Jonás dör Jehová ttéköl e' pakè
Jonás
Yëkkuö i' tö se' a̱ ipakè tö ì bak Israel aleri eköl kiè Jonás e' ta̱. Ie' kaneblë' Skëköl ttekölie duas cien paryök ena duas cien kuryök ki̱ dabom ske̱yök (800-750 AC) e' shu̱ ulatök ka̱m Jesucristo ku̱r e' yöki̱.
Skëköl kë̀ wa̱ ie' patkëne Israel aleripa male̱pa pattök we̱s Skëköl ttekölpa male̱pa patkéitö es. E' skéie ie' tö ie' patkë' ká̱ kiè Nínive, e' wakpa pattök. Nínive dör ká̱ kiè Asiria e' ká̱ kibi. Asiria wakpa dör Israel aleripa bolökpa kibi. Ie'pa se̱rke suluë tai̱ë shu̱te̱ Skëköl wöa̱. E' kue̱ki̱ ie' tö Jonás patké ichök ie'pa a̱ tö ká̱ de dabom tkëyök eta̱ ie'pa e̱rdawa. Jonás wa̱ ijche̱r tö Skëköl tö s'suè̱ e̱r sia̱rë wa. Ie' ibikeitsé: “Nínive wakpa e̱r mane'wé̱, e' ta̱ ie'pa nuì̱ olo'yeraë Skëköl tö ie'pa ki̱.” Erë ie' ki̱ ikiane tö Skëköl tö ie'pa e̱wè̱wa, e' kue̱ki̱ ie' kë̀ shkakmi ie'pa pattök. E' skéie ie' tö ima'wé̱ tkökshkar bánet Skëköl yöki̱. Erë Skëköl tö ie' wöklö'wé̱ ta̱ ipatkémi Nínive wakpa pattök wake'. Ie'pa e̱r mane'wé̱, e' kue̱ki̱ Skëköl kë̀ wa̱ ie'pa e̱o̱newa.
Yëkkuö i' wa se' é̱na ia̱ne tö Skëköl tö ká̱ ulitane wakpa suè̱ e̱r sia̱rë wa. Ì sulu wamblekesö ese nuí̱ olo'yak ie' é̱na se' ki̱. Ie' ki̱ ikiane tö se' e̱r mane'ù̱ ie' a̱ a̱s kë̀ ie' tö se' we'ikö̀.
1
Jonás kë̀ é̱na Jehová ttö̀ iu̱tak
Etökicha ta̱ Jehová tö iché itteköl kiè Jonás dör Amitai alà, e' a̱: “Be' yú ká̱ kibi kiè Nínive ee̱, ta̱ ichö́ ká̱ e' wakpa a̱ we̱s a' e̱' wamblö̀ e' dör suluë ye' wöa̱, e' kue̱ki̱ ye' tö a' e̱we̱rawa.”
Erë ie' kë̀ é̱na Jehová ttö̀ iu̱tak. E' kue̱ki̱ ie' tkashkar iyöki̱. Ie' mía̱ dayë kkömik ká̱ kiè Jope wé̱ kanò irirke ee̱. Ee̱ ie' tö kanò kué̱ etö mitke ká̱ kiè Tarsis e' patué̱itö shkomi ta̱ ie' e̱' iéka̱ iki̱ ta̱ imía̱.
Erë Jehová tö sërkë patké ie'pa ki̱ tai̱ë darërëë. E' tö kanò u̱yé tai̱ë dö̀ wësua itskirwa̱mi. Eta̱ ko̱s ie'pa tso' kanò a̱, e'pa suane tai̱ë. Ie'pa eköl eköl tö ikieke a̱neule iwák këköl a̱: “¡Sa' tsa̱tkö́, sa' tsa̱tkö́!” Eta̱ dalì ko̱s tuléttsa̱mi dayë ki̱ a̱s kë̀ kanò katsi̱rwa̱.
Erë Jonás e̱' a'wa kanò shu̱a̱ dalì bló wé a̱, ee̱ ie' kapötër tai̱ë. Eta̱ kanò ñakökwak mía̱ dö̀ wé̱ ie' kapötër ee̱ ta̱ iché ia̱:
—¿Iö́k be' kapötër? ¡Be' e̱' kö́ka̱! Be' këköl a̱ ikiö́ a̱s ie' tö se' tsa̱tkö̀. Isalema ie' se' suè̱mi e̱r sia̱rë wa ta̱ se' tsa̱tkèmiitö.
E' dalewa kanò wakpa male̱pa tö iché ñì a̱:
—Mishka itötkök isuo̱ie yi ia̱ne iwiie e' kue̱ki̱ se' weirke i' es.
Eta̱ iwëne tö Jonás idir. E' kue̱ki̱ ie'pa iché ie' a̱:
—Ichö́ sa' a̱, ¿ì kue̱ki̱ ì sulu i' tköke se' ta̱? ¿Iö́k be' e̱' iébitu̱ kanò i' a̱? ¿Wé̱ be' datse̱? ¿Yi ditséwö be' dör?
Ie' iiu̱té:
—Ye' dör hebreowak. Jehová dör Skëköl tso' ká̱ jaì a̱ e' dalöiökwak ye' dör. Ie' tö dayë ena ká̱ i' yö'a̱t.
10-11 Ie' tö ie'pa a̱ ipaké tö ie' tso' tkökshkar Jehová yöki̱. Mik e' ttsé ie'pa tö ñies isué̱rakitö tö dayë kí̱ ulune tai̱ë, eta̱ ie'pa suane tai̱ë shu̱te̱. Ie'pa tö ie' a̱ ichaké:
—¿Ì wè̱mi sa' tö be' ta̱ a̱s sërkë wöklörwa̱?
12 Ie' tö iiu̱té:
—Ye' wa̱ ijche̱r buaë tö ye' kue̱ki̱ sërkë i' bitsi̱neka̱ tai̱ë a' ki̱. E' kue̱ki̱ ye' u̱yö́mi dayë a̱ eta̱ sërkë wöklördawa̱.
13 Erë kanò wákpa tö kanò iklémi darërëë a̱s irirka̱. Erë kë̀ ie'pa diché dë'ka̱, dayë kí̱ ulune tai̱ë e' kue̱ki̱. 14 Eta̱ ie'pa tö Jehová a̱ ikié i' es: “A Jehová, kë̀ sa' maktsa̱ duökwa̱ wëm i' kue̱ki̱. I' u̱k be' tso' sa' ta̱, e' we̱kebö we̱s be' ki̱ ikiane es. E' kue̱ki̱ wëm i' kë̀ ki̱ ì nuí̱ ta̱', e' ta̱ sa' tö ie' u̱yekemi dayë a̱ e' nuí̱ kë̀ marka̱ sa' ki̱.”
15 E' ukuöki̱ ta̱ ie'pa tö Jonás u̱yémi dayë a̱, eta̱ sërkë wöklönewa̱ ta̱ dayë mía̱ne a̱lmië. 16 Mik kanò wákpa tö e' sué̱, eta̱ ie'pa suane tai̱ë Jehová yöki̱ ta̱ idalöiérakitö tai̱ë. E' ukuöki̱ ta̱ ie'pa tö iyiwak jché ña'wé̱ mè Skëköl a̱ idalöioie, ñies ie'pa tö ttè mé ie' a̱ tö sa' tö be' dalöieraë.
17 Eta̱ Jehová tö nima bërie shu̱te̱ patké etö Jonás mulu̱kwa̱. Eta̱ nima e' tö imulé̱wa̱ ta̱ ee̱ nima shu̱a̱ ie' se̱né döka̱ ká̱ mañat ñië nañeë.