Yëkkuö skà kit Pablo tö Timoteo a̱, i' ta̱ ide böt
2 Timoteo
Pablo bak wötëulewa̱ Roma s'wöto wé a̱, e' yënettsa̱ duas dabom teryök ena teryök kí̱ böt Jesús kune'bak e' ukuöki̱ (60-62 DC) e' ulatök. E' ukuöki̱ ta̱ ie' skà minea̱ Jesús tté buaë pakök i' ta̱ ide tkëtökicha. E' ké̱wö ska' ie' tö yëkkuö tsá̱ kit Timoteo a̱ ena Tito a̱. E' ukuöki̱ ta̱ wëm kiè Nero e' yöne Roma blúie eta̱ Pablo skà wötënewa̱ne s'wöto wé a̱. Mik ie' tso' wötëule e' dalewa ie' tö yëkkuö i' kit Timoteo a̱. I' ëtökicha Pablo wötënewa̱ kua̱'ki̱. Ke̱we ie' bak wötëule iwák u a̱. I' ëtökicha ie' wötënewa̱ ká̱ suluë ena se̱se̱ë ese a̱. Ñies ie' monewa̱ tabechka kicha wa. Ie' wa̱ ijche̱r tö e' dör ie' kanè bata, e' kue̱ki̱ yëkkuö i' kit ie' tö Timoteo a̱. I' es ie' tö ikit. Et: Pablo ittsë' tö ie' a̱te̱ ekörla e' kue̱ki̱ ie' siá̱newa̱. Wëpa kiè Figelo ena Hermógenes dör ie' wapiepa e'pa tö ie' méa̱t. Ñies wëm kiè Demas e' ena imale̱pa skà tö ie' méa̱t. E' kue̱ki̱ ie' ki̱ ikiane tö Timoteo bitu̱ bet ie' ki̱muk.
Böt: Jesús mik e̱rblökwakpa we'ikeke sia̱rë Roma blú ñe' tö, e' ki̱ Pablo tkirke tai̱ë. E' kue̱ki̱ ie' tö Timoteo patté tai̱ë tö ie' ka̱wöta̱ e̱' tkökwa̱ darërë Jesús ttè a̱. Ñies ie' tö Timoteo a̱ ichè tö ie' ka̱wöta̱ Jesús tté buaë e' kí̱ wa s'wöbla'u̱k. E' kí̱ieta̱ ie' tö Timoteo a̱ ichè tö ie' ka̱wöta̱ e̱' chöktke weinuk Jesús tté buaë kue̱ki̱.
Yëkkuö i' tö se' a̱ ikkachè tö we̱s se' ka̱wöta̱ se̱nuk Jesús a̱. Ñies se' a̱ ichèitö tö se' ka̱wöta̱ e̱' chök weinuk Jesús mik e̱rblè kue̱ki̱. We̱lepa tö ibikeitsè tö i' dör yëkkuö bata kit Pablo tö e'.
1
Shke̱'wè̱
1 Ye' dör Pablo. Skëköl wák e̱r wa ye' dör Cristo Jesús ttekölpa tsá̱, e'pa eköl. Ie' kablé se̱ne michoë muk wé̱pa batsulewa̱ Cristo Jesús mik esepa a̱, e' tté pakök ye' patkë'itö. 2 A Timoteo, ye' tso' yëkkuö i' shtök be' a̱. Be' dalër tai̱ë ye' é̱na we̱s ye' wák alà es. Skëköl dör S'yë́ ena Skëkëpa Cristo Jesús, a̱s e'pa e̱r buaë chö̀ be' a̱ ena be' sa̱ù̱ e̱r sia̱rë wa ñies se̱ne bë̀rë mù be' a̱.
Pablo wëstela ché Skëköl a̱ Timoteo dalërmik
3 Skëköl dalöieke ye' tö e̱rbikè maneneë wa we̱s ye' yë́pa bak ká̱ ia̱ia̱ë idalöiök es. Ke̱kraë mik ye' ttöke ie' ta̱ ñië nañeë, eta̱ ye' e̱r a̱rke be' ska' ta̱ wëstela chekeyö be' dalërmik. 4 Mik ye' minea̱, eta̱ be' i̱i̱' sia̱rë. Mik e' a̱newa̱ ye' é̱na, eta̱ ttsëskua ye' mú be' suè̱ne a̱s ye' ttsë'rne buaë. 5 Ñies ye' é̱na ia̱ne tö be' e̱rblöke Jesús mik e̱r moki̱ wa. Ye' wa̱ ijche̱r buaë tö be' e̱rblöke Skëköl mik we̱s be' wi̱'kela Loida ena be' mì Eunice e'pa e̱rblë' imik ke̱we be' yöki̱ es.
