1 Ʒoaŋ mocko Petoro â Johane jahe owâ gieo nunumu dameŋ maickeme taha ufuŋko fepic. 2 Ehame ŋic moc neŋgoc bumaŋkonec puriŋ fuakicne e reŋke warembiŋ. Ŋic e âgofâcne jaŋe ʒoaŋne ʒoaŋne taha ufuŋte Motâcbiaŋko râepie ŋehuc ŋic ufuŋko fec wahac embiŋ jaŋe bâmec wiacte numu-jare jujec. 3 Eme Petoro â Johane jahe taha ufuŋko fezo ehapire honec-jofarâ iŋuc jaha numu-jactewec. 4 Numu-jacteme jahe e hone dendeŋnepic, ehuc Petorozi ʒiŋuc âzâcnewec: “Go nâhe honec-nâfoc.” 5 Mume ŋicpuriŋzi wiac moc narezo mukopirec muhuc nâckâbâc jaha honec-jofawec. 6 Iŋuc ehame Petorozi ʒiŋuc âzâcnewec: “Moneŋ boreŋ wiac no mi fonarekac, wiac mocjaha fonarekac ine garepe roc, Jesu Kristo Nazarete haeonec ere micte gazape fahare hata juc.” 7 Iŋuc murâ mefârenao rohuc bafaharewec. Ecneme izia kike bibiric-ticne urueme fu herâ fahare domawec, 8 erâ jahehec mâmâc taha ufuŋko fembiŋ, erâ hata juju-ticnere kiwac qawac ehuc Anutu muteŋkewec. 9 Eme ŋic sasawa jaŋe hata jume â Anutu muteŋkeme honembiŋ. 10 Ehuc ʒâŋitarâ mumbiŋ, “Taha ufuŋte Motâcbiaŋko bâmec wiacte numu-nârehuc ŋeekac ine hâcne.” Erâ biaŋkewec irec hone fâfârerâ mâretec seckembiŋ. 11 Eme Petoro â Johane jaherao qohotame ŋic mâmâc sasawa taha ufuŋ maŋne moc ʒâŋene Salomo ira jaherao tumaŋne-fârehuc me kirâ domambiŋ.

12 Iŋuc epie Petorozi honec-joparâ ŋic dâŋ ʒiŋuc jazawec: “Israe ŋicbureŋ, ŋoŋe wemocte ŋic ʒirec hone warec boc enâctehuc domaŋgopieŋ? Wiac nâhe nâhâcne mitire me tâpirire e hata juju-ticne bâfuacnekoperec me? 13 Aricne, Abraham â Isaka â Jakobo jaŋere Anutu, mimiŋnefâc-nâŋec jaŋere Anutu, eki hâcne kiŋaŋŋic-ticne Jesu ere Wofuŋ qâreŋ ŋic kecʒirec faio bâfuame honeŋgopieŋ. Ŋoŋe ine e qaisockerâ qâpuc jaŋerao râembiŋ. Ehame Pilatozi firuezo mume ŋoŋe qikiŋnembiŋ. 14 Ine hâcne Maŋɋaɋac â Tiŋne rune e qikiŋnehuc ʒika qaqaŋic akicke-ŋareocte mu bâuruec ecnembiŋ. 15 Ehuc jujure Micne bapa qambiŋ. Qapie Anutuzi bâɋâreme hâmockonec fahareme ʒâŋe fâri-nâŋeczi qame honembeŋ. 16 Eme hone manac ecneeŋgopieŋ ŋic kecʒi e Jesu ʒâŋe-ticne manasiŋkepene ʒâŋe-ticnere tâpirizi bâpiaŋkeme sahac ɋiɋic eme hone-fâreŋgopieŋ. 17 Erâ qomâfâc-nane, no manakopac, ŋoŋe â micne bapafâc-ŋeŋic ŋoŋe kâuc bahuc iŋuc embiŋ. 18 Iŋuc epie Anutu e Kristo ʒâic manaku hâmoocte irec dâŋ porofete sasawa jaŋere micko râeme mu qâreŋ embiŋ i hâcne sanaŋkewec. 19 Irec ŋoŋe maŋŋeŋic bârisierâ juju raŋɋa-ŋeŋic râpeckepie kiŋŋeŋic tâmirezejec. Eme Wofuŋte maio nanaŋ ʒurec ʒurec juju irec dameŋ maicke-ŋarezejec. 20 Erâ wâc Kristo-ŋeŋic baʒawie-ŋarewec, Jesu hâcne, sore-ŋarezejec. 21 Ʒi ine Jesu e sambâŋzi foŋkeme jukuhame wiac sasawa Anutuzi mârâc jaha jâmbâŋ porofetefâc-ticne micjeŋicko râeme mumbiŋ i fâri fideteŋ eocte dameŋne maickeocmu. 22 Mose e dâŋ kecʒiŋuc muwec: ‘Wofuŋ Anutu e qomâfâc-ŋeŋic jaŋere ŋondeŋkonec porofete moc no iŋucne bâfua-ŋareme dâŋ ŋazame sâc mananʒepieŋ. 23 Eme moc e dâŋticne qikiŋneme e qarâ qârârâŋnenʒepieŋ. 24 Erâ porofete gâcne Samue jume juwarembiŋ jaŋe iŋuc jaha dameŋ ʒirec dâŋ mu qâreŋ efârembiŋ. 25 Porofete jumbiŋ jaŋere ɋâricfâc ŋoŋe, erâ Anutuzi mimiŋnefâc-ŋeŋic jaŋehec ʒâʒâfic ewec, ʒâʒâfic irec rune ŋoŋe jaha wâc. Ʒâʒâfic i Abraham ʒiŋuc âzâcnehuc bâfuawec: No ɋâricfâcge jambuŋ-jopape jambuŋ izi mâreŋne mâreŋne ŋic sâcjopa-fârezejec. 26 Ŋoŋere hâcne Anutuzi qanaŋ manasurâ Ŋokâ-ticne soreme waha fuawec, i ŋoŋe sasawa sindaŋ hata-ŋeŋickonec bârisiec-ŋopahuc jambuŋ-ŋopaocte iŋuc hâcne ewec.”