1 Âgofâc, ŋoŋe tatamac Wofuŋ-nâŋec Jesu Kristo manasiŋkeeŋgopieŋzi ŋic fekicne wahakicne wiac sâctiri mi ejarenʒepieŋ. 2 No kecʒiŋucte mukopac: Tutumaŋ-ŋeŋicko ŋic moc boreŋ qonaŋkerâ ŋaqi erinehec hefâocmu, eme ere râpefuŋko ŋic hapetac moc ŋaqi taocnehec hefâocmu. 3 Ehame ŋoŋe ŋic ŋaqi erinehec erao ʒâŋe firâ ʒiŋuc âzâcneniŋmu: “Go ʒira ware popoo ŋec.” Iŋuc murâ hapetac e ʒiŋuc âzâcneniŋmu: “Go ocna domac, me ɋâriŋko waha ŋec.” 4 Ŋoŋe ŋondeŋ-ŋeŋicko ŋic teŋtiri ejareeŋgopieŋ, i maŋŋeŋicko dâŋ repicne soŋkepie fokacte wiac esifuckeeŋgopieŋ hâcne. 5 Âgo biaŋfâc-nane, dâŋ mupe mananiŋ: Anutuzi ŋic weniŋucne rowosâec-jopawec? Mâreŋko hapetac jueŋgopieŋ jaŋe hâcne mamanasiŋko maŋ mâririhec erâ uucmaŋ rauckeniŋte rowosâec-jopawec. I irec ejareekac jaŋe hâcne biŋe qajarewec. 6 Eme ŋoŋe ine hapetac jaŋe ʒâŋe titikic honec-jopaeŋgopieŋ. Á weni jaŋezia bâuruŋ-ŋoparâ kiarao râec-ŋopaeŋgopieŋ? Mafahec jaŋe hâcne iŋuc eŋareeŋgopieŋ. 7 Ehuc wâc ʒâŋe biaŋ fai-ŋeŋicko fewec e musoriŋkeeŋgopieŋ.

8 “Gahacnere egareekac sâc ijaha âgogere egarezejec”, sâcmutâc dâŋ neŋgocne iŋuc qâreŋkekicne fokac, i reŋkepie jâmbomac biaŋkeocmu. 9 Á ŋic sâctiri ejareniŋmu, ine bahac bâfuapie sâcmutâc dâŋzi qaqatara ŋic eŋgopieŋ irec fuŋne bataniŋkeocmu. 10 Moc e sâcmutâc dâŋ gâcne reŋke-fârehuc mocjaha qatarame sâcmutâc dâŋ qâqâhâc qatarawec eocmu. 11 “Ŋowe ŋonâŋ ŋohe bebehec mi ezepirec” muwec ekizia wâc “go ʒika mi qazemec” muwec. Eme go ŋonâŋge mi behecmu, ʒika ine qacmu, ine dâŋ qaqatara ŋic ecmu. 12 Sâcmutâc dâŋ rambaŋko rârâec-nâpo izi juku fuŋne babataniŋ dameŋko rambaŋko râec-ŋopaocte wiac mana tarahuc mu bac enʒepieŋ. 13 Ŋic uruc jauŋ tâmiric juocmu e wâc juku uruc jauŋ mi ecnezo. Uruc jauŋhec juocmu e fuŋne babataniŋko hâhâwic tâmiric domaocmu.

14 Âgofâc-nane, ŋic moczi “mamanasiŋhec jukopac” muocmu, ehuc eehâmo gie mi baocmu, e mamanasiŋ-ticnezi moc bafickeocmu me? Mamanasiŋzi wemocko sisipirickonec bataraocmu. 15 Ŋic me ŋokac âgo-ŋeŋic moczi qoruc ŋaqi me nânâ wiac basahuc juhame 16 ŋoŋeraonec moczi e ʒiŋuc âzâcneocmu: “Go sâcne ra juzemec, erâ fâfârezicte sahacge foŋkezemec â nânâ nâ gapec ezemec”, moc e miczi iŋuc sawa muhuc jauŋ mi bacneocmu, izi wemocko bafickeocmu? 17 Irec mamanasiŋ bucticne, fârine eehâmo gie mi fuaocmuo, hâmo mâteŋ ekicne muzo. 18 Me moczi ʒiŋuc mecne muocmu: “Go mamanasiŋ fogarekac, â no eehâmo gie fonarekac.” Me, mamanasiŋge eehâmo gie tâmiric i nowatutec honepe. Á no eehâmo gie bahuc mamanasiŋ-nanere fuŋne sâcne gowatupemu. 19 Anutu mocjaha jukac, dâŋ i mana ʒakiekic; i sâcne ekic. Dâŋ i demoŋ jaŋe wâc mana ʒakieŋgopieŋ, ehuc ɋarac ɋarac qaeŋgopieŋ. 20 Ŋic maŋtac go mamanasiŋ eehâmo gie tâmiriczi wiac jawane ekac irec fuŋne ʒi manac.

21 Mimiŋne-nâŋec Abraham e ŋokâ-ticne Isaka taha bâzi rikeocte alatao râewec ira Anutuzi manacneme kiŋfâsâc ewec i eebapa-ticnere hâcne. 22 Eme ʒiŋuc honekic: Abraham mamanasiŋ-ticne I eebapa-ticnezi bafickewec, ehuc mamanasiŋ-ticne qizecne qawec. 23 Eme irec hâcne Abrahamte dâŋqâreŋ kecʒiŋuc fokac i sanaŋkewec: “Abraham e Anutu manasiŋkeme ere maname kiŋfâsâc ewec.” Eme irec ʒâŋe-ticne Anuture âgo mucnekicne 24 Honeŋgopieŋ, Anutu e ŋic moc mamanasiŋ-ticnere sawa mi maname kiŋfâsâc eocmu, fârine eehâmo gie bame manacneme kiŋfâsâc eocmu. 25 Á sasec ŋokac Rahaba e iŋuc jaha mamanasiŋ-ticnere fârine eehâmo gie bame Anutuzi manacneme kiŋfâsâc ewec. E ŋic mâreŋ hone tâcnepic jahe