1 Ŋoŋerao ʒika â rârâsi foekac i fuŋne weniŋucte? Me sahac-ŋeŋicko andac forakac izi hâcne ʒika gie baekac. 2 Ŋoŋe andac eipiehuc wiac mi rauckeeŋgopieŋ. Ŋoŋe qaqac â iiŋguuŋ eec ehuc sifu wiac sâcne mi hotâckeeŋgopieŋ. Ŋoŋe kikisâ â kikisuec ehuc wiac sâcne mi hure nâc eeŋgopieŋ. I nunumu tâmiric jueŋgopieŋ irec. 3 Moc i numu-bipiehuc wiac mi roeŋgopieŋ, ine maŋŋeŋicko dâŋ sâqocne ʒiŋuc foha numueŋgopieŋte: “Wiac fua-nâreme samarierâ andac-nâŋecte fârine bâfuanʒepeneŋ.”

4 Oi, ʒâʒâfic hehetâc ŋic ŋoŋe¡ Mâreŋko wiac fokac irec biŋe juocmuzi Anutu râpeckeocmu, i mi manaŋgopieŋ me? Irec moc e mâreŋkopec wiac kosa âgo ecneocmuzi Anutu kisâ ecneocmu. 5 Me dâŋqâreŋ kecʒiŋuc fokac i ŋoŋe manapie racne eekac me? “Maŋnâŋecko mâro ŋewec i ere biŋe sawa juocte ʒoɋac sâko eekac.” 6 Erâ ŋifec ine aki anonoc wemo afecne sicne-nâreekac. Irec dâŋqâreŋ hâcne kecʒiŋuc fokac: “Anutu e ŋic maŋfefe dope qatara-jareekac, ŋic maŋhuhuŋ ine aki anonoc sicne-jareekac.” 7 Irec ŋoŋe Anuture rurumaŋko raʒirâ domanʒepieŋ. Ehuc Sataŋ bâsuenʒepieŋ, eme behec-ŋoparâ wiseocmu. 8 Ŋoŋe Anutu maickepie eki wâc maic-ŋopaocmu. Sâqocne bapa, maŋŋeŋic ra qa ware qa eekac, ŋoŋe meŋeŋic ʒurerâ maŋŋeŋic baɋaɋackenʒepieŋ. 9 Ŋoŋe fuŋne-ŋeŋic mana tararâ ki busâqoc enʒepieŋ. Gâgâwi-ŋeŋiczi rirehame busâqoc fuazejec, â ʒeri-ŋeŋiczi rirehame ki mamakuc fuazejec. 10 Wofuŋte maio maŋhuhuŋ jupie eki bafaharec-ŋopaocmu.

11 Âgofâc-nane, ŋoŋe mumusâqoc mi enʒepieŋ. Moc e âgo-ticne musâqorerâ okacne dâŋko râeocmu, e sâcmutâc dâŋ musâqorehuc hetâtieocmu. Go ine sâcmutâc dâŋ hetâtiecmuo rereŋŋic mi ehuc mumutara ŋic ecmu. 12 Sâcmutâc dâŋ irec mumufua â soŋaŋ mocjaha sawa jukac, aakic â bebehe irec gie ekizia baocmu. Go ine wemogezi âgoge okacne dâŋko râecmu?

13 Ajoc, moc ʒi mananiŋ. ŋoŋe kecʒiŋuc mueŋgopieŋ: Miŋecgac me tomâcko hae ira ra moneŋ mafa hurehuc juhapene jara moc tarame risienʒepeneŋ.” 14 Oi ŋoŋe, tomâcko wiac iŋuc me iŋuc fuaocmu, i moc manaeŋgopieŋ? Me juju-ŋeŋic i weniŋucne? I rombâŋ iŋucne, fua fuahuc izia qaʒueekac. 15 Irec ŋoŋe kecʒiŋuc mupie sâckeocmu: “Wofuŋzi mana-nâreme ɋâricne juhuc iŋuc me iŋuc enʒepeneŋ.” 16 Ŋoŋe ine pacgoroŋ dâŋ boc muhuc sahac-ŋeŋic bafeeŋgopieŋ. Pacgoroŋ dâŋ i wiac sâqocne. 17 Ŋic moc e wiac biaŋne eocte mana tarahuc sifu qikiŋneekac, e bahac bâfuakac muzo.