Primera Carta a Timoteo
Kjibokwo ëre tara Pablorë Timoteo kong
Kjibokwo ëre sorë
Domer shäng kjl̈ara ko Pablo. E Sbö tjl̈õkwo l̈aga Jesús ãska wl̈eniyo. Domer shäng kjl̈ara obi ko Timoteo. E data Grecia so, mekë judío. Dëna mite obishko ga sök Listra kjokyo. Eshko ga Jesús roy pjl̈ú l̈ara Pablorëshko ga tjl̈õkwo kjrara. E irgo ga e kjrara Pablorë beno shäng parkë ba tjok, tak pjang Hechos 16.1-4 go sorë l̈i eni. E irgo ga parkono ara Jesús roy pjl̈ú l̈ë kjok shto obl̈ë obl̈ë.
Pjl̈ara ga parkë shäng Éfeso kjokyo, Jesús tjl̈õkwo kjragaga l̈öng eshko l̈i kägäyo. Sök eshkoshko ga kjibokwo ëre tara Pablorë ba kong. Woyde ga Jesús tjl̈õkwo kjraga kägäyoga parkë sorë l̈i tara ba kong. Nopga wl̈ẽy pak obl̈ë obl̈ë shäryë sorë l̈i tara ba kong. L̇l̇ëbo owa shärye Jesús tjl̈õkwo kjragaga l̈öng eshkorë l̈i l̇l̇gweya sorë l̈i tara ba kong bakoe.
1
Kjibokwo ëre taga tja Pablorë. Sbö, e bi döga. Koshëy l̈öng l̈i, e Cristo Jesús. Tja kjrara, ichara l̈ok ber ba tjl̈õkwo roy l̈aga Cristo Jesús ãska.
Timoteo, kjibokwo ëre ichër jek bop kong. Pja mär Cristo Jesús go, pinor bop kong sorë l̈i eni. E kjĩshko ga pja bor wa wl̈eni.
Rokër Data Sbö kong, bi Tjl̈apga Cristo Jesús kong ga ba wopjl̈ú l̈i kjĩshko ga pja kjimte l̈ok ara, pja songe l̈e ĩyado, pja ie l̈ok ber shäng wl̈ẽp bakoe.
Nopga oba ping tjl̈õkwo bek l̇l̇ëm l̈i go wl̈eniyo
3-4 Éfeso kjokyo ga kjong kjong l̈öng oba ping tjl̈õkwo bek l̇l̇ëm l̈i go. Tja jek öör Macedonia kjokyoshko ga pja rokoror ber sök Éfeso kjokyo wl̈o. Pja ichoror tjl̈ẽ nopga l̈öng eshko l̈i kong ga «Tjl̈õkwo bek l̇l̇ëm l̈i l̈ëy ame. L̇l̇ëbo weno tjl̈apgaga tek dënashko so kong l̈i l̈ëy ame. E jyõ bakoe. Ga pjãy kjl̈ara kjl̈ara tjëyo kjone dey l̈i, l̈ëy ga pjir l̇l̇ëme. E kjĩshko ga e l̈anyotkëy ame. E l̈anyotkoromi ga oba ëngl̈ë kar kar erä. Woyde Sbörë ga shji mär ba go shara, shji ber l̈öng ba pak l̈i shäryë wl̈o.»
Pja ichoror eni, shji Jesús tjl̈õkwo kjragaga ëng woydë ara kar kar wl̈o. Shji ëng woydë wl̈o ga woyde ga l̇l̇ëye owa woyotjl̈ĩy l̇l̇ëm, l̇l̇ëbo pjl̈ú miydëy l̈i shäryëy eni, shji mär Jesús go jl̈õkoyo bakoe. Kjong kjong omshäryë l̈öng ame. L̇l̇ëbo tjwl̈õ l̇l̇ëm l̈i l̈anyotke beno l̈öng eröe. Opyë woydë ber l̈öng no pingga kjok l̇l̇gwekkl̈o tara Moisésdë l̈i go. L̈e l̈öng jl̈õ wl̈eni, gueniyo jl̈õkoyo ga l̇l̇ëye l̈e l̈öng l̈i, e l̇l̇ë l̈okl̈o miyde l̈öng l̇l̇ëme.
