1 Ʒi nemure tiwâ ʒepecte mupe. Nâŋâc fuŋne mamana jufâreŋgopeneŋ i manaŋgopeneŋ. Erâ fuŋne mamana saware sahac fefe fuaocmu, maŋjauŋhec juhuc ine heheʒakiec erâ sâcne juzo. 2 Moc e mamana-ticne mana sokame ere muzo, mamana fârine mi focnekac. 3 Moc e Anutu maŋjauŋ ecneocmu, e ine Anutuzi manariŋkewec. 4 Nemure tiwâ ʒepecte ine ʒiŋuc manaŋgopeneŋ: Nemu e wiac fârine mâcne, Anutu e mocjaha fârine. 5 Nemu sambâŋko me mâreŋko juŋgopieŋ, dâŋ iŋuc mupie nemu â wofuŋ burec burec wemo afecne foraŋgopieŋ ekac. 6 Á nâŋâc ine Anutu Mamac-nâŋec mocjaha junârekac, eraonec hâcne wiac sasawa fua-fârewec â nâŋâc erea juŋgopeneŋ. Erâ Wofuŋ mocjaha, Jesu Kristo, ere meo wiac sasawa â nâŋâc jufâreŋgopeneŋ. 7 Ŋic gâcne jaŋe ine fuŋne iŋuc sâcne mi mana-hâmoŋgopieŋ. Eme iŋucnezi nemu e wiac fârine muwarehuc juku maŋjeŋic ewecte tiwâ ʒepec e araŋ bacnehuc manabâcko nâpie maŋjeŋic hegâpâreekac.

8 Anutu e nânâre erâ mi mana-nâreme biaŋkeocmu. Tiwâ ʒepec qikiŋnepene mi mana wahac-nâpoocmu, me nâpene mi mana-nâreme feocmu. 9 Mâc gâcne ŋoŋe mana jaŋgeŋkehuc nâeŋgopieŋzi âgofâc-ŋeŋic miti afecne fojareekac jaŋe maŋ bâsifuc ejarenʒipiŋte manabâc enʒepieŋ. 10 Go qarâ sanaŋgere nemu ufuŋko ʒepecne nâhuc ŋehaŋtec âgoge moc manabâcheczi honecgurâ, nakacte nâpe muhuc mi ijaha nâocmu me? 11 Eme âgoge miti afecne focnekac e Kristore soczia wâc kitâcneweczi gore qarâ sanaŋte mi docke sâqorec eocmu me? 12 Ŋoŋe iŋuc ehuc âgofâc-ŋeŋic wâwânâŋ ejarehuc maŋ bâsifuc ejareniŋmu, ine Kristo wâwânâŋ ecneniŋmu. 13 Irec no tiwâ ʒepec nâpe âgo-nanezi irec erâ docke sâqorec ezacte ere manabâc ehuc tiwâ ʒepec qikiŋnehuc mâc juku hâmozepac.