1 Manaŋgopieŋ, Mamac-nâŋec e maŋjauŋ mo iŋucne enârehuc naru motecfâc-ticne munârewec. Eme i hâcne juŋgopeneŋ. Ŋic miti tâmiric jaŋe mi ʒâŋitac-nâpoeŋgopieŋ, i Anutu e jahacne mi ʒâŋitambiŋ irec. 2 Âgo biaŋfâc-nane, nâŋâc ʒiŋuczia Anuture naru motecfâc juŋgopeneŋ, â juku sâc weniŋucne bâfuanaŋmu, ine biac mi fua taniŋkekac. Ʒiŋuc ine manaŋgopeneŋ: Wofuŋ fua tâcneme juju hawari-ticne honehuc sâc ijaha enaŋmu. 3 Eme moc e irec erâ worickehuc juocmuzi Wofuŋ e ɋaɋacne jukac iŋucnea juocte maŋticne emasaŋkeocmu.

4 Moc e sâqocne baekac, e sâcmutâc dâŋ qâsuaekac, sâcmutâc dâŋ qâqâsua izi hâcne sâqocne fârine. 5 Á Jesure ine manaeŋgopieŋ, e sâqocne bârireocte fisiwec, erâ e jahacne ine bahac fâsâc juwec. 6 Moc e Jesuo juekaczi sâqocne mi baekac. Á moc e sâqocne baekac, e ine Jesu hone manac mi ecnewec. 7 Naru motecfâc-nane, moczi moc maŋ bâsifuc eŋarezo mupie mi mananʒepieŋ. Moc e tiŋne hata âteme ere ŋic tiŋne muzo, e Jesuzi juju tiŋne juekac, iŋuc jaha juocmu. 8 Moc e sâqocne baocmu, e Sataŋte ŋic. Sataŋ e sâqocne fuŋnaonecteaŋ bawec bahuc juekac. Anuture Ŋokâ eki Sataŋte gie imackeocte fisiwec hâcne.

9 Moc e Anuturaonec fuaweczi sâqocne mi baocmu. Anuturaonec jujure tâpiri focnehame e Anuturaonec fuakicnezi wemocko sâqocne baocmu. 10 Anuture naru motec â Sataŋte naru motecfâc jaŋere fuŋne ʒiŋucko hâcne taniŋkeme honezo: Moc e juju tiŋne mi juocmu, e Anuturaonec mi mucnezo, â moc e âgo-ticne maŋjauŋ mi ecneocmu, ere ijaha muzo. 11 Mitidâŋ mana wareeŋgopieŋ i ʒiŋuc hâcne: Maŋzi Jauŋ babac enʒepeneŋ. 12 Kaiŋte hata mi âtenʒepeneŋ, e sâqocne runere motec erâ ɋaticne qâhâmowec. Erâ wemocte qâhâmowec? Ine kecʒiŋucte: E Jahacne juju bapa sâqocne â ɋaticnere juju bapa biaŋne irec.

13 Âgofâc-nane, miti tâmiriczi qaisoc-ŋopapie manapie iŋuc me iŋuc mi ezejec. 14 Nâŋâcne ʒiŋuc manaeŋgopeneŋ: Hâmockonec wiserâ jujuo raʒimbeŋ. Iŋuc ekicnere hâcne âgofâc-nâŋec maŋjauŋ ejareeŋgopeneŋ. Moc e maŋjauŋ tâmiric juocmu e ine hâmocnea Juocmu. 15 Moc e âgo-ticne qaisockeocmu e ʒika qaqaŋic mucnezo. Eme ŋoŋe ʒika qaqaŋic jaŋere manaeŋgopieŋ, jaŋere maŋko juju sanaŋ mi fuarâ foocmu. 16 Jesu e nâŋâcnere erâ juju-ticne qikiŋnewecko maŋjauŋte fuŋne ʒâŋitambeŋ. Eme nâŋâc iŋuc jaha âgofâc-nâŋec jaŋere erâ juju-nâŋec qikiŋnenaŋte munârekicne. 17 Ŋic moc e nânâ mafa mâriri-ticne fohame âgo-ticne waha qaqane jume hone takirerâ bune bofackeocmu, ere muzo, maŋticnao Anuture maŋjauŋ mi fokac. 18 Naru motecfâc-mae, nâŋâc jauŋ i dâŋzi â micbipiczi sawa mâcne, mezi â maŋzi banʒepeneŋ.

19 Iŋuc epene dâŋ fâri qizecnere kikefuŋ juŋgopeneŋ irec fuŋne taniŋkeme mananaŋmu. Eme maŋnâŋeczi mumu hehec enâreme Anuture maio sâcne bâmiriŋkenaŋmu. 20 Ehuc ʒiŋuc munʒepeneŋ: Anutu e maŋnâŋecte sâc mâcne, e sâc moc juhuc wiac mana-fâreekac. 21 Jorocfâc-nane, maŋnâŋeczi mumu hehec mi enârehame Anuture maio qacfiric sâcne junaŋmu. 22 Erâ micdâŋ-ticne reŋkehuc ere maio wiac ebac epene biaŋkeekacte irec me irec numucnepene nâreekac. 23 Sâcmutâc dâŋticne kecʒiŋuc fokac: ŋokâ-ticne Jesu Kristo ere ʒâŋe manasiŋkehuc maŋzi jauŋ babac enʒepeneŋ. Iŋuc hâcne enaŋte munârewec. 24 Moc e sâcmutâc dâŋticne reŋkeocmu e Anutuhec maŋmaŋ enicmu. Anutu maŋkeeŋgopeneŋ i Mâro nârewec eki mufua-nâreme manaeŋgopeneŋ.