Reꞌ hu̱j reꞌ wilic wi̱ꞌ rikꞌormojic take paꞌ bih xcꞌuhtjic reh
Maꞌ Wa̱n
1
Kꞌe̱ꞌ ato̱b reh hab wach i
naricꞌamam na̱ i tzꞌihmbimaj
chipam i hu̱j wili
Reꞌ hin maꞌ Wa̱n aj niminel reh Jesus reꞌ Pahbamaj chi Kꞌatal Kꞌoric, reꞌ hin cꞌahchiꞌ nitzꞌihmbam take kꞌoric wili chiri̱j reꞌ xicꞌuhtaj wi̱n i Jesus naxitakꞌa̱ꞌ cho wu̱cꞌ jenaj raj tzꞌeꞌ wa̱ch reꞌ xiban ricꞌuta̱j wu̱cꞌ. Reꞌ xicꞌuhtaj wi̱n i Jesus reꞌ woꞌ i Dios xcꞌuhtunic reh ruꞌ, chi cꞌuhtbal queh raj camanom haj wilic take naricꞌuluric chi loqꞌuil ti. Reꞌ aj i hin Wa̱n til niyew nichi̱ꞌ chi ritzꞌihmjic i coric wili chiri̱j take xikꞌor wi̱n i Dios naxiban take rehreh wach cꞌuhtunic eh jeꞌ woꞌ chiri̱j i chaj bih xicꞌuhtaj wi̱n i Jesus reꞌ Pahbamaj chi Kꞌatal Kꞌoric. Jeꞌ aj reꞌ ruꞌ, ruꞌum chi coric i chiꞌnchel reꞌreꞌ, reꞌ hin nikꞌor aweh tak chi xa hab wach cꞌacharel narilbic pa̱m i hu̱j wili, kꞌe̱ꞌ woꞌ chic ato̱b reh ruꞌum nok nariwihꞌic chi suk ricꞌux. Jeꞌ woꞌ reꞌ wihꞌic nacaꞌnam take cꞌacharel reꞌ nquibiraj eh nquinimej i kꞌoro̱j ruꞌum i Lokꞌ laj Uxlabal chipam i hu̱j wili reꞌ nkꞌoric chiri̱j i naricꞌuluric johtok. Jeꞌ reꞌ nikꞌor maj reꞌ rikꞌijil naricꞌuluric take wi̱ꞌ reꞌreꞌ xa maꞌ naht ta chic chi kawach.
Reꞌ ti̱j xbanjic chiqui̱j take comonil
aj niminel pa wilque̱b riyukꞌul i A̱sya
Reꞌ hin maꞌ Wa̱n cꞌahchiꞌ nitzꞌihmbam je hu̱j wili aweh hat-tak reꞌ wuku̱b chꞌuk chi aj niminel reꞌ namola̱ꞌ awi̱b tak chi rilokꞌonjic wach i Dios ar pa riyukꞌul i A̱sya. Tinicꞌalenej tak je ru̱cꞌ niti̱j niban chi jeꞌ wili: Reꞌ hat Ajabe̱s Dios, reꞌ hat Ajabe̱s Jesus eh hat Ajabe̱s Lokꞌ laj Uxlabal, nipahkaj aweh tak chi enaꞌn tak chi reꞌ awatoꞌbil tak chꞌi̱l i sukquil cꞌuxlis nayew tak reꞌ ta nak reꞌ wihꞌok pan quicꞌacharic i juꞌjun chꞌuk chi aj niminel reꞌreꞌ. Reꞌ hat kAja̱w Dios nok maꞌ jaꞌ natikꞌa̱ꞌ ta cho wach acꞌal wili, xa wilca̱t woꞌ cho, xa wilca̱t woꞌ yuꞌna eh xa na woꞌ awihꞌic chi junelic cꞌacharic. Reꞌ hat Lokꞌ laj Uxlabal reꞌ wilca̱t chi junelic chiwach i kAja̱w Dios reꞌ nkꞌatbic kꞌoric china̱ chiꞌnchel nicꞌ nimal wilic, kꞌe̱ꞌ woꞌ chic manlic wach anoꞌjbal wilic, chi