1 Qoqomâzi jauŋ babac eeŋgopieŋ i ŋoŋerao mi wahazejec. 2 Ŋic hezu hewâneŋ ejareniŋte qâoma mi enʒepieŋ. Gâcnezi ŋic hezu hewâneŋ ejareŋgopeneŋ muhuc aŋelo ejarembiŋ. 3 Âgofâc-ŋeŋic kâpâcwâru ficko râec-jopakicne jaŋere manasuhuc manapie mâmâc râec-ŋopakicne tinac ezejec. Erâ ŋoŋe sahachec jaha juŋgopieŋte qa imac ejarekicne jaŋere wâc manasunʒepieŋ. 4 Ŋowe ŋonâŋ jujure manapie wiac fârine eha fofo wirecko gâc mi hezejec. Boe sau â ʒuhuc bâtâc eeŋgopieŋ jaŋe Anutuzi okacne jareocmu. 5 Maŋŋeŋiczi moneŋ mafare harac mi ezejec. Wiac foŋarekac sâc mukâroŋ tâmiric bajunʒepieŋ. Wofuŋ e jahac ʒiŋuc muwec: “Noni mi behecgupemu, â hone qâoma moc mi egarepemu.” 6 Irec nâŋâc hâbi-nâŋec rohuc ʒiŋuc munʒepeneŋ:

7 Micne bapafâc-ŋeŋic Anuture dâŋ ŋaza qazuc embiŋ jaŋere manasuhuc junʒepieŋ, erâ miti hata âteku hâmombiŋ itirocne honehuc jaŋere bâjâpecne mamanasiŋhec junʒepieŋ. 8 Jesu Kristo e juweczi jukac ijaha juraʒihuc juocmu sanaŋ. 9 Mu qaqazuc dâŋ kosane hazec furu ŋazapie izi maŋŋeŋic mi hesifuckezejec; maŋŋeŋic aki anonoczi keteŋneme qiŋ herâ fome biaŋkeocmu, wiac nâkicnezi sâcne mi basanaŋkeocmu. Hata i âtembiŋzi fârine mi bâfuambiŋ. 10 Nâŋâcne alata ŋekac, irec nânâ i qoruc boze kiŋaŋ qacneeŋgopieŋ jaŋe nâniŋte mi mana-jarekicne. 11 Ŋoŋe manaeŋgopieŋ, qowi hezurâ socjeŋic taha bapa sâkozi sâqocnere kiŋte furu ufuŋko bafeme fârine hae sahao bahurâ ʒoczi rikeeŋgopieŋ. 12 Eme Jesu e iŋuc jaha socticnezi ŋic maŋfuru bacnâpoocte hae sahao qapie hâmowec. 13 Irec nâŋâc iŋuc jaha hae sahao erao hurâ, eki mimi faio fewec ijaha enʒepeneŋ. 14 Ʒiŋuc manahuc enʒepeneŋ: Hae ŋeŋe sanaŋ moc ʒira mi ŋenârekac; moc juku fufuane irec maŋhâhâŋ enâreekac. 15 Irec nâŋâc Jesure erâ Anutu ʒuʒuhuc jaha mumuteŋ ecnepene izi taha bâzi-ticne ezejec, micbipic-nâŋecte fârine ʒâŋe-ticne muac baafec enʒepeneŋ hâcne.

16 Jauŋ â bâmec baniŋte qâoma mi enʒepieŋ, Anutu e irec hâcne maname taha bâzi fârine eocmu. 17 Micne bapafâc-ŋeŋic jaŋere dâŋ reŋkehuc sâsec-jopanʒepieŋ; jaŋe maŋ qâqâtâc-ŋeŋic hone soŋaŋ eeŋgopieŋzi juku gie-jeŋicte fuŋne mutaniŋkeniŋmu. Irec gie-jeŋic bubiaŋko bapie sâckeocmu, busâqocko bahapie ŋoŋerao wiac sâcne mi biaŋkeocmu.

18 Ŋoŋe nâŋere erâ numuhuc junʒepieŋ. Nâŋe pectâc sasawa junaŋte ʒoɋac eeŋgopeneŋzi maŋnâŋecko bahac basaeŋgopeneŋ. 19 Nunumuzi baficnupie Wofuŋzi bârisiecnume ŋoŋerao biac fâpemurâ ŋaza sanaŋkekopac.

20 Wama Anutu e lama soŋaŋ sâko Wofuŋ-nâŋec Jesu ʒâʒâfic fofo sanaŋ irec socte hâmockonec bârisiewec, 21 Anutu eki hâcne wiac biaŋne fuŋne fuŋne tahac-ŋopahuc baafec-ŋopame dâŋticne reŋkenʒepieŋ, erâ e jahac maname sâckeekac i Jesu Kristore erâ ŋoŋerao bâfuazejec. Erao mumuteŋzi mumuteŋ foraʒihuc juzejec sanaŋ. Jâmbomac.

22 Âgofâc, no dâŋ ʒoricne boc mi qâreŋkepac, eme ŋoŋe uŋsawaŋ dâŋ i manapie mi sâqoreocte esoc-ŋopakopac. 23 Erâ ŋazape mananiŋ, âgo-nâŋec Timoteo e firuembiŋ, biac wareme jowape fanacmu. 24 Micnefâc-ŋeŋic â mitiŋic ŋokac sasawa manasu-ŋare-fârekopac. Italia mâreŋkonec jaŋe manasu-ŋareŋgopieŋ. 25 Aki anonoczi ŋoŋerao fofârezejec.