Tercera Carta de Juan
Kjibokwo ëre tara Juandë
Kjibokwo ëre sorë
Domer shäng kjl̈ara ko Juan. Dënashko ga e Jesús oppingga. Jesús wol̈ono, ga woshrara Sbörë iröng obi irgo ga Juan beno shäng Sbö tjl̈õkwo l̈aga Jesús ãska wl̈eniyo shara. Kjibokwo ëre tarashko ga e tjl̈abl̈a tjän.
Domer shäng kjl̈ara obi ko Gayo. Pjl̈ara ga nopga ichara Juandë Jesús roy pjl̈ú l̈ë ba kong. Gueniyo domer shäng kjl̈ara eshko ko Diótrefes, e domer tjwl̈õ ara wl̈eniyo. E kjĩshko ga nopga ichara Juandë l̈i wl̈okjre woydë l̇l̇ëme. E kjĩshko ga kjibokwo ëre tara Juandë Gayo kong, ber shäng sjëk Diótrefes tjok wl̈o. Gueniyo nopga ichara l̈i wl̈okjrara Gayorë wopjl̈ú kuzong ga Juan beno shäng wopjl̈ú ba tjok, ga woyde ga wl̈okjre eni jek obi l̈i tara ba kong.
1
Kjibokwo ëre taga tja bomi tjl̈apgarë.
Gayo, kjibokwo ëre ichër jek bop kong. Pja bor kjl̈ara, pja woydër ara jl̈õkoyo.
Pja bor kjl̈ara. Miydër pjl̈ú ga pja jëk shäng pjl̈ú Sbö tjok. Eni ga rokër Sbö kong ga pja kjimte, bop doyo ber pjl̈ú eni bako wl̈o. Pja roy söra bi pjeyoga kjone kjonerë bor kong. Kuror ga pja mär shäng Jesús go jl̈õkoyo, pja jëk shäng tjl̈õkwo bek l̈i go bakoe. E kjĩshko ga tja wopjl̈ú anmoyõ. Roy kur ga bor wapga wl̈eni jëk l̈öng tjl̈õkwo bek l̈i goshko ga tja wopjl̈ú anmoyõ.
Pja bor kjl̈ara. Tjl̈apga Jesús tjl̈õkwo kjragaga kjimtëp enido, pjeyoga miydëp l̇l̇ëm ëmdë ga kjimtëp bakoe. Epga kjimtorop sorë l̈i l̈ara l̈ok Jesús tjl̈õkwo kjragaga l̈öng l̈i kong. Epga äär eshko obishko ga kjimtos jek eni obi, woyde Sbörë sorë l̈i eni. To l̈öng Jesucristo pak shäryë, kjimtara nopga Sbö miydë l̇l̇ëm wl̈eniyo l̈irë l̇l̇ëme. E kjĩshko ga woyde ga bi pjeyoga eniyo tjwe bi shwoy ga wl̈okjrëy l̈öng wopjl̈ú, tjl̈õkwo bek l̈i shdär jek këgong wl̈o.
Kjibokwo ichoror jek Jesús tjl̈õkwo kjragaga l̈öng l̈i kong kjwara. Gueniyo domer shäng kjl̈ara eshko ko Diótrefes. Tjawa kol̈e woydë l̇l̇ëm, nopga obl̈ë ichë ä kjĩshko. 10 Tjawa jyõyotke ara. Bi pjeyoga wl̈okjre woydë l̇l̇ëm bakoe. Ëye omwl̈okjrono ga iche tön tjl̈õkwo kjragaga l̈öng l̈i tjok ame. E kjĩshko ga tja jek äär eshko ga wl̈on kjl̈uwe.
11 Pja bor kjl̈ara. Ĩp ga no obl̈ë l̇l̇ëbo owa shäryë ga pja omshäryë eni l̇l̇ëme. L̇l̇ëbo pjl̈ú shäryopdë eröe. Ëye l̇l̇ëbo pjl̈ú shäryë ga e Sbö ĩ. Ëye l̇l̇ëbo owa shäryë ga Sbö miyde l̇l̇ëme. 12 Domer shäng kjl̈ara ko Demetrio. Era pjl̈úe l̈e nopga uunkongdë eni. Tjawa oml̈ë eni bakoe. Miydëp pjl̈ú ga tjawa tjl̈ẽ beke. Ga miydër pjl̈ú ga tjl̈õkwo l̈e shäng l̈i, e beke.
Kjibokwo pjirzl̈ong
13 Tja l̇l̇ëbo l̈ë woydë ara bop kong, gueniyo tër woydë kjibokwo go l̇l̇ëme. 14 Pja ĩn woydë wop ä, shji l̈an ëng tjok wl̈o.
15 Rokër Sbö kong ga pja ie ber sök wl̈ẽpe.
Bop pjeyoga l̈öng jũshko l̈i, «¿Pja yonde?» l̈e l̈ok bop kong.
Bop pjeyoga l̈öng eshko bop tjok l̈i, «¿Yonde?» l̈ëp kjl̈ara kjl̈ara kong bakoe.