8
Opâ ruac râsi tuŋke-jarembiŋ
1 Eme dameŋ ijaha Jerusalem haeonec opâ ruac kikefuŋ râsi sâko fuŋke-jarembiŋ. Ejarepie wiserâ râwiŋ qâwiŋ erâ Judaia â Samaria mâreŋko rafârembiŋ. Aposolo jaŋe sawa getâc-jopapie jumbiŋ. 2 Eme ŋic mitine gâcne jaŋe Stefano duckerâ kio mamakuc ecnembiŋ. 3 Saulo eki ine opâ ruac ima bacjoparâ ficne ficne ferâ ro fârec ejarehuc kâpâcwâru ficko râec-jopahuc domawec.
Filipozi Samaria haeo miti gie bawec
4 Opâ ruac bâtâtiec-jopakicne jaŋe ine hae sâc juhuc ŋic miti jaza rambiŋ. 5 Eku Filipozi Samaria ŋic jaŋere hae qizecko fisirâ Kristore biŋedâŋ jazawec. 6 Jazame ŋic guru sâko jaŋe dâŋticnere ejareme mana aŋac embiŋ. Ehuc mâsi fuŋne fuŋne bame honembiŋ. 7 E demoŋ bocjaha jâpe-jareme ŋicmaŋkonec wefurâ owackehuc wisembiŋ. Erâ wâc ʒeke puriŋ â kike demba bocjaha sahac ɋiɋic bacjopawec. 8 Eme irec hae ira ʒeri kâcɋene fuawec.
9 Eme hae ijaha qaŋgec bapa moc juwec, ʒâŋene Simoŋ. E jahacnere no ŋic fekicne muhuc qaŋgec gie bame Samaria ŋicguru jaŋe honepie bipinehec ewec. 10 Ehuc fekicne wahakicne jaŋe ere manapie fefene eme ʒiŋuc mujumbieŋ: “Ŋic kecʒizi Anuture tâpiri, Sokawec Sâko mucnekicne, irec hozine hâcne.” 11 Eme qaŋgec-ticnezi maŋ bâsifuc ejarewecte dameŋ ʒora erao qohotahuc jumbiŋ. 12 Juhapie Filipozi Anuture uucmaŋte Biŋebiaŋ â Jesu Kristore dâŋ binaŋ Jazame mana ʒakierâ ŋic â ŋokac mâmâc Miti Opâ ruambiŋ. 13 Iŋuc epie Simoŋ e iŋuc jaha miti mana ʒakierâ opâ ruarâ Filipore maŋfuŋko juwec, ehuc mâsi fuŋne fuŋne bame hone warec mâretec ehuc juwec.
Petoro â Johane Samaria haeo rapic
14 Eme Samaria ŋicguru jaŋe Anuture dâŋ ro maŋ epie irec biŋe Jerusalem haeo aposolo jaŋerao rame manambiŋ. Ehuc Petoro â Johane sorec-jofapie rapic. 15 Ra fisirâ jaŋe Tiri Mârohec eniŋte Wofuŋ numucnepic. 16 Juwicnao Tiri Mârozi jaŋerao mi wahawec, jaŋe mâc Jesure ʒâŋeo ʒuhuckehuc Miti Opâ sawa ruambiŋ. 17 Eme aposolo jahe mejekic qizec-jeŋicko râepire jaŋe Tiri Mârohec embiŋ.
