Min8adjimo8ini kagi ojibiag kitcit8a
Mak
Enadjimomagag oo mazinaigan
Meg8adj Jesos e pimadizigobanen, Mak (Marc) ke8in teban ii apitc. Opaba nosone8abanin Jesosan, pekic dac ka8in 8in acidagimagani8isigoban ka midatcin acitc nijindjin Jesos okikinoamaganan. 8idamage omazinaiganikag adi ka todamindjin Jesosan meg8adj e paba kikinoamagenigobanen. Mak okitci nda8endan kidji kikendjigadenig mi aa Jesos 8in Kije Manido Og8izisan acitc dac 8in aa8e Kije Manidon kagi ikidonipanin kidji pidjinijaogodjin. 8abadai8e e kitci macka8izindjin Jesosan meg8adj e kikinoamagendjin, meg8adj e kigeandjin a8iagon, meg8adj e sagidjinija8andjin madji manidon, acitc e kasiama8andjin a8iagon opatado8ini. Jesos ki ijinikandizo “Ka pi Anicinabe8iidizodj,” egi pijadj kidji migi8edj opimadizi8in kidji ag8acimadjin a8iagon ka iji patadindjin.
Mak nitam omikoman Cabadisan (Jean-Baptiste), e 8idamagedj adi ka iji pimadizinigobanen acitc adi ka iji kagik8enigobanen kidji an8endizonani8anig. Kegapitc dac 8idamage Cabadisan egi sigaada8andjin Jesosan, acitc 8idamage madji manidon egi k8ag8e 8agackibinandjin Jesosan kidji patadindjin 8edi pig8adakamigokag. Kegapitc Mak omikoman Jesosan e kagik8endjin acitc e kigeandjin a8iagon. Igi8e a8iagog ka nosone8a8apanin Jesosan, eckam eckam ogi ani nisidota8a8abanin. Pekic dac eckam eckam Coda8innig ka niganizi8adj na8adj odani madjenima8abanin Jesosan.
1
Adi Cabadis (Jean-Baptiste) ka iji paba kagik8edj
(Inabin acitc Matio 3.1-12; Lok 3.1-18; John 1.19-28)
Mi oo8e e odji madjitamagag min8adjimo8in, ka iji mikomagani8idj Jesos Christ, Kije Manido Og8izisan.
Niganadjimo8inni Isaia omazinaiganikag 8eckadj ki niganadjimogoban e ojibiigedj:
“Kije Manido ikido:
Niniganinija8a aa8e ke tibadjimodj nidikido8ini,
kidji nigani ojitamaok kimikanani adi ke ani ijaian.”Malachi 3.1
“A8iag kada tag8icin kidji pabibagidj pig8adakamigokag.
Mi oo8eni ke ikidodj:
Eco8iok kidji tag8icig ka Tibendjigedj.
Ojitamaok e k8aiakojimonig mikanani.”Ésaïe 40.3
Cabadis dac ki odji tag8icinogoban pig8adakamig. Sigaadagegoban acitc kagik8egoban oo8eni e ikidodj: “An8endizok acitc sigaadazok. Midac Kije Manido kiga kasiamago8a kipatado8ini8an.” Kitci mane a8iagog ka tajike8agobanen Coda (Judée) akikag acitc Jerusalem odenani ogi pi nda 8abama8an ini Cabadisan. 8idamage8agoban egi patadi8adj, Cabadis dac Jourdain sibikag ogi iji sigaada8agoban.
Ka nijo pik8aoganendjin a8esizi8aianan ijiogoban Cabadis, acitc pack8egino kitcipizonan okigicka8abanin opik8anakag. Papakinen inadjigegoban acitc amo sizibak8adoni pig8adakamigokag kagi iji mikag. O8idama8abanin a8iagon: “Aa a8iag nage ke pi tag8icig, na8adj kitci macka8izi apitc8in nin. Ka8in tibise nidapitendagozisi kidji camagian acitc kidji abiskobida8agin omakizinan. Nin nibikag kigi sigaadaonom. 8in dac, Mino Manidokag kiga iji sigaadago8a.”
