Maeka
5
Iahova vat kati keke asuv houlu tai hekistal en taon ten out Betlehem koa hemai helosil kat revi me-Isrel keil
Maeka 5:1-4
Provet Maeka selus min me-Isrel keil vit,
“Meatin keil ten out Serusalem, rehemai out hetas keke rovaha rovavae,
veni vativieh keil orer akarahit koe taon orer.
Keil umai avou purun asuv houlu onen me-Isrel keil,
umai avouas vatin en ai tai.”
 
Ka Iahova vat kati min meatin keil onen ka en provet Maeka vit,
“Avaseini keke vatiamal onen Betlehem Efrat vi havivi mok en vatiamal sav keil onen me-Sudah keil
ka nisakin asuv houlu tai hekistal ien koa helosil kat revi me-Isrel keil. Mat 2:6; Sion 7:42
Anatin, en avong telamu, kei mul tuai,
ka hemai ris helosil kat me-Isrel keil.”
 
Ka Iahova heling meatin keil onen hel en hen vativieh keil one
hetokol avong koa ahin koa mul long mahien en eisilin hekur tivava onen koa hehi meahos.
Ka en avong enek, tunali keil imai ris
ilah ruai hetal min me-Isrel vasi keil.
Navong hemai, helosil kat revi meatin keil onen hetal min keihoen koa Iahova hesani mini.
Kei houm en isen Iahova koa hetetamen imok.
Meatin keil onen ito en tomat,
veni meatin vasi keil ten out netan ilei kilea keke kei vi hetetamen imok ka ihouhou mini.

5:2: Mat 2:6; Sion 7:42