Selusien koa helamu ten
1 Sion
?Isei mutis selusien koanik?
Sion Sepeti vi tai en eiloheh keitel koa Iesu vise rohtoh eni. Suval tunali Tiemes ka Pita, mulamu, Sion son net vasar mesau keil. Mak 4:21 Sion moul taveah mulin eiloheh sav keil. Ka navong Pol ka Pita ka houlu en eiloheh sav keil umat tuai, Sion va sao en sios keil koa amul en out vasi en out Esia (koa kosa avise en Turkey) en avong tai luhu en sua 85 ka sua 90 AD (sua keil koa katau en avong Iesu avasi). Evus, kei mutis ‘More Longlongien koa Sion Mutisi,’ ka katau eni kei mutis leta enek.
?Isei vuli selusien koanik mulamu?
Sion mutis selusien koanik va min Kristin vasi keil koa amul en out vasi suval avi titiali keil onen. 1Sion 2:1,12,28 Leta enek karahit sios vasi. Tiser taluvosien keil houlu amul avahisein Kristin keil en tounah houlu koa rovitei anatin. Sakini, Sion mutis leta koanek vasuv kat demkatien one en tounah koa vi anatin.
?Sion mutis selusien koanik vensa?
Sion vit luvati keke Iesu mai suval meatin ka mat anatin en aiveave – Sion en vat Kristin keil availea keke Iesu vi Ahi koa vi ‘Vati Selusien ten Moulien.’ 1Sion 1:1 Ka kei mita en out netan anatin. 1Sion 1:2-3 Sion viteni mukok ven tiser taluvosien keil aviteni keke Iesu vi meatin enges ten out netan koa Ninin onen Ahi sieni en avong avi baptis eni, ka lokovein risi en avong mul en aiveave. 1Sion 4:2-3; 5:6-10
Sion vit luvati keke Ahi en vati keke sakien keil onen meatin keil onen avatolas – Tiser taluvosien keil aviteni keke aven meatin ka ninin onen lukeka. En rendemien one, meatin kilea voumon tounah vasi koa en vati voumoni en aven, ka tisaen teni sakras vasakin ninin onen vahilehilu. Sion vit luvati keke meatin keil onen Ahi amul along kat mengkatien keil onen koa mul en Tus Votut onen. 1Sion 2:3-6; 3:1-10
Sion vit luvati keke Kristin keil e hehathat tue keil en demkatien – Veni tiser taluvosien keil amul asakin Kristin keil amusel en keil eris, Sion sel kat keil e vahathat Kristin sav keil. 1Sion 2:7-11; 3:11-24
Sion vit luvati keke Iesu Kristo vi sise tas koa voutut moulien onen meatin keil – Tiser taluvosien keil aviteni keke meteisauen koa keil enges akuri kilea voutut moulien onen meatin keil. 1Sion 1:8-10 Ka Sion vit leini keke koakeil akur Iesu Kristo, Natin Ahi, keil enges akur moulien ten lisenges. 1Sion 3:1-3
Mari rendemien tai ten selusien koanik mul en 1 Sion 5:13
Namul namutis va min kami koa mikur anatin en Natin Ahi keke miheilea kami mikur moulien ten lisenges tuai.
?Asa mul en selusien koanik?
1. Ahi vi meneai ka en vat meatin keil onen itie lati keke keil emun amul en meneai. (1:1–2:29)
2. Ahi mal revi ka meatin keil onen, moulien one hemal revi. (3:1-10)
3. Ahi vi envatien ka en vat meatin keil onen itie lati keke keil emun envatien one hel en meatin sav keil. (3:10–4:21)
4. Ahi vi moulien ka mul mutut koakeil akur anatin en Natnali koa vi Iesu Kristo. (5:1-21)
1
Hitkileaen usil kei koa vi Vati Selusien ten Moulien
Inau, Sion, namutis leta koanik va min kami usil kei koa vi ‘Vati Selusien ten Moulien,’ kei koa ro tuai mulamu en tounah sav vasi keil. Kei, komai melonge, ka melesi en metomai. Anatin, melesi ka hemai rokoli. Sion 1:1,2; 1Sion 2:13,14; Sion 1:1,4,14 Mulamu, Vati Selusien ten Moulien enek moul lisenges ka ro ral min Ahi Tata, ka katau, mai kistal min ir. Kei komai melesi ka kosa mevitehit usili min kami. Sion 1:14 Asa koa komai melesi ka meraengoni, memul meviteni min kami mun keke mikilea mivapil vatal min komai koa mekapil emun ral min Ahi Tata ka Natnali koa vi Iesu Kristo. Ka navong mihekur anatin en asa koa memul memutis usili, rehesi ir hehi houlu. Sion 15:11; 16:24
Selkatien keke rovoual en meneai onen Ahi
Selusien koa meraengoni ka ven Natin Ahi mevitehiteni mun min kami. Kei viteni mukok: Ahi mutolas, tisaen tovuol ien. Kei suval meneai koa keih koa mankoli tovuol ien. 1Tim 6:16; Tiem 1:17 Munak roviteni rovit rokapil vituai ral mini ka romual veah en mankoli ten tisaen, romul roluvos en selusien orer ka ualien orer romusiltei anatinien. 1Sion 2:4; Sion 3:21 Ka munak romual en meneai suval Ahi mul en meneai ka sakien orer mutolas, ir Kristin keil, rokilea rovapil vituai vatal min ir emun. Ka navong romual en meneai enek, ran Iesu, Natin Ahi, mul kas motein ir ran tisaen vasi keil keke reheto rehetolas.
Ka munak roviteni rovit tisaen orer tovuol, romul roluvos ir enges, ka anatinien tovuol en ir. Ka munak rovit lat tisaen orer min Ahi, kei koa lisenges mul mum vasin tounah koa viteni ka mul mumon tounah koa mal, kei herleletei mun hetisa en tisaen keil orer ka hekas motein ir rehetolas ran sakkalkalien keil orer. 10 Ahi mul vit ir vasi romumon tisaen. Ka munak rovit rormumontei etai tisaen, romul roviteni keke Ahi mul luvos. Munak hemukonek, selusien onen romultei en ir.

^ Mak 4:21

^ 1Sion 2:1,12,28

^ 1Sion 1:1

^ 1Sion 1:2-3

^ 1Sion 4:2-3; 5:6-10

^ 1Sion 2:3-6; 3:1-10

^ 1Sion 2:7-11; 3:11-24

^ 1Sion 1:8-10

^ 1Sion 3:1-3

1:1: Sion 1:1,2; 1Sion 2:13,14; Sion 1:1,4,14

1:2: Sion 1:14

1:4: Sion 15:11; 16:24

1:5: 1Tim 6:16; Tiem 1:17

1:6: 1Sion 2:4; Sion 3:21