wilic woꞌ awu̱cꞌ i wuku̱b chi manlic wach noꞌjbal wilic reh i Dios. Reꞌ aj i hat Jesus reꞌ Pahbamaj chi Kꞌatal Kꞌoric, reꞌ hat, hat aj chꞌiquenel cꞌuxlis chiri̱j rikꞌormojic i coric. Reꞌ hat i pe̱t xatuctic cho chi quixilac take camnak chi jalo̱j chic wach atiꞌjolal abakil eh reꞌ hat kꞌe̱ꞌ woꞌ chic awajawric chi quiwach take aj kꞌatal kꞌoric ayuꞌ wach acꞌal. Jeꞌ woꞌ chic kAja̱w Jesus, reꞌ hat kꞌe̱ꞌ tiꞌ koj-awicꞌraj eh ruꞌum reꞌ xachihcaj aquiqꞌue̱l naxakꞌahsaj awi̱b pan quimic. Ru̱cꞌ aj xaꞌn reꞌreꞌ, reꞌ hoj aj niminel chic aweh yuꞌna xoj-awesaj chipam i tiꞌcꞌaxic nakacꞌulum nak ruꞌum reh kamahc. Reꞌ hat Jesus xaꞌn woꞌ chi, chi kana̱ chic i hoj cꞌacharel na̱kꞌatbic kꞌoric eh awuꞌum i hat yuꞌna, nkalokꞌej wach awAja̱w Dios eh wilco̱j woꞌ chic chi raj camanom jeꞌ ricab nok xiwihꞌic take cho cꞌacharel xipahbabjic cho ruꞌum i Dios chi aj kꞌahsem si̱. Ruꞌum aj chiꞌnchel reꞌreꞌ, nipahkaj johtok reh Dios chi junelic kꞌi̱j sakom, yeꞌerok ta nak alokꞌil eh jeꞌ woꞌ reꞌ chi etiwihꞌic chi aj kꞌatal kꞌoric, nqui nikꞌor johtok pa niti̱j chi til coric woꞌ chi jeꞌ reꞌ naricꞌuluric.
Reꞌ aj xcꞌuhtjic wi̱n ruꞌum i Dios til coric chi naricꞌuluric. Ruꞌum reꞌreꞌ nikꞌor aweh tak i wili: Chacoj tak rehtal chi nacꞌolok woꞌ chic lok ricaꞌpech i Jesus pa rinimal su̱tzꞌ, reꞌ take cꞌacharel xicansanic reh naquilom wach jeꞌ woꞌ reꞌ take chiꞌnchel take tinamit. Ruꞌum aj reꞌ, reꞌ take cꞌacharel reꞌ quichalic pan tak chiꞌnchel tinamit wilque̱b ayuꞌ wach acꞌal, kꞌe̱ꞌ woꞌ chic naritiꞌbic pan quicꞌux chi cu rehtal xa na quibarbatic chic ruꞌum quiyoꞌjic chiwach i tiꞌcꞌaxic narichalic chi quina̱. Reꞌ nkꞌoric chiri̱j i naricꞌuluric wili til woꞌ reꞌ i Dios reꞌ xa reꞌ wach reꞌ kꞌe̱ꞌ nimal wach rajawric wilic chi junelic. Reꞌreꞌ xpꞌutbic cho reh chiꞌnchel eh reꞌ woꞌ reꞌ naricohlsonic wach chiꞌnchel jeꞌ ricab ncꞌuluric ru̱cꞌ ritusjic wach take tzꞌihm chi wilic jenaj pꞌutbal cho reh eh wilic woꞌ jenaj cohlsbal wach. Jeꞌ woꞌ chic, nok maꞌ jaꞌ ritikꞌa̱b ta cho wach acꞌal, reꞌreꞌ xa wilic woꞌ cho, xa wilic woꞌ yuꞌna eh xa na woꞌ riwihꞌic chi junelic cꞌacharic.