Jesos ka sigaadazodj acitc ka k8ag8e 8agackibinagani8idj
(Inabin acitc Matio 3.13–4.11; Lok 3.21-22; 4.1-13)
Ii apitc, Jesos Nazaret odenajicikag ki odosegoban, Galilee akikag, acitc Cabadisan ogi sigaadagon Jourdain sibikag. 10 Apitc dac Jesos ka ag8azigobanen nibikag, ogi 8abadan 8ak8ig e cesenig, acitc ogi 8abaman Mino Manidon e pi najisendjin 8agidj 8inikag, mi maia omimi ka 8abizidj ejinagozindjin. 11 Midac ogi noda8an a8ian 8ak8ig e odji mad8e anim8endjin: “Kin Nig8izis ka kitci sagiinan. Kikitci min8endamiijinan.”
12 Teci8ag dac Mino Manido ogi ijinija8an Jesosan ka iji pig8adakamiganig. 13 Nimidana tasogon inigik Jesos ki tajikegoban 8edi pig8adakamig. Iima dac kitci madji manidon ogi k8ag8e 8agackibinigon Jesos. Pig8adakamig a8esizan o8idji tajikemabanin ii apitc, acitc ajenin o8idokagobanin.
Jesos onad8e8eman ni8in kigozike8innin
(Inabin acitc Matio 4.12-22; Lok 4.14-15; 5.1-11)
14 Kegapitc ki takonagani8i Cabadis. Jesos dac ki ija Galilee akikag, e paba kagik8edj min8adjimo8ini Kije Manidokag ka odjimaganig. 15 Ki ikido dac: “Aja peconag8ani Kije Manido Odogima8i8in. An8endizok dac acitc teb8etamok Kije Manido omin8adjimo8in,” ki ikidogoban Jesos.
16 Meg8adj e pimosepan tcigagam Galilee sagaiganikag, Jesos ogi 8abaman nijin kigozike8innin e taji pagida8andjin. Simo dac aa pejig ijinikazo, kodag dac mi ini o8idjiki8en, Andre ijinikazo8an. 17 Jesos dac ogi inan: “Pijaok! Nosoneocik! Kiga 8abadainom dac adi ke todameg kidji pidji8ineg8a a8iagog ninikag.” 18 Teci8ag dac ogi nagana8an odasabi8an. Midac ka iji nosone8a8adjin Jesosan.
19 A8acic 8edi ki iji madja Jesos, acitc ogi 8abaman nijin naben, Jak (Jacques) acitc o8idjiki8en John ka ijinikazondjin, mi ini Zebedee og8izisan. Otcimani8akag te8agoban, e taji 8a8ejaasabi8agobanen. 20 Apitc Jesos ka 8abamadjin Jakan acitc Johnan, teci8ag ogi nd8e8eman. Ogi nagana8an odadami8an tcimanikag kigi odanokitage8innimi8an. Midac ka iji nosone8a8adjin Jesosan.
Nabe ka kigickagodjin madji manidon
(Inabin acitc Lok 4.31-37)
21 Jesos acitc okikinoamaganan ki ija8agoban Kaponaom (Capernaüm) odenani. E Coda8inni aiamie kijiganig, Jesos ki pidige Coda8inni aiamiemigi8amikag acitc ki madjita kidji kikinoamagedj. 22 Kakina a8iagog ka noda8a8adjin ki kitci mamakadendamog adi ka iji kikinoamagendjin. Ka8in mega odji iji kikinoamagesi tabickotc Coda8inni kikinoamage8innig ka iji kikinoamage8apan odinakonige8ini8akag. Apitc e kikinoamagegobanen Jesos, kikenimagani8iban ako e kitci macka8izidj.
23 Kitata dac pejig nabe e kigickagodjin madji manidon ki pidige Coda8inni aiamiemigi8amikag. Ki pabibagi oo8e: 24 “8egonen neda8endaman nina8itinakag, Jesos Nazareti8inni? Kigi pi nda nici8anadjiijinam na? Kikikenimin, kin ka kitcit8a8izian, Kije Manido kagi pidjinijaogo8an.”
25 Jesos ogi kitci kaganonan ini8e madji manidon acitc ogi inan oo8eni: “Ponimon! Sagaan 8inikag!”
26 Aa madji manido ogi kitci mamadjibinan ini naben acitc ki odji sagaam o8ia8inikag e kitci pabibagidj. 27 Kakina a8iagog ki kitci mamakadendamobanig acitc ki k8ag8edjimidi8agoban: “8egonen dac ii? Ocki kikinoamage8ini ka kitci macka8izimaganig odaian 8aa nabe. Okaganonan 8a8adj madji manidon, onadotagon dac.”
