10
Mârozi Israe ŋic mâreŋ sawao mâsi bajareha jumbiŋ
1 Âgofâc-nane, no mimiŋnefâc-nâŋec wiac embiŋ irec manasu-ŋarepe mananiŋ Jaŋe mâmâc sasawa karoraczi sâoc-jopaha rahuc hâwec fotâcnembiŋ. 2 Ehuc Mosere ŋicfâc eniŋte karorac â hâweczi miti opâ-jeŋic eme ruambiŋ. 3 Erâ Mârozi nânâ bâfua-jarewec i jaŋe mâmâc sasawa nârambiŋ, 4 â Mârozi opâ bâfua-jarewec i wâc mâmâc sasawa nârambiŋ. Mârore qânâzi bâjâpec-jopawec, eraonec hâcne opâ wahame nâmbiŋ, qânâ ʒâŋene Kristo.
Israe ŋic jaŋerao wiac tuawec i uŋsawaŋ-nâŋec ekac
5 Eme sifu Anutuzi gâcne sâko mana sâqore-jareme mâreŋ sawao hâmo sipiric efârembiŋ. 6 Jaŋerao wiac fuawec i uŋsawaŋ-nâŋec ekac, jaŋe sâqocnere andac embiŋ iŋuc jaha enʒipeŋte. 7 Jaŋeraonec gâcnezi nemu qaŋgec wiacte kiŋaŋ qaqa embiŋ, iŋuc wâc mi enʒepeneŋ. Dâŋqâreŋ ʒiŋuc hâcne fokac: “Ŋic jaŋe waha ŋehuc tiwâ ʒepec nâku faharerâ gae wohuc domambiŋ. 8 Erâ sasec boe sau wâc mi enʒepeneŋ. Jaŋeraonec gâcnezi sasec boe sau embiŋ, ehuc ʒoaŋ gie bapa ijaha ŋic 23 tauseŋ hâmombiŋ. 9 Erâ Wofuŋ maŋbâiŋ wâc mi ecnenʒepeneŋ. Jaŋeraonec gâcnezi maŋbâiŋ ecnepie homazi kicjopame hâmo sipiric embiŋ. 10 Erâ kâroŋ wâc mi qanʒepeneŋ. Jaŋeraonec gâcnezi kâroŋ qapie sisipiric runezi sipiric-jopawec. 11 Jaŋerao wiac fuawec izi ma âkendâŋnekicne ekac. Eme mâreŋte dameŋ qândâŋkeha juŋgopeneŋ nâŋâcnere uŋsawaŋ muhuc dâŋbinaŋ i hâcne qâreŋkekicne. 12 Irec hâcne moc e jahacnere maname sasanaŋ eekaczi dockezacte rumehuc juzejec. 13 Ŋoŋerao eesâic fua warewec i ŋic tâpiri-ŋeŋicte sâcko fuawec. Erâ Anutu e mume sasanaŋzi eesâic baafeckeme tâpiri-ŋeŋicte sâc mi jâuruocmu. Erâ eesâic fuaocmu sâc âte sâoc-ŋopame sâcne sanaŋkeniŋmu.
Wofuŋte nânâ nâhuc demoŋte mâmâc nâzo i mi eene
14 Irec hâcne, âgofâc-nane, ŋoŋe nemu qaŋgec wiacte geŋkerâ junʒepieŋ. 15 Ŋoŋe maŋ mamanasuhec juŋgopieŋ, irec dâŋ ʒi mupe ŋaŋac mana honeniŋ. 16 Râqâcko waiŋ jambuŋkewecte jambuŋkerâ nâhuc Kristore sochec ʒuʒuhuc mi eeŋgopeneŋ me? Á poroŋ nâhuc Kristore sahachec ʒuʒuhuc mi eeŋgopeneŋ me? 17 Nânâzi mocjaha, i gugumec ehuc ŋic bocjahazi âgo guru mocjaha eeŋgopeneŋ. 18 Ŋoŋe sahackopec Israe ŋic juŋgopieŋ jaŋere manasuniŋ. Ŋic taha bâzi nâeŋgopieŋ jaŋe alatahec ʒuʒuhuc mi eeŋgopieŋ me? 19 Dâŋ i weniŋucte mukopac? Nemure tiwâ ʒepec i wiac fârine me? Á nemu e jahacne wâc fârine me? 20 Iŋuc aricne. Qâpuc jaŋe tiwâ ʒepec rikeeŋgopieŋ i Anuture biŋe mâcne, i demoŋ jaŋere biŋe eekac. Eme no ŋoŋere ʒiŋuc mukopac: Ŋoŋe demoŋ jaŋehec ʒuʒuhuc mi enʒepieŋ. 21 Wofuŋte râqâckonec nâhuc demoŋ jaŋere râqâckonec mâmâc nânâ i sâcne mi eniŋmu. Á Wofuŋte teboonec nâhuc demoŋ jaŋere teboonec mâmâc nânâ i wâc sâcne mi eniŋmu. 22 Me nâŋâc Wofuŋ maŋbâiŋ ecnenaŋ me? Nâŋâcne tâpirizi ere sirickekac me?
Moc e jahacnere sawa manasuhuc jume mi sâckeocmu
23 Wiac sasawa eene fokac, erâ wiac sasawa epene izi sâcne mi bafic-nâpoocmu. Wiac sasawa eene fokac, erâ wiac sasawa ehuc mitio dodopec eene ine mi fokac. 24 Moc e jahacnere mi manasuhuc, âgo-ticnere manasuzejec. 25 Ŋoŋe buŋko bec qowi furine bazo murâ kosa banʒepieŋ, ehuc keci omane me nemure ufuŋkonec, iŋuc muhuc mu manabâc mi enʒepieŋ. 26 Mâreŋ â wiac sasawa mâreŋ fusucmarâ fokac i Wofuŋzi rune Jukac. 27 Qâpuc moczi hezu hewâneŋ eŋareme ficticnao fezo murâ fenʒepieŋ, erâ nânâ qowi gumec-ŋopame manabâc tâmiric kosa nâhuc mu wioc mi enʒepieŋ. 28 Á nahapie ŋic moczi ʒiŋuc moc ŋazaocmu: “Bec ʒi nemu ufuŋkonec”, eme mi nânʒepieŋ. I mufua-ŋareocmu ŋic ere manabâc ehuc qikiŋnenʒepieŋ. 29 I nâpie ŋaŋacne maŋ sâqorezacte mâcne, âgo-ŋeŋicte maŋ sâqorezacte mukopac. No nahacne maŋ manabâc tâmiric fome wemocte moczi e jahacne maŋte sâc norao âke hotaocmu? 30 No Anutu daŋge âzâcnehuc nunumu faio nâpe moczi wemocte mana sâqore-nareocmu?
Bahacmâc juzo
31 Irec ŋoŋe nânâ qowi nâniŋte, me i me i eniŋte Anutu mumbiaŋkehuc enʒepieŋ. 32 Ŋoŋe Judaŋic â Grikŋic â Anuture kikefuŋ jaŋere maio bahacmâc jupie moc mi mana sâqore-ŋarenʒepieŋ. 33 No iŋuc jaha ŋic fuŋne fuŋne jaŋe honecnupie sâckeocte juhuc no nahacne wiac biaŋkeocte mâcne, ŋic bocjaha miti manarâ biaŋkeniŋte giene baekopac.