Kagi iji 8abadaagani8idj John
Enadjimomagag oo mazinaigan
Mi aa kitcit8a John kagi ojibiag oo mazinaigani, mi aa pejig Jesos okikinoamaganibanin, aa ka ojitodj mazinaigani “Min8adjimo8ini kagi ojibiag kitcit8a John” ka ijinikadenig. “Patmos” ka ijinikadenig minitigojicini meg8adj tegoban apitc ka ojitogobanen oo omazinaigan. Apitc e ani kitci comisi8igobanen, ki takonagani8igoban acitc ki ijinija8agani8igoban iima minitigokag, osa egi paba kagik8egobanen Kije Manidon odikido8ini.
John ogi ojibiama8agoban ka teb8etamindjin ka kitci kodagitondjin acitc ka kitci nanekadjiagani8indjin oteb8etamo8ini8a odji. Ani ana8endjige8agoban ka teb8etamo8adj, ka8in mega maci Jesosan ki koki tag8icisinigoban ooma akikag, kidji pi nda cagodjiandjin madji manidon. John dac ogi ojibiama8an kidji gi sogideecka8adjin acitc kidji gi sogi apacenimondjin Jesosikag.
Ooma dac mazinaiganikag, ki tibadjimo John adi kagi iji 8abadaigodjin Jesosan, kitci mane egi inabamodj. Kitci mane kegonan ogi 8abadanan, nandam ka kitci mamakadendag8anigin, acitc nandam ka kitci kotadendag8anigin. Apitc mikodagin odinabamo8inan, mojag ako odabadjiton ka pi ikidondjin 8eckadj niganadjimo8innin Kije Manidon Omazinaiganikag. Ka teb8etamo8adj kitci 8e8enda okikendana8aban Kije Manidon Omazinaigani acitc dac kitci 8e8enda onisidotana8aban adi 8a igo8apanin Johnan. Kodagiag dac 8in a8iagog okitci sanagiigona8aban kidji nisidotamo8adj.
Nogom dac ogajigag, igi8e ka nanada kikendamo8adj Kije Manidon Omazinaigani, ka8in kakina pejig8an ododji nisidotasina8a adi 8a ikidomaganig ii mazinaigani Johnan kagi ojibiamindjin. Anic dac maia nisidotag8ani ma8adji ka kitci apitendag8anig kegoni eji kikinoamagemagag ii mazinaigan. Kitci macka8izi nogom madji manido ooma akikag, ka8in dac kabegotc kada macka8izisi. Kije Manido oga koki pidjinija8an Jesos Christan kidji pi nda cagodjiandjin kakina ega ka icpenimigondjin acitc kidji tibakonandjin. Madji manido dac 8in, maiagotc kada cagodjiagani8i acitc kada nici8anadjiagani8i. Kije Manido dac oga minan ocki akini acitc ocki 8ak8ini odanicinabeman.
1
John 8idamage adi eji kikendagin ini kegonan
1 8adan ono8e Jesos Christ kagi 8abadaadjin ini8e ka anokita8andjin Kije Manidon. Kije Manido ogi minan Jesosan kidji 8abadaandjin kakina a8iagon ka anokitagodjin, kidji gi kikendamindjin adi aja pecodj ke iji8ebanig. Midac Jesos nigi pidjinijaamag ajenin kidji pi nda 8abadaijindjin ini kegonan, nin John ka anokita8ag. 2 Nin dac kakina nigi ojibian adi ka iji 8abadaman. Mi gotc maia Kije Manido odikido8in nigi ikidonan, Jesos Christ kagi 8abadai8edj e teb8emaganig. 3 Aa a8iag ke nabo8adagin ini ikido8inan, kodagian a8iagon kidji gi ndotamindjin, kada ca8endagozi. Igi8e dac ka ndotamo8adjin acitc ka pabamitamo8adjin adi ekidomaganigin Kije Manidon otibadjimo8inan, ke8ina8a kada ca8endagozi8ag. Aja mega peconag8an kidji iji8ebagin ini kegonan.
John odanamika8an ka teb8etamindjin
ka nij8atcidinigin odenan ka taji ma8adjiidindjin
ka nij8atcidinigin odenan ka taji ma8adjiidindjin
4 Nin, John, kidojibiamonom, kina8a ka teb8etameg, ka nij8atcigin odenan 8edi Eja (Asie) aki ka taji tajikeieg, ka ma8adjiidieg kidji aiamieieg.
Nipagosenima Kije Manido kidji ca8enimigo8eg, acitc kidji minigo8eg pekadendamo8ini, 8in nogom ka pimadizidj, kagige kagi pi pimadizidj, acitc ke pi tag8icig. Nipagosenimag igi8eni8ag nij8atcin manidog ka te8adj nigan Kije Manidon okitci ogima8i tesabi8aganikag ke8ina8a kidji ca8enimigo8eg acitc kidji minigo8eg pekadendamo8ini. 5 Nipagosenima acitc Jesos Christ kidji ca8enimigo8eg acitc kidji minigo8eg pekadendamo8ini, 8in kabe ka teb8edj e mikomadjin Kije Manidon. 8intam kagi abidjibadj. 8in okackakanan kakina ogiman ka tacindjin 8akidakamig.
