Poldi Kolinhidok pepa timeŋ youyemguk
Yodakale Mede
Pepa yoŋ adi Poldi Kolinhi dok mede timeŋ youyemguk. Kolin kayoŋbop adi Pol negoŋ Wapumnik Jesu Kilisto’walaŋ Mede Momooŋ yohautataugukneŋ tubumintaguk. Kolin adi Lomahi’walaŋ kwet wapumneŋ Akaia kwet diniŋ yokwet mebi ituguk. Yokwet uyadi ime luhi gagayeŋ ituguk doktiŋa muwage wapuhi fedi muneeŋ bomboŋ kibikibi tinene helemahelemaŋ uŋambuŋat tagiŋ. Unduŋ tiŋa metam niŋkadehi fe yanagila buŋa boiune muneeŋ bomboŋ fee hinek tubumintagiŋ. Unduŋ tiŋa titiŋ hogohi fee moŋgola buŋa bopneeŋ takaliŋa tigiŋ. Uyadi bepaŋ yalayalaŋhik moŋgola buŋa muni heyemiŋa yeniutumbagiŋ. Unduŋ tiŋa tiŋgiyoŋgiyone tiŋa kefifile kisaŋ tigiŋ.
Titiŋ be hatihati undiniŋ hakuk kaŋ Jesu’walaŋ kayoŋbop nolidi titiŋ u maaŋ tigiŋ doktiŋa Jesu’walaŋ kayoŋbop nadisukilitihinit uŋoŋ hatigiŋdi Poldok pepa youlimiŋa ninadigiŋ. Kaŋ Poldibo Jesu welehikdi fuliŋgoŋ nadisukilitimiŋa adi’walaŋ kayoŋbop dediŋ hatibune tuwot tibek wondok mede youyemguk. Tiŋa yokwet uŋoŋ kefifile kisaŋ hakuk doktiŋa metam nadisukilitihinitdi hekimalam tiŋa molom molom didimeniŋgoŋ kiulihi tiŋa hatidok yeniŋkilitiguk.
Agoŋ fiye 13 gineŋ adi Bepaŋdi metamŋiye weleŋdi hinek yabukahilelak wondok mede fafaŋeniŋ youyemguk. Kaŋ mede wondi Bepaŋ’walaŋ Mede Momooŋ pepa yendiniŋ maaneŋ youkiŋ wondiniŋ daŋiniŋ hatak. Tiŋa metam kobu hatiyam indi maaŋgoŋ ninindidimelak.
Pepa yendiniŋ yohebet
Fiye 1-4 Kayoŋbop ulitawaaŋ bop molommolom hatitaugiŋ
Fiye 5-6 Hatihati eŋ titiŋhik tuwot mu tuguk
Fiye 7-10 Kayoŋbopdi kwetfoloŋ dediŋ hinek hatibune tuwot tibek
Fiye 11-14 Bepaŋ gikiŋgoŋ timiŋa niutumbadok mede
Fiye 15 Kumuŋ gineniŋ kaikaaŋ pilapilat diniŋ mede
Fiye 16 Mede yodapmaŋ
1
Yokahaŋ mede
Nu Pol Bepaŋ’walaŋ nadihebet tagimneeŋ Jesu Kilisto diniŋ Aposel tugut. Nu tiŋa notnik Sositeni indi Kolinhi Bepaŋ’walaŋ kayoŋbop hiditok pepa i kamehamamut. Hidi Wapum Jesu Kilistodi hehitubu-walandaaŋ uŋgoniŋ hatidok haniŋguk. Adi’walaŋ metam iŋoŋ be niŋkade hatiiŋ hogohogok, hidi wanaŋ unduŋ tihambune Wapum Jesu Kilisto wou niutumbaaŋ ninadiiŋ hidi mebop adigut kubugoŋ tigiŋ. Unduŋ tinene Wapumdi kubugoŋnik tilak.
Betnik Bepaŋ be Wapum Jesu Kilisto adi’walaaniŋ siloŋ tobogoŋ be kulema u hidut hatuwaak.