Reꞌ pe̱t cꞌuhtunic xbanjic reh Wa̱n
chipam i yeꞌa̱b Pa̱tmos ribihnal
Reꞌ hin maꞌ Wa̱n xa jenaj woꞌ niwach awu̱cꞌ tak chi kich aj niminel ki̱b reh Jesus eh chi reꞌ woꞌ Dios ntakꞌanic kꞌoric chi nina̱ jeꞌ woꞌ ricab hat-tak. Reꞌ hin nicuy woꞌ ransil i tiꞌcꞌaxic reꞌ cꞌahchiꞌ nicꞌulum ruꞌum reh rikꞌormojic riCꞌuhbal i Dios jeꞌ woꞌ ribiral i Jesus. Reꞌ tiꞌcꞌaxic wili reꞌ chi reꞌ hin xincanabjic lok chi cꞌacharic chi wutquel chipam i yeꞌa̱b sutumaj ri̱j chi maꞌ laj haꞌ, Pa̱tmos ribihnal. Nok wilqui̱n chic ayuꞌ jeꞌ wili xcꞌuhtjic wi̱n: 10 Pan jenaj queh take kꞌi̱j reh niwihꞌic ayuꞌ, chipam i kꞌi̱j nlokꞌonjic wi̱ꞌ wach i kAja̱w, reꞌ Lokꞌ laj Uxlabal xiyew kꞌab wi̱n chi ru̱cꞌ nicapew-bal nanicojom rehtal i wili: Reꞌ hin xnibiraj chi wilic jenaj xoquic cho chi kꞌoric chiwi̱j je. Reꞌ rikꞌorbal xa jeꞌ chic cowil nkꞌoric i chꞌihchꞌ laj su̱b. 11 Jeꞌ aj wili xikꞌor wi̱n:
«Chatzꞌihmbaj chiwach jenoꞌ botomaj wach hu̱j chiꞌnchel i nicꞌ paꞌ nimal i rehtalil cꞌahchiꞌ awilom wili eh chatakꞌa̱ꞌ je rikꞌormojic cu̱cꞌ take wukchꞌuk chi moloj wach aj niminel wilque̱b pan tak tinamit pa riyukꞌul A̱sya, reꞌ take jeꞌ wili quibihnal: Reꞌ E̱peso, reꞌ Esmi̱rna, reꞌ Pe̱rcamo, reꞌ Tiyati̱ra, reꞌ Sa̱rtis, reꞌ Pilare̱lpiya eh jeꞌ woꞌ i Lahorise̱ya, nqui xikꞌor.
12 Naxinsolqꞌuij je wi̱b chi riliric je hab wach nkꞌoꞌronic cho wi̱n, xwilow wach jenaj nim laj paꞌa̱b cante̱la wuku̱b chi tzꞌukunbal cante̱la wilic reh, reꞌ tikꞌimaj ru̱cꞌ kꞌan woric laj chꞌihchꞌ. 13 Chiwach i maꞌ laj paꞌa̱b cante̱la reꞌreꞌ, til manlic pa riyejal queh wuku̱b chi tzꞌukunbal cante̱la reꞌreꞌ xwilow chi jenaj cꞌacharel paꞌlic ar jeꞌ ricab nilbic i Acꞌunbe̱s reꞌ wilic rajawric chi quina̱ cꞌacharel. Reꞌ risoꞌ wilic chiri̱j xa junpaꞌlic jok cu nponic chi ro̱k. Jeꞌ woꞌ wilic jenaj richꞌihchꞌ laj pa̱s tikꞌimaj ru̱cꞌ kꞌan woric laj chꞌihchꞌ, cu nah teleb nelic cho eh kꞌeꞌlic jok chiꞌ ricꞌux cu nponic nah ritu̱k. 14 Reꞌ rismal na̱ xa sak chic, xa jeꞌ chic ricab risakil i sak laj no̱kꞌ on xa jeꞌ chic ricab i risakil i sak laj su̱tzꞌ. Reꞌ take nakꞌ wach xa nworwotic chic xa jeꞌ chic ricab xak i kꞌa̱kꞌ. 15 Reꞌ take ro̱k xa jeꞌ chic ricab take junchꞌuk chic kꞌan laj chꞌihchꞌ icꞌsimaj pan kꞌa̱kꞌ, xa nhecꞌhetic chic riban ruꞌum ritzꞌaꞌquilal kꞌa̱kꞌ. Reꞌ rikꞌorbal xa jeꞌ chic ricab nkꞌoric cho jenaj maꞌ laj ro̱k haꞌ chi xa nrojic chic cho. 16 Jeꞌ woꞌ chic, xwilow woꞌ wuku̱b chi chꞌimi̱l choplic ruꞌum ru̱cꞌ risecꞌa̱j kꞌab. Xwilow woꞌ chi reꞌ take kꞌoric quiꞌelic cho pan chi̱ꞌ til woꞌ chic kꞌe̱ꞌ ransil camanic riban chi xa rijunehtej chic ri̱b chꞌi̱l i manlic wach camanic riban i jenaj cꞌul kꞌas re̱ chꞌihchꞌ eh reꞌ rilbal ruꞌ xa jeꞌ chic ricab risakomil i kꞌi̱j nariyew ransil ritzꞌaꞌquilal yejal kꞌi̱j.