Kisagiigonan sa, acitc ki pagidenimidizo kidji nibodj kina8it odji, ega 8ikad mina8adj kidji tibenimigo8akonin kipatado8ininanan. 6 Kigi ma8adjiigonan Odogima8i8inikag, kidji anokita8aiak Kije Manidon 8in Odadaman. Kagige icpendagozi acitc macka8izi Jesos Christ. Amen!
7 Ndotaocik 8e8enda! Nena8idj 8ak8ikag kada odji pi najise. Kakina a8iagon oga 8abamigon, 8a8adj ini8e kagi pajibaogodjin. Kakinagotc adi enakanezi8adj a8iagog ooma akikag kada odji ma8i8ag ke apitci kackendamo8adj. Mi teb8e ke iji8ebag. Amen.
8 “Nin kagi madjito8an kakina kegon acitc nin niga ick8aikan kakina kegon,” ikido Kije Manido ka Tibendjigedj ma8adji ka kitci macka8izidj, 8in nogom ka pimadizidj, kagige kagi pi pimadizidj, acitc ke pi tag8icig.
John o8abaman Jesosan e ijinag
9 Nin John, kidjiki8e8a. Jesosikag ka iji mama8iseiak, kakina kikodagitomin, kakina kidiji tibendagozimin Jesos Odogima8i8inikag, acitc kakina kicacibendananan meg8adj e animiziak. Nin dac, nigi takonigo acitc nigi iji asigo ooma minitigokag, Patmos ka ijinikadeg, osa mega nigi kagik8e Kije Manido odikido8in, acitc nigi 8idamage adi ka pi todag Jesos. 10 Nigodin e aiamie kijigag, Mino Manido nigi pidigeckag. Odakanag ninikag nigi noda8a a8iag e kitci sogitagozidj tabickotc podadjigani nodag8atcigan. 11 Midac ka ikidodj: “Mazinaiganikag ojibian nogom adi eji 8abadaman. Ijinijaamaok dac ii mazinaigani ka teb8etamo8adj ka taji ma8adjiidi8adj ono8e ka nij8atcinigin odenan, 8edi Epes (Ephèse), Simina (Smyrne), Penigam (Pergame), Taiatina (Thyatire), Sanidas (Sardes), Piladelapia (Philadelphie), acitc Leadisia (Laodicée),” ki ikido.
12 Nigi k8ekigaba8inan kidji 8abamag a8enen ka aiamiijidj. Nigi 8abadanan dac nij8atcin pimide 8asakonendjiganatigon ka oza8iconia8agin. 13 Iima nena8idj nigi 8abama pejig a8iag nozem nabe ejinagozidj. Pinici ozidikag ak8eganiban okonas, acitc oza8iconia kitcipizonan okigicka8abanin 8ajagam okakiganikag. 14 Mi maia mantcenic ka kitci 8abizidj epitci 8abadibepan, kek8an kon ka kitci 8abagonagizidj. Mi maia ickodeni ejinag8anigibanin ockijigon. 15 Mi maia oza8abiko conia epitci tcakidenigibanin ozidan, acitc kitci 8asik8ateanibanin. Mi maia tabickotc nibi ka kotade8edji8ag epitci kitci kiji8epan. 16 Nij8atcin 8anagocan otakonabanin okitcinikikag. Kitci mokomani nida8ina e kacanig sagackineniban odonikag. Mi maia kizis ka kitci tcakasigedj e abitakijiganig epitci 8aseig8epan. 17 Apitc ka 8abamag, nigi medjim8adji pagicin ozidikag, tabickotc a8iag ka nibodj. Midac okitcinik nigi saminig e ikidodj: “Ka8in segiziken. Nin nitam ka tedj acitc nin ick8eag ke tedj. 18 Nin aa ka pimadizidj. Nigi nibonan, anic dac aja kagige niga pimadizinan. Nin nitibendan nibo8in acitc iima taji ka te8adj a8iagog kagi nibo8adj. 19 Ojibian dac oo8e ke 8abadaman, nogom ka iji8ebag acitc ke ani iji8ebag. 20 Igi8e dac ka 8abamad8a nij8atcin 8anagocag ka takonag8a nikitcinikikag acitc ini8e nij8atcin pimide 8asakonendjiganatigon ka oza8iconia8agin, kiga 8idamon adi 8a ikidomagagin. Igi8e nij8atcin 8anagocag, mi ini8e Kije Manido ka ijinija8adjin tibadjimo8innin kidji nagadjiandjin ka teb8etamindjin iima ka taji ma8adjiidindjin ka nij8atcinigin odenan. Ini8e dac nij8atcin pimide 8asakonendjiganatigon, mi igi8e ka teb8etamo8adj ka taji ma8adjiidi8adj iima ka nij8atcinigin odenan.”