Judahi’walaŋ Kap
Yodakale Mede
Judahi’walaŋ Kap pepa yoŋ adi Bepaŋ tubudulaaŋ wou nintilooŋ niutumbadok kap pepa. Kap heki yoŋ adi koomkwaha meeniŋ kubugoŋ kubugoŋdi youkiŋ. Ala kap eŋ ninadi heki yoŋ adi Judahidi moŋgola yehikiutat yeŋke Bepaŋ niutumbaaŋ kap toyagiŋ. Unduŋ titauyeeŋke mindaŋkade kap u moŋgola Bepaŋ’walaŋ mede “Yofolok Komi” gineŋ maaŋ boigiŋ.
Kayoŋbop diniŋ yoyout heki yoŋ adi mebimebi. Noli yonadi, noli Bepaŋ niutumbadok, noli Bepaŋdi yehitubuduladok, noli Bepaŋdi kwele tiyemdok, noli Bepaŋdi hatihati dapmandapmaŋnit moki yemdok, noli yomhik tumolokuyemdok, noli Bepaŋdi kahaŋ tiyemguk wondok niutumbaaŋ tonadifo tiŋa siloŋ kamedok, noli Bepaŋdi malabumuŋhik kaŋ memikhiye kibikoŋ tiyemdok. Ninadi hogohogok yoŋ adi me kubugoŋdok eŋ Isilae mebop hatigiŋ wanakaŋhik youkiŋ.
Noli Bepaŋ ne’walaŋ namanda foloŋ hinehinek yali nadiŋa ninadigiŋ, eŋ noli adi Bepaŋ’walaŋ metam noli’walaŋ nadinadihik gineŋ be sigihik foloŋ dediŋ nadigiŋ u wanaŋ yehikiula ninadigiŋ.
Judahi’walaŋ Kap woŋadi Jesudi kwetfoloŋ hatigukneŋ uŋgoŋ tubukaikaaŋ yoluguk. Eŋ Yofolok Kobuli youkiŋ hekidi maaŋ Judahi’walaŋ Kap gineŋ mede kiliki noli moŋgola nehi mede youkiŋ u ulihiŋa youtaugiŋ. Tiŋa undugoŋ kayoŋbop kobuli tububihila mintaguk uŋaniŋ Judahi’walaŋ Kap pepa wondi Bepaŋ lufomkulitniŋdi kubugoŋ wou nintilooŋ niutumba titiŋdok mede be kap uŋakoŋ moŋgola yohautaaŋ youkiŋ. Unduŋ doktiŋa Judahi’walaŋ Kap pepa mebinit yendi metam kwetkwet nadisukilitihinit hatiyam hogohogok indi’walaŋ tinaulibinik diniŋ pepa mebi tilak.
Judahi’walaŋ Kap pepa yendiniŋ maaneŋ fiye 150 hakiiŋ. Ala daneune bop indiŋ mintaiŋ.
Kap 1-41
Kap 42-72
Kap 73-89
Kap 90-106
Kap 107-150
1
Me didimeniŋ eŋ me hogoli diniŋ mede
1 Me nediyeŋdi me kadakahi’walaŋ mede mu tagimnelak tiŋa undugoŋ me kadakaniŋ titiŋ heki’walaŋ talik mu kelelak, be me Bepaŋ nimpekit tiiŋ heki gut ipilat mu tilak adi yadi Bepaŋdi kahaŋ timimbune nadifo hinek tilak.
2 Me woŋ adi Yahwe’walaŋ Yodoko Medeŋiŋ wendok nadigalika hinek tilak, doktiŋa timiŋ be hadapmo adi uŋgoŋ hati nadituwat tilak.
3 Me woŋ adi bem niŋ ime gagayeŋ yetigiŋ undiniŋ. Adi naiŋiŋ foloŋgoŋ hinek folooŋ folak, tiŋa undugoŋ hapmuŋ kumuhaŋinda mu tiiŋ. Nemenemek tilak hogohogok u momooŋ hinek mintalak.
4 Me kadakahi adi undihi moŋ. Mokoŋ hinek. Adi yadi figifigi sububadi fedikutak undihi. 5 Unduŋ doktiŋa me kadakahi adi yadi Bepaŋdi nai wapum foloŋ mede nadinadi kwanai tibaak uŋaniŋ tuwot mu saŋindaneeŋ. Tiŋa me kadakaniŋ titiŋ heki adi yadi me didimehi’walaŋ lekiŋgoŋhik gineŋ mu hatineeŋ.
6 Yahwe adi me didimehi’walaŋ titiŋhikdok nadiune tuwot tilak. Iŋgoŋ me kadakaniŋ tiiŋ heki adi yadi liwedapmaŋ tineeŋ.