28 Kitci 8ibadj dac mizi8ena Galilee akikag ki nodagani8an e mikomagani8idj Jesos.
Jesos okigean kitci mane ka akozindjin
(Inabin acitc Matio 8.14-17; Lok 4.38-41)
29 Jesos acitc okikinoamaganan ogi nagadana8a ii8e Coda8inni aiamiemigi8amini, midac teci8ag Simon acitc Andren omigi8aminikag ka iji ija8agobanen, Jak acitc John e 8idjiogo8adjin. 30 Simo ozigosan pimakocinobanin onibe8inikag, e kitci kijizo8apinendjin. Teci8ag dac ka tag8icig Jesos, ki 8idama8agani8i e akozindjin ini8e ik8e8an. 31 Ogi nda 8abaman dac acitc ogi na8adjindjibinan, midac ogi pazig8ian. Ki poni kijizo, acitc ki madjita kidji mikimodj aa ik8e kidji acamadjin kakina a8ian.
32 Apitc e ani onag8icinig, ka ick8a pagicimonig, ki iji8inagani8i8ag Jesosikag kakina ka akozi8adj acitc a8iagog ka kigickago8adjin madji manidon. 33 Kitci mane a8iagog iima odenag ka odji8apan ki ma8adjiidibanig pecodj ick8ademikag iima Simon omigi8aminikag. 34 Jesos dac ogi kigean mane a8ian anodjigotc ka inapinendjin acitc ogi sagidjinija8an ii apitc kitci mane madji manidon a8iagokag. Ka8in dac Jesos ododji pagidinasi8an ini madji manidon kidji anim8endjin, okikenimigobanin mega a8enen 8in maia.
Jesos Galilee akikag paba ija
(Inabin acitc Lok 4.42-44)
35 Kitci 8ibadj mina8adj e kijeba8acinig, ab8amaci mokaag kizis, Jesos ki 8anicka acitc ki sagaam Simon omigi8aminikag. Midac ag8adjik odenag ki ija, ega ka iji tani8anig, kidji nda aiamiedj. 36 Simo acitc o8idji8aganan ogi nanada 8abama8an Jesosan. 37 Apitc dac ka mika8a8adjin, ogi ina8an: “Kakina a8iagog kinanada 8abamigog.”
38 Jesos dac ogi inan: “Paba ijadan kodagian odenajican. Panima acitc ki kagik8eian 8edi, mi mega 8edji ki pijaian ooma.”
39 Ki paba ija dac mizi8e Galilee akini. Paba kagik8egoban pepakan Coda8inni aiamiemigi8amikag acitc osagidjinija8agoban madji manidon.
Jesos okigean pejig naben e omigi8apinendjin
(Inabin acitc Matio 8.1-4; Lok 5.12-16)
40 Pejig nabe e kitci omigi8apinedj ogi nda 8abaman Jesosan. Ogi pi nibak8ita8an acitc ogi kitci pagoseniman kidji kigeigodjin, e ikidodj: “Kicpin iji nda8endaman, kikackiton kidji kigeijian.”
41 Jesos ogi kitci kidimageniman. Ki tesindjita, acitc ogi saminan, e inadjin: “Kinada8enimin kidji kigean. Kigen sa dac.”
42 Teci8ag dac odakozi8in ogi pagidinigon aa nabe acitc ki kige. 43 Midac Jesos teci8ag ogi madjinija8an acitc 8e8enda ogi 8idama8an: 44 “Ndotan! Ka8in a8iag 8idama8aken egi kigeinan. Anic dac nda 8abadai Coda8inni aiamie ogima adi ejinagozian nogom, acitc migi8en ii pagidinige8ini Mois kagi inakonigedj kidji todjigadenig. Mi kidji gi teb8etamo8adj kakina a8iagog egi kigean.”
45 Misa8adj dac, aa nabe ki madja acitc ki paba tibadjimo adi ka iji8ebizidj. Ka8in dac mina8adj Jesos ogi odji kackitosin kidji 8abamagani8idj anodjigotc odenakag. Panima ag8adjik odenakag tajikegoban adi ega eji tani8anig. Kakina dac a8iagog ogi pi nda 8abama8an Jesosan, kakinagotc e odose8agobanen.