Tí xroon kꞌuáyéhe̱ tí sín Hebreos
1
Dios nixja̱xi̱n chꞌán tí Xje̱en chꞌán
A̱ ntá tí imá ósé Dios mé nixje̱he̱ tí sín tsíkꞌaxrjeníxinni nchónhya veces kíxin nchónhya nkexrí chrókienxín sín, nixja̱xi̱n chꞌán tí sín kꞌuéchrónka tí itén chꞌán. A̱ ntá jie tió tsjixixín Dios nixja̱xi̱n chꞌán tí Xje̱en chꞌán, na mé Dios kjuíchꞌéna chꞌán kaín xín nkehe siín kíxin kjua̱cha̱xién tí Xje̱en chꞌán, mé tí nkexro kꞌuáyéhe̱ kaín xín nkehe. Jehe chꞌán mé tꞌinkaséyanxín chꞌán tí kjuachaxin kuènte Dios, la ko jehe chꞌán mé kja̱xin éxí tsjehe Dios xi̱kaha tsjehe tí jehe chꞌán. Jehe chꞌán tꞌaykonhen chꞌán kaín xín nkehe siín kíxin tí kjuachaxin jié chónta tí tan nixja chꞌán. A̱ ntá kjuixin kjuínchetjóá chꞌán tí jie̱ chóntani, ntá sákjui̱ chꞌán kjuákꞌetja̱xi̱n chꞌán tí tja chjina Itꞌé chꞌán tí tjen chꞌán tꞌe̱to̱an chꞌán nkaya nka̱jní.
Tí Xje̱en Dios imá tꞌe̱to̱an, a̱ ntá tí sín ángel la kénhyó
Tí Xje̱en Dios kꞌuáyéhe̱ chꞌán kjuachaxin tsꞌe̱tue̱nhen tí sín ángel, kíxin tsíkꞌáyéhe̱ chꞌán tí kjuachaxin kuènte Itꞌé chꞌán, a̱ ntá imá tꞌe̱to̱an chꞌán, a̱ ntá tí jehe sín la náhí. Méxra̱ Dios ntáchehya nijnko ángel kíxin:
Jaha mé Xja̱nna,
janhan mé kjui̱tꞌána tí jaha ijie.
la ko kja̱xin ntáchrohya Dios kuènte nijnko ángel kíxin:
Janhan mé chrókꞌóna Itꞌé chꞌán,
la ko jehe chꞌán mé chrókꞌóna xja̱nna.* Salmo 2.7; 2 Samuel 7.14; 1 Crónicas 17.13
A̱ ntá tió kui tí jnkoko̱á Xje̱en Dios chjasintajni, ntá ntáchro Dios kíxin:
Kaín tí sín ángel kuènte Dios chrókjuikosáyehe tí jehe chꞌán. Deuteronomio 32.43
A̱ ntá ntáchro Dios kuènte tí sín ángel kíxin:
Tí sín ángel chꞌéna chꞌán éxí xri̱nto̱ kíxin ncha̱kuen sín ó,
la ko tí sín chꞌehe chꞌán xra̱ la chꞌéna chꞌán éxí xrohinene. Salmo 104.4
A̱ ntá ntáche chꞌán tí Xje̱en chꞌán kíxin:
Tí trono kuèntá itjen jnkochríxín, jaha Dios,
la mé jaha mé ijnko nkexro tꞌe̱to̱an jína.
Jaha tóxrjínhan tí nkehe jína, a̱ ntá ninkákonhén tí nkehe jínahya.
Mé xi̱kaha tí Dios tsíkjeyá jaha, la Dios kuèntá kjuíntacháha má,
a̱ ntá tí í so sín kꞌuájikoa la kánhyó.§ 1.8-9 Salmo 45.6-7
10 Kja̱xin ntáchro kíxin:
Jaha Ìnchéni, tí xrankíxixín kjui̱chꞌéna chjasintajni,
la ko jaha kjui̱chꞌéna nka̱jní.
11 Táha mé tsꞌitjáyan, a̱ ntá jaha la tsjakꞌe jnkochríxín.
Kaín tíha tsontaxín éxí iké chojni,
12 éxí ijnko iké chojni xi̱kaha tsoxrátꞌo̱,
tsꞌixinkí éxí ijnko iké chojni.
A̱ ntá jaha la tsꞌixitóxinhya jnkochríxín tsjakꞌe,
a̱ ntá tí kjuachón chonta jaha la nunca tsjeje̱hya.* 1.10–12 Salmo 102.25–27
13 Dios la ntáchehya nijnko tí sín ángel kuènte chꞌán kíxin chrókꞌuejó sín tja chꞌán chjina ntahó chrókꞌue̱to̱an sín, tsjixinjian kaín xín tí sín nínkakonhen sín la chrókjuachahya sín chrókꞌue̱to̱an sín. Salmo 110.1 14 Kaín tí sín ángel mé ncha̱kuen sín ó mé chꞌehe Dios xra̱ mé kꞌuítuenhen sín tsjinki̱tsa tí sín tsꞌáyéhe̱ kjuachaxin tsaá sín.

*1:5 Salmo 2.7; 2 Samuel 7.14; 1 Crónicas 17.13

1:6 Deuteronomio 32.43

1:7 Salmo 104.4

§1:9 1.8-9 Salmo 45.6-7

*1:12 1.10–12 Salmo 102.25–27

1:13 Salmo 110.1