Kë̀ be' jaënuk Jesús tté buaë pakök
6 E' kue̱ki̱ ì me' Skëköl tö be' a̱ kanebloie ie' a̱ mik ye' ulà me'ka̱ be' ki̱ eta̱, e' kë̀ olo'yar, e' kí̱ wakaneú̱ bua'iewa̱. 7 Skëköl kë̀ wa̱ se' a̱ iWiköl mène a̱s se' suar. E' skéie iWiköl tö se' a̱ diché mé se̱noie yësyësë ie' a̱, ñì dalëritsoie, ñies e̱rbikoie buaë yësyësë. E' kue̱ki̱ be' kaneblö́ Skëköl a̱ kë̀ suarta̱'. 8 Kë̀ be' jaënuk Skëkëpa Jesús tté buaë pakök. Ñies ye' tso' wötëule Jesús tté pakè kue̱ki̱, e' kë̀ ki̱ be' jaënuk. E' skéie ye' tö be' a̱ ichè tö be' e̱' chö́ se' weirke Jesús ttè kue̱ki̱ e' dalë'ttsök ye' ta̱ Skëköl diché wa.
9 Skëköl wák tö se' tsa̱tkë'ttsa̱
ñies ie' tö se' klöo̱' se̱nuk batse'r ie' a̱.
E' kë̀ dör tö se' tö ì buaë wé̱ ie' a̱ e' skéie.
E' dör tö ie' wák tö ibikeitsé es ta̱ iwawé̱itö,
ie' e̱r buaë chè se' a̱, e' kue̱ki̱.
Ka̱m ká̱ i' yör e' yöki̱ ie' tö ibikeits
tö ie' e̱r buaë chöraë se' a̱ Cristo Jesús batamik.
10 Cristo Jesús dör S'tsa̱tkökwak e' dë'rö ká̱ i' a̱
se' a̱ ikkachök tö Skëköl e̱r buaë ché se' a̱.
Ie' köte̱wa̱ shke̱neka̱ne, e' wa ie' tö iwà kkaché
tö ie' e̱' aléka̱ duèwa̱ ki̱.
Ie' tté buaë e' tö se' a̱ ikkacheke
tö se' kë̀ duö̀pawa̱ da'a̱,
e' skéie se̱ne michoë döraë se' ulà a̱
ie' tté buaë e' batamik.
11 Ttè buaë e' wà pakök ena s'wöbla'u̱k iwa Skëköl tö ye' klöo̱' Jesús ttekölpa tsá̱ e'pa ekölie. 12 E' kue̱ki̱ erë́ ye' weirke, erë ye' kë̀ jaëne e' ki̱. Yi mik ye' e̱rblöke, e' mik ye' bàtse̱ buaë, e' dör Jesús. Ye' wa̱ ijche̱r buaë tö kanè me' Skëköl tö ye' a̱ e' kkö'neraë ie' wák tö dö̀ mik Skëkëpa Jesús datskene eta̱. E' kue̱ki̱ ye' kë̀ jaëne weinuk ie' dalërmik.
13 Ttè yësyësë wa ye' tö be' wöblao̱' e' wà iu̱tö́. Be' e̱' tkö́wa̱ darërëë e̱rblök Jesús ë̀ mik. Ñies s'male̱pa dalëritsö́ Cristo Jesús batamik. 14 Ttè moki̱ë mène be' a̱, e' wà kkö'nú buaë Wiköl Batse'r tso' se' a̱ e' wa a̱s kë̀ yi tö imane'ù̱ttsa̱.
15 Be' wa̱ ijche̱r buaë tö s'yamipa se̱rke Asia, e'pa se̱raa̱ iekkë ta̱ ye' watë'ttsa̱, e'pa böl kiè Figelo ena Hermógenes. 16 Erë Onesíforo kë̀ jaëne ye' tso' wötëule e' ki̱. Ke̱kraë ie' tso' ye' e̱r pablök. A̱s Skëkëpa Jesús tö ie' ena iyamipa sa̱ù̱ e̱r sia̱rë wa. 17 Mik ie' de í̱e̱ Roma, eta̱ ie' tö ye' yulé poë ta̱ ye' wakué̱itö. 18 Skëkëpa Jesús datskene, mik e' ké̱wö de eta̱ a̱s ie' tö Onesíforo sa̱ù̱ e̱r sia̱rë wa. Be' wa̱ ijche̱r buaë tö we̱kkë ie' tö se' ki̱me' Éfeso.