ka8in ii! Tiegodj, kidji kikendaman e mino mikomijidj Kije Manido nidiji nda8endan! “Onanada 8abadan kidji min8endamiadjin a8iagon,” kidinenimijim na? Kicpin teb8e kiabadj nanada 8abadamaban kidji min8endamiag8a a8iagog, ka8in Jesos Christ nida anokita8asi.
Kije Manido onad8e8eman Ponan
kidji anokitagodjin
11 Nidjiki8eg! Kinada8eniminom kidji kikendameg ega a8iagokag e odjimagag oo min8adjimo8in ka tibadjimo8an. 12 Ka8in a8iagokag nigi odinasin oo min8adjimo8in, acitc ka8in a8iag nidodji kikinoamagosi ii min8adjimo8ini. 8in tibina8e Jesos Christ kagi kikendamonijidj.
13 Kigi nodagena8adok adi 8eckadj ka pi inadizian meg8adj e nosoneamaban Coda8innig odaiamie8ini8a. Ii apitc, nikitci nanekadjiabanig Kije Manido odanicinabeman ka teb8eta8a8apanin Jesosan, acitc nikitci nak8inaban e k8ag8e nici8anadjiag8a. 14 Nin na8adj nigi kitci nak8i e nosoneamaban Coda8inni aiamie8in apitc8in mane kodagiag Coda8innig tabickotc nin ka apitadizi8adj. Inigikigotc epitciaban nigi k8ag8e nosoneanan adi ka iji kikinoamage8apan 8eckadj nikitci anicinabeminabanig.
15 Misa8adj dac, nigi onabamig Kije Manido ab8amaci nta8igian, acitc nigi kitci ca8enimig e nd8e8emijidj kidji anokita8ag. Apitc dac ka onendamogobanen, 16 nigi minig kidji kikenimagin Og8izisan, kidji gi a8i 8idamaomagin ega ka Coda8inni8indjin omin8adjimo8in. Ii dac apitc, ka8in a8iag nidodji a8i k8ag8edjimasi adi ke ijitcigeian. 17 Ka8in kek8an Jerusalemikag nidodji ijasi kidji a8i nda 8abamag8a kodagiag Jesos Odanodaganan, aja kagi pi onabamagani8i8apan ab8amaci nin. Tiegodj, teci8ag Arabi (Arabie) aki nigi ija. Nage dac nigi koki ki8e Damas odenakag. 18 Panima ka ick8a nisopibonagag Jerusalemikag ka ijaian, Pien kidji nda nagicka8ag kidji gi ani kikenimag. Nijota8ate dac nigi 8idji tajikema. 19 Ka8in dac kodagian Jesos Odanodaganan nidodji 8abamasi8an, mi eta Jak (Jacques), ka Tibendjigedj o8idjiki8en.
20 Kije Manido nikikenimig e teb8eian oo ka ojibiaman. Ka8in nikagina8ickisi.
21 Mina8adj dac, Siria (Syrie) acitc Silisia (Cilicie) akikag nigi ija. 22 Ii dac apitc, ka8in maci nikikenimigosibanig igi8e Coda (Judée) akikag ka teb8eta8a8apanin Jesos Christan. 23 Ogi kikendana8aban dac eta adi ekidonipanin kodagian a8iagon e mikomijindjin: “Aa8e ako ka nanekadjiigo8akoban, aja nogom paba tibadjimo teb8etamo8ini ka kitci k8ag8e 8anadjitopan,” ikidobanig. 24 Midac ka iji icpenima8adjin Kije Manidon adi ka pi todaojindjin nipimadizi8inikag.