17 Naxwilow chiꞌnchel reꞌreꞌ, reꞌ hin xnixucꞌa̱ꞌ wi̱b chiwach chi cu xnipachꞌa̱ꞌ jok wi̱b cu wach acꞌal chi riyeꞌeric rilokꞌil xa reꞌ laꞌ maꞌ xincꞌuyuꞌjic ta chic ruꞌum chi xincahnic chi jeꞌ chic hin camnak. Chalic i kAja̱w xiyew risecꞌa̱j kꞌab chi nina̱ eh jeꞌ wili xikꞌor wi̱n:
«Maꞌ tiyoꞌjic chic. Reꞌ hin i pꞌutbal cho reh chiꞌnchel eh reꞌ woꞌ hin nanicohlsonic wach chiꞌnchel. 18 Reꞌ hin xa cꞌachalqui̱n woꞌ eh til coric chi jeꞌ reꞌ. Coric ruꞌ, xinquicansaj xa reꞌ laꞌ xincꞌacharic woꞌ chic cho reh chi nanicꞌacharic chi junelic chic kꞌi̱j sakom. Jeꞌ woꞌ chic, jeꞌ ricab ncꞌuluric ru̱cꞌ jenoꞌ cꞌacharel chi nanyeꞌeric reh i la̱wa nwihꞌic rajawric chi riteheric i ocbal pan jenoꞌ yeꞌa̱b, reꞌ hin yuꞌna wilic woꞌ wajawric china̱ paꞌ bih ncꞌuluric cu̱cꞌ take cꞌacharel camnak chic je take eh jeꞌ woꞌ china̱ paꞌ bih ncꞌuluric chipam i yeꞌa̱b “Ha̱res” ribihnal, reꞌ quiꞌo̱j wi̱ꞌ take cꞌacharel naquiquimic je, nqui wi̱n.
19 Chiri̱j chic ruꞌ xikꞌor woꞌ chic wi̱n chi jeꞌ wili:
«Chatzꞌihmbaj take nicꞌ paꞌ nimal xcꞌuhtjic chic aweh reꞌ cꞌahchiꞌ awilom chi cꞌahchiꞌ ricꞌulmujic eh reꞌ take cꞌahchiꞌ awilom chi cu naricꞌulmujic johtok chi kawach. 20 Reꞌ hat xawilow i wuku̱b chi chꞌimi̱l choplic wuꞌum ru̱cꞌ risecꞌa̱j nikꞌab eh xawilow woꞌ i paꞌa̱b cante̱la wuku̱b ritzꞌukunbal cante̱la wilic reh jeꞌ ru̱cꞌ tikꞌimaj ru̱cꞌ kꞌan woric laj chꞌihchꞌ xa reꞌ laꞌ maꞌ xarak ta chiri̱j chaj bih ra̱j rikꞌorom reꞌreꞌ. Reꞌ maꞌ xarak ta chiri̱j reꞌreꞌ jeꞌ wili nelic wi̱ꞌ: Reꞌ take wuku̱b chi chꞌimi̱l rijalwachej i juꞌjun queh wuku̱b chi aj tzꞌeꞌ wa̱ch quicꞌambic quibe̱h take juꞌjun queh i wukchꞌuk chi aj niminel nquimol qui̱b chi rilokꞌonjic wach i Dios. Jeꞌ woꞌ reꞌ i maꞌ laj paꞌa̱b cante̱la reꞌ wuku̱b chi tzꞌukunbal cante̱la wilic reh, juꞌjun queh tzꞌukunbal reꞌreꞌ rijalwachej i juꞌjun queh wukchꞌuk chi aj niminel nquimol qui̱b chi rilokꞌonjic wach i Dios, nqui wi̱n.