Miydëy pjl̈ú ga kjok l̇l̇gwekkl̈o l̈i, e pjl̈úe. Gueniyo l̇l̇ëno wl̈o, woyde ga miydëy pjl̈ú guing. Kjok l̇l̇gwekkl̈o l̈i, e twara Sbörë beno oba jëk l̈öng pjl̈o bëy l̈i l̇l̇gwekkl̈o l̇l̇ëm, e twara beno oba jëk l̈öng l̇l̇ëbo owa shäryë l̈i l̇l̇gwekkl̈o. E beno ëye kjok l̇l̇gwekkl̈o kol̈ë l̇l̇ëm l̈i l̇l̇gwekkl̈o, ëye l̇l̇ëbo owa shäryako l̇l̇ëm l̈i miydë pjl̈ú gueniyo shärye enido l̈i l̇l̇gwekkl̈o, ëye, ba kong ga Sbö tjwl̈õ l̇l̇ëm l̈i l̇l̇gwekkl̈o, ëye owa shäryë enido l̈i l̇l̇gwekkl̈o, ëye Sbö kol̈ë l̇l̇ëm l̈i l̇l̇gwekkl̈o, ëye Sbö bangkjrë l̇l̇ëm l̈i l̇l̇gwekkl̈o, ëye ba data, ba mekë zrök l̈i l̇l̇gwekkl̈o, ëye no obl̈ë zrök l̈i l̇l̇gwekkl̈o, 10 ëye pë no orkwosmono ba tjok l̇l̇ëm tjok l̈i l̇l̇gwekkl̈o, domer pë domer obl̈ë tjok l̈i l̇l̇gwekkl̈o, ëye no shak ga soyneya obl̈ë kong ä l̈i l̇l̇gwekkl̈o, ëye jyõrkë ä l̈i l̇l̇gwekkl̈o, ëye tjl̈ẽ jl̈õkoyo gueniyo obl̈ë jyõyotke shdungoba wl̈o ä l̈i l̇l̇gwekkl̈o bakoe. Shärye enishko ga tjl̈õkwo bek l̈i shäryayde l̈öng l̇l̇ëme. 11 Tja kjrara, ichara Sbörë ba tjl̈õkwo roy pjl̈ú l̈ë oba kong. Sbö, e wopjl̈úe.
Pablo kjimtara Tjl̈apgarë ara
12-13 Dënashko ga Sbö l̈ãywër shäng owa, ba tjl̈õkwo kjragaga irpjan shäng, l̇l̇ëbo owa shäryër ba kong wl̈o. Gueniyo eshko ga tja songe l̈ara Sbörë, l̇l̇ëye shäryër shäng l̈i owa miydoror shäng l̇l̇ëm kjĩshko, ba tjl̈õkwo kjrotë l̇l̇ëm obi kjĩshko bakoe. Eni ëmdë ga tja ĩna bi pjl̈uyo Cristo Jesúsdë ga parkaga pjl̈ú wl̈eniyo, ga tja iara beno shäng ba parkaga shara, tja kong dbo twara shäryër wl̈o. E kjĩshko ga tja wopjl̈ú ba tjok. 14 Tjl̈apga wopjl̈ú l̈i kjĩshko ga tja kjimtara ara anmoyõ. Tja töna beno tjeng Cristo Jesús tjok kjĩshko ga tja iara beno shäng mär ba go, ga tja iara obl̈ë woydë ara baĩya dik.
15 «Cristo Jesús öör kjok ëre kjing go nopga owa l̈i döga» l̈ëba eni ĩyadoe. E eni jl̈õe. Tjl̈õkwo ëre kjrako. Tjara l̇l̇ëbo owa shäryono ara, oba uunkong kjinmo. 16 Tja owa anmoyõ kjĩshko ga tja songe l̈ara Sbörë, ga tja kjimtara, ĩya nopga mär l̈öng ba go l̈irë wl̈o. E go ga miyde l̈ok ga Jesucristo, e iirkë bi kong mal̈ing l̇l̇ëm, ga ëye omtjl̈õkwo kjrë ga kjimte, ga ie ber l̈öng së ĩyado ba tjok bakoe. 17 E kjĩshko ga Sbö, e poshrëy, iëy ber kësbang, tjwl̈õ ara ĩyado. Bi pjl̈uyo sök ĩyado, wol̈on l̇l̇ëm, ĩgöy l̇l̇ëm, Sbö kjl̈araso l̈i e. Ber eni.
18 Timoteo, pja bor wa wl̈eni. Dënashko ga pja parkë Sbö kong sorë l̈ara Sbörë bi pjeyoga kjone kjone kong, ga epga oml̈ono bi kong. Tjl̈õkwo l̈ër bop kong shäryëp wl̈o l̈i ëre, e l̈ër bop kong, pak l̈ara l̈ok tek dënashko l̈i shäryëp pjl̈ú anmoyõ wl̈o. 19 Eni ga pja mär shäng Jesús go jl̈õkoyo, ga l̇l̇ëbo pjl̈ú miydëp l̈i shäryëp eni. Kjone kjone omshäryono eni l̇l̇ëme. E kjĩshko ga epga jëk Sbö tjok ame. 20 Himeneo omshäryono eni, Alejandro bakoe. E kjĩshko ga ioror beno tjeng Ä wl̈oshko. E goshko ga opping bi Sbö, e l̈ãywe owa ame wl̈o.