1 Festozi kia erâ ʒoaŋ jahec â moc Jurâ Kaisarea haeonec Jerusalem haeo fewec. 2 Fe fisime taha bapa micne â Judaŋic fekicne erao fisirâ Paulore dâŋ âzâcnembiŋ. 3 Ehuc mana urue-jarerâ mume Paulo Jerusalem haeo fisiocte âzâcnembiŋ. Jaŋe hatao Paulo somâckerâ qaniŋte manasuhuc kia iŋuc âzâcnembiŋ. 4 Mupie Festozi ʒiŋuc jazawec: “Paulo e Kaisarea haeo kâpâcwâru ficko ŋekac; eme no ijaha biac mocwâc risie hupemu. 5 Paulo bahacdâŋ-ticne muzo murâ ŋoŋeraonec micne bapa nohec mâmâc hurâ munʒepieŋ.”

6 Iŋuc murâ ʒoaŋ 8 me 10 Jerusalem haeo jurâ Kaisarea haeo rahuwec. Izi hae fureme dâŋficko ferâ mume Paulo bafembiŋ. 7 Ficko feme Jerusalem haeonec Judaŋic jaŋe orâŋkerâ samarierâ qorickehuc domambiŋ. Erâ qoqoricte fârine mi fuawec. 8 Mupie Paulozi dâŋjeŋic bawahahuc ʒiŋuc muwec: “No Judaŋic sâcmutâc dâŋjeŋic me taha ufuŋ me Roma ŋicwofuŋ moc mi musuaekopac.” 9 Eme Festozi Judaŋic bubiaŋ qajareocte Paulo indiŋkerâ muwec, “Go Jerusalem haeo jowacgu ferâ ira dâŋge mutarape me?” 10 Indiŋkeme Paulozi ʒiŋuc âzâcnewec: “Roma ŋicwofuŋte dâŋfic ʒine hâcne; nore dâŋ ʒira mutarazo; go gahac fuŋne-nane manakic, no Judaŋic wiac hehesic moc mi ejarepo. 11 No bahac me kiŋsâko moc bâfuarâ muzac, nuzo mutec sahac-nane mi sakarezapo. Jaŋe ine burecko qoricnuŋgopieŋte moczi moc bubiaŋ qajarehuc jaŋere meo sâcne mi râecnu-jâmbâŋkeocmu. Irec ʒi Roma ŋicwofuŋzi dâŋnane mutaraocte mukopac.” 12 Iŋuc mume Festo e ŋicfâc-ticne jaŋehec muc manac erâ Paulo ʒiŋuc âzâcnewec: “Ŋicwofuŋ sâkore mukomec, irec ŋicwofuŋ sâkorao razemec.”

13 Ʒoaŋ gie bapa tucne tarame ŋicwofuŋ Agripa â seŋticne Beanike jahe Kaisarea haeo hurâ Festo âgo bapic. 14 Eme jahe ʒoaŋ gâcne ehec ŋeŋe juju ehapire Festozi Paulore dâŋ binaŋ ecnehuc ŋicwofuŋ ʒiŋuc âzâcnewec: “Felikizi kâpâcwâru ŋic moc beherâ rame ŋehuc jukac. 15 Eme no fisirâ Jerusalem haeo fepe taha bapa micne â Judaŋic jaŋere soŋaŋ jaŋe norao tumaŋnehuc ŋic e qape hâmoocte munarembiŋ. 16 Munarepie no dâŋ ŋifecne ʒiŋuc jazapo: ‘Romaŋic nâŋe qoqoricte sawa ŋic moc ʒikare mi qikiŋneeŋgopeneŋ. Nâŋe ŋic dâŋko râekicne e mecne â dâŋrune mecne mâmâc hetumaŋ-jopapene ŋifec â ŋifec dâŋ sâckoa mueŋgopieŋ. 17 Iŋuc jazape Judaŋic norao warepie izia hae fureme jaŋe â e dâŋficko bâturec-jopapo. 18 Eme jaŋe ere sâqocne qizecne moc mufuaniŋmu muhape 19 jaŋe miti-jeŋicte hehefaric dâŋ â ŋic hâmokicne moc ʒâŋene Jesu ere dâŋ bajumbiŋ; ŋic ere hâcne Paulozi ʒiŋuc muekac: ‘E faharewec jukac. 20 Eme no dâŋ iŋucnere kâuc barâ Paulo Jerusalem haeo feme ira dâŋticne mutarapemurâ âzâcnepo. 21 Âzâcnepe Paulo e Roma ŋicwofuŋzi dâŋticne mutaraocte muwec. Eme Paulo e rara dameŋ maickeme mupe Roma ŋicwofuŋtao raocte kâpâcwâru ficko woŋec jukac.” 22 Festozi iŋuc muhuc âzâcneme Agripazi muwec: “No ŋic e hâcne dâŋ moc mume manapemurâ enarekac.” Eme Festozi muwec, “Sâcne, tomâcko manazemec.”

23 Hae fureme Agripa â Beanike jahe eri qaraweŋ-jekichec tutumaŋ ficko fepire momori soŋaŋ kâcɋene â hae irec ŋic fekicne mâmâc bâjâpec-jofarâ fembiŋ. Fefârepie Festozi mume Paulo bafembiŋ. 24 Bafepie Festozi dâŋ ʒiŋuc jazawec: “Ŋicwofuŋ Agripa â ŋicfâc-nane gâcne dâŋ ŋazape mananiŋ. Ŋic domakac ʒi ere erâ Judaŋic wemo afecnezi Jerusalem haeo fotarie-narehuc wira owac erâ mumbiŋ, ‘E mi jujâmbâŋkezejec. 25 No ine bahac-ticnere manape ʒika kiocte irec sâc mi ewec. Eme Roma ŋicwofuŋte muwecte erao sorepe raocmu. 26 Erâ dâŋ fârine basahuc ŋicbomboŋ sâkore papia qâreŋkepemurâ fâcke turuŋ ekopac. Eme irec hâcne ŋic kecʒi e ŋoŋerao â ŋicwofuŋ Agripa gorao râepe domakac. Eme ŋoŋe fuŋne-ticne bataniŋkepie dâŋticne qâreŋkepe razejec. 27 No kâpâcwâru ŋic moc kiŋticnere dâŋ mi qâreŋkehuc Roma haeo mâc sorepe raocte manape quŋkekac.”