Balua kwa
Akaebulania
Kilongoi
Kitabu cha Ebulania ngi kitabu chukupegana mwojo andi palengania Yesu ilebe yenge yulondoli mu Lilagano Liyono. Iandikigwe andi matangacho. Gabi mapungu 60 mu Lilagano Liyono mu kitabu cha Ebulania agalaya kutenda kweli ngalengania ulondoli ni liengo li Kiyahudi li ukung'i nkolo. Magambu ga genia kitabu chenje kiandikigwa gambu gwa kape mwojo Akayahudi abunhwamini Kilisto. Ebulania alaite Yesu palenganikie Chalia kuyene akakung'i bipangaje kabe malumbo. Yesu nga lilumbo lya mabaja goa, pakamwe nu kukila kingobu. Bandu abunhwamini Kilisto ba ngoe uyo bapata mwojo mu kitabu cha Ebulania kujendeke kunkengama Yesu Kilisto nga jwenio jwatei iwechekane twe kunhwamini Nnoongo, nu uyo kujendeke kunhwamini jwenio (Lipungu lya 12:2).
Abije mundu jwamanyi mene jwaandike kitabu cha Ebulania, nambu akachomi balenga kutenda iwechakine kiandikigwa na ndundame Paulo, andaje Luka, andaje Banaba. Chaka chikiandikigwa uyo kimanyakineje nambu bandu ajingi baamine kutenda kiandakigwa chaka 70 kuboka pukubelekwa Kilisto. Yelusalemu jialabigwa chaka 70 kuboka pukubelekwa Kilisto nambu nhwandiki ju kitabu chenje alongila ilebe yenie tango nu kualabigwaje Yelusalemu. Kitabu cha Ebulania kiandikigwa ku Loma (Lipungu lya 3:24). Iwechakine ngikikwela mumakanicha nduu.
Agabi mukitabu
Nhwandiki alaite kutenda Yesu nga jwambone kwa akalondoli ba Nnoongo boa na akapakachi (Lipungu lya 1:1-4:13).
Kabe ngajendeke kulaya kutenda Yesu nga jwambone kwa akakung'i abijilongalea nyumba ja Nnoongo ku Yelusalemu (Lipungu lya 4:14-7:28).
Uyo liengo lya Yesu lyambone kupeta lilagano lya lolo Nnoongo lyabeka na bandu bakwe kupete lilagilo lyampa Musa (Lipungu lya 8:1-10:31).
Kuboka pukulenga kipola kutenda Yesu nga jwambone muno, nhwandiki alaite pipaligwa kutama (Lipungu lya 10:32-13:17).
Pukujomolela nhwandiki mukitabu chakwe ajomoli mubalua jakwe kwa kapata abali (Lipungu lya 13:18-25).
1
Nnoongo alonge kupete Mwana jwakwe
1 Kalakala Nnoongo ngalonge na akanhokabito pajingi kwa ndela ja akalondoli ba Nnoongo, 2 nambu machoba gukupela gano, alongi natwe kwa ndela ja Mwana jwakwe. Kupete jwenio Nnoongo ngapangania mbengu na dunia ni ilebe yoa eibi mwenio, ngampambula kupala ilebe yoa ibe yakwe. 3 Jwenio nga kung'ala ku kibumo cha Nnoongo na abi telatela na mweni Nnoongo, ajikamwi pamwe dunia ku lilobe lyakwe lina makakala. Kibokacha kajeguya bandu mabaja gabe, atamite kunani kumbengu, kingonu cha kalelo cha Nnoongo nkolongwa.
Ukolongwa gwa Mwana jwa Nnoongo
4 Mwana ngabekigwa kube nkolongwa kapeta akapakachi bu kumbengu, andi yene liina elyampi Nnoongo nga likolongwa kupeta maina ga akapakachi bukumbengu. 5 Gambu Nnoongo annengije mpakachi jwajoa, kulenga,
“Mwe Mamanango, lele nonge bandu boa bamanye kutenda ne Nawabinu.”
Kabe Nnoongo alengitije kumpakachi jwajoa,
“Ne mamba Nawabinu na mwe mma Mamanango.”
6 Nambu Nnoongo apakiba akantuma Mwana jwakwe, jwabi litibo padunia alenga,
“Akapakachi boa ba Nnoongo banng'ongalele.”
7 Nambu kunhwalo gwa akapakachi bukumbengu Nnoongo ngalenga,
“Babekite akapakachi bakwe kube upepo,
na abammegelela kube nimi ya mwoto.”
8 Nambu kwa Mwana jwakwe, Nnoongo alenga,
“Kitebu chinu chikingwana, mwe mana Nnoongo cha machoba goa changa pela.”
Mwe matawala bandu binu pangabagula.
9 “Mwe magapala agunhwalali Nnoongo nu kuchimwa ubaja.
Kuyene, Nnoongo, ojwabi Nnoongo jwinu, ngampambula,
nu kumpe kuala mwojo muno kupeta akajinu.”
10 Na kabele, alengite,
“Angwana, mwe kalakala ngammeka kijemo cha dunia,
na mbengu liengo lya maboko ginu.”
11 “Yene maipela, nambu mwe nhwigala machoba goa,
yoa mailala andi ngobo.
12 “Mamilibulunga andi likai,
nayene maligalambuka andi lutando olulalite.
Nambu mwe mma ujwajo machoba goa pangapela,
Bwomi gwinu upelaje.”
13 Nnoongo annengije mpakachi jwakwe na jumweje, kulenga,
“Ntame kingono chango cha kalelo,
mpaka batamile akangondwa binu pae.”
14 Lele akapakachi bukumbengu nga nike? Ngi ihuke tu eimmegele Nnoongo na yombe ikingigwa kajangata bandu abapakoligwa.