Poldi Bepaŋ niutumbaguk
Bepaŋ adi Jesu Kilistodok tiŋa siloŋ tobogoŋ tihamguk wendok nadisuŋa hati-niutumbalat. Adi Bepaŋ’walaŋ Mede Momooŋ yohautadok nadisu eŋ nadinadi mebimebi kisaŋ hamguk. U Kilisto diniŋ yohauta mededi hidi’walaŋkade folooŋ hakuk doktiŋa unduŋ tuguk. Unduŋ doktiŋa Munabulidi kwanai hogohogok wendok tuwolit siloŋ tihambune hidi nemek niŋdok baniŋ mu tiiŋ. Wapumnik Jesu Kilistodi miŋgoŋ mintaune kakaŋdok hogok woom hatiiŋ. Adigoŋ Wapumnik Jesu Kilisto diniŋ busuwabusuwaŋiŋ nai foloŋ yomnit mokit yayatdok hehikasopneeŋ hehitubu-kilitiu hatilune naihik dapmawaak. Bepaŋdi mihiŋiŋ Jesu Kilisto Wapumnik kuyoŋ, adut tomboyoutdok haniŋgukdi undumbo yoŋ, undumbo yoŋ mu tilak.
Kolinhi adi kayoŋbop gineŋ ulitawaulitawa tigiŋ
10 Notneye, nu Wapumnik Jesu Kilisto diniŋ wou doktiŋa munte mede i yobe nadineŋ: Hidi tosiwe tiŋa mede mebimebi yoyo be kikakwihita mu tiyaneeŋ. Hidi adi nadinadihik gineŋ welekubugoŋ tihatiyaneeŋ. 11 Notneye, nu kahat i nadiŋa mede u yolat. Lekiŋgoŋhik foloŋ mede mintaguk hatak u Kolowi hekidi yobu nadigut. 12 Mede indiŋdok yolat. Hidi’walahidi mede indiŋ yoiŋ “Indi Pol diniŋ mebop”, eŋ nolidi indiŋ yoiŋ “Indi Apolo diniŋ mebop”, eŋ nolidi indiŋ yoiŋ “Indi Pita diniŋ mebop”, eŋ nolidi indiŋ yoiŋ “Indi Kilisto diniŋ mebop”.
13 Kei! u dediŋ. Kilisto adi daneeŋ fee be tuguk? Be Pol nu hiditok tiŋa koloŋdabek foloŋ be kumuŋgut? Be Pol nu’walaŋ wotnene foloŋ Imeyout be tigiŋ? 14 Yopo hinek, nu Imeyout mu tihamgut. Nu hidi’walaaniŋ lekiŋgoŋhik foloŋ meyat lufom hogok Imeyout tiyemgut adi Kilispas dut Gaiyus. 15 Unduŋ doktiŋa hidi’walaaniŋ nebek niŋdi nu wotnene foloŋ Imeyout tugumun tuwot mu yobek. 16 Nu biyagoŋ metam noli nimaaŋ youyemgut adi Stefana meŋimeŋiye. Eŋ nebek noli nimaaŋgoŋ neeŋbe youyemgut bek u mu nadilat. 17 Nu Kilistodi metam Imeyout tiyemdok mu napmeune bugut. Adi Mede Momooŋ yeniyehitubu-didime titiŋdok hogok naniŋkulune bugut. Tiŋa Kilisto’walaŋ koloŋdabek diniŋ mede fofoŋnit tibaakneŋ yoŋa me diniŋ nadisu-fuliŋgoŋ mede u mu ulihiŋa yolat.
Bepaŋ’walaŋ nadisu-fuliŋgoŋ wendi me’walaŋ nadinadi ulatifooŋ kalakapmelak
18 Metam kadaka tiŋa hamdok gigit tiiŋ adi koloŋdabek diniŋ mede u nadiune folooŋnit mokit tilak. Iŋgoŋ Bepaŋdi nihitubu-lodaune hatihati fafaŋeniŋ kahileyam indi yadi mede u nadiyam kaŋ Bepaŋ’walaŋ saŋiniŋŋiŋ tilak. 19 Youkudip Mede niŋ indiŋ hatak:
“Nu me diniŋ nadisu-fuliŋ diniŋ mede u ulene fowaak. Tiŋa nu nadinadihinit’walaŋ nadinadihik tubuhaŋindayembaat.”
20 Kaŋ me nadisu-fuliŋhinit adi de? Be naditawa me heki de? Be nai indidegoŋ mebi nadidakale me hatiiŋ heki de? Bepaŋdi kwetfoloŋ me heki’walaŋ nadinadihik tubuhaŋindaune folooŋnit mokit tilak. 21 Kaŋ Bepaŋ’walaŋ nadisu-fuliŋgoŋ diniŋ nadihebet mintakabeleune medi nehi’walaŋ nadinadi gineŋ Bepaŋ’walaŋ mebi nadinim yo tigiŋ iŋgoŋ tuwot moŋ. Unduŋ doktiŋa Bepaŋdi metam ninigitdok talik niŋ tubumintaguk adi indiŋ: Indi Mede Momooŋ yohautanene metamdi nadiune tuwot mu tubune mede kauleŋ yogiŋ. Iŋgoŋ Bepaŋdi nadiune tuwot tubune nediyeŋdi mede u nadiŋa nadisukilitiiŋ adi hogok yanagitak.
22 Judahi adi kunumneniŋ kudi kakaŋdok gigine tiiŋ. Eŋ Gilikhi adi me nadisu-fuliŋgoŋhinit mintadok gigine tiiŋ. 23 Kaŋ indi adi Kilisto koloŋdabek foloŋ ukiŋ wendok mede yone Juda me heki’walaŋ talik tuŋgumba tilak. Eŋ me Judahi’walaŋ feknit mokit adi yadi nadiune mede kauleŋ tilak. 24 Unduŋ tulune Bepaŋdi yeniyehimaneguk, Juda me be Gilik me, adi Kilistodok indiŋ nadiiŋ, “Adi Bepaŋ’walaŋ saŋiniŋ, tiŋa Bepaŋ’walaŋ nadisu-fuliŋgoŋ.” 25 Me adi Bepaŋdi kwanai tuguk u nadiŋa mede kauleŋ yolune adi’walaŋ mede kauleŋdi me’walaŋ nadisu ulatifooŋ kalakapmelak, be Bepaŋdi kwanai tuguk wendok gweheyeŋ yolune adi’walaŋ gweheyedi me’walaŋ saŋiniŋ ulatifooŋ kalakapmelak.
Kilisto adi Bepaŋ’walaŋ nadisu-fuliŋ diniŋ tinaulibinik
26 Notneye, hidi me dedihigoŋ hatilune Bepaŋdi hanihehimaneguk u nadikaneŋ: Hidi lekiŋgoŋhik foloŋ me kwetfoloŋ diniŋ nadisu-fuliŋgoŋhinit fee moŋ, eŋ saŋiniŋhinit fee moŋ, me wohiyehinit maaŋ, fee moŋ. 27 Me dauyeŋ kaulehi hatiiŋ adi Bepaŋdi yeniyehimaneeŋ me nadisu-fuliŋgoŋhinit yehitubu-mekalak. Be me dauyeŋ gweheye bilakenehi hatiiŋ adi Bepaŋdi yeniyehimaneeŋ me saŋiniŋhinit yehitubu-mekalak. 28 Tiŋa me dauyeŋ hogohi fofoŋhinit hatiiŋ adi Bepaŋdi yeniyehimanelak eŋ me dauyeŋ kondiŋahi hatiiŋ adi Bepaŋdi yeniyehimaneeŋ me wohiye loloŋhinit adi’walaŋ kasop diliteleyemilak. 29 Kwetfoloŋme niŋdi Bepaŋ hebeŋ foloŋ sigitiŋalo mede yobaakneŋ yoŋa unduŋ tuguk. 30 Adi ne Jesu Kilisto wou foloŋ hatihati uŋgoniŋ hamulak. Kilisto adi Bepaŋ’walaŋ nadisu-fuliŋ diniŋ tinaulibinik. Adi yom moŋgokutnimilak, be welehakale tubumintanimilak, eŋ kadakaniŋ diniŋ folofolok sidokonimguk. 31 Ale Youkudip Mede indiŋ hatak u fafaŋeguk. Nebek niŋdi youtumba mede yobe kaŋ Wapum’walaŋkade hogok yobaak.