Simoŋ e Tiri Mâro furine baocte muwec
18 Aposolo jahe ŋic jaŋere qizec faio mejekic râepire Tiri Mârohec epie Simoŋzi honerâ jaherao moneŋ amecke fisirâ 19 ʒiŋuc jasawec: “Ŋohe tâpiri i no iŋuc jaha narepire ŋic mocte qizecko menane râepe Tiri Mârohec ezejec.” 20 Mume Petorozi ʒiŋuc âzâcnewec: “Go Anuture jauŋ moneŋzi furine bazo mukomecte moneŋgezi gohec mâmâc sisipiricko razac me¡ 21 Anutuzi maŋsiocge honekacte tâpiri ʒizi moc mi hehuŋgaŋguhame mâc jâmbâŋ jucmu. 22 Go bâbâsifucge qikiŋnehuc maŋge bârisierâ Wofuŋ numucnetec maŋgao andac sâko bâtâmire-garezejec. 23 Go sâqocne hâtânezi hariŋguekac hâcne.” 24 Eme Simoŋzi ʒiŋuc muwec: “Ŋohe ŋahac nore erâ Wofuŋ numucnepire akicnuha wiac mukopirec i mi fua-narezejec.” 25 Eme aposolo jahe ŋic ŋokac Wofuŋte dâŋ jaza sanaŋkerâ Jerusalem haeo risiepic. Risiehuc Samaria hae bocjaha Biŋebiaŋ jaza jaza rapic.
Filipozi Africa ŋic moc miti âzâcnewec
26 Wofuŋte aŋelo moczi Filipo ʒiŋuc muhuc âzâcnewec: “Go ʒawierâ juwickopec, Jerusalem haeonec Gaza haeo hueŋgopieŋ hata ira razemec.” Hata i mâreŋ tuhuo fokac. 27 Iŋuc muhuc âzâcneme Filipozi ʒawierâ rawec. Eme Etiopia mâreŋko ŋokac wofuŋ juwec, ʒâŋene Kandake, ere ŋicbomboŋ â moneŋ mafa soŋaŋ sâko eki Jerusalem haeo Anutu mai ecneocte rafeweckonec 28 risieocte keretacko rahuc porofete Jesaja ere dâŋqâreŋ wosewec. 29 Iŋuc ehame Mârozi Filipo ʒiŋuc âzâcnewec: “Ajoc, go ra keretac kecocni bâfuac.” 30 Mume Filipozi ra bâfuarâ ŋic e porofete Jesaja ere dâŋqâreŋ wosehame manarâ wiocnewec, “Dâŋ wosekomec irec fuŋne manakic me?” 31 Eme eki muwec, “Moczi mi nazahame nahackoaŋ wemocko sâcne manapemu?” Iŋuc murâ Filipo âzâcneme keretacko ferâ qâteme ŋepic. 32 Dâŋqâreŋ wosewec ine kecʒiŋuc:
“Lama moc qa hezuc eniŋte baraeŋgopieŋ,
me kanʒaŋ bâbâtâc ŋic erao fâsâerâ foekac,
iŋuc hâcne micticne moc mi aŋkewec.
33 Bâpitiwambiŋko kiŋ babatara i erao tarawec.
Á mâreŋko juju-ticne qâriuŋkewecte
qaŋeŋfâcne mozi wose manac ejare-fâreocmu?”
34 Eme ŋicbomboŋ e Filipo ʒiŋuc muhuc wiocnewec: “Go mutec manape, porofete e more iŋuc mukac, e jahacnere me ŋic mocte? 35 Eme Filipo e porofetere dâŋko iticnehuc Jesure Biŋebiaŋ âzâcnewec. 36 Iŋuc ehuc raku opâo fisipic. Eme ŋicbomboŋzi muwec, “Honec, opâ fokac ʒi; Miti Opâre mupe sâcne rua-narecmu me?” [ 37 Eme Filipozi muwec, “Dâŋ gazapac i maŋ hâcbuc mana ʒakiekomecko sâcne eene.” Eme dâŋ ʒiŋuc bâtikiecnewec: “Jesu Kristo e Anuture Ŋokâ i mana ʒakiekopac.” 38 Iŋuc murâ keretac bâniniŋkerâ Filipo â ŋicbomboŋ opâo hupic. Hurâ Filipozi ruacnewec. 39 Eme opâonec wefupire Wofuŋte Mârozi Filipo jowa rame ŋicbomboŋzi mocwâc mi honehuc bubiaŋko hata-ticnao rawec. 40 Filipo eki ine Asidode haeo fisime honembiŋ. Erâ irecnec fuŋkerâ haene haene miti jaza raku Kaisarea hae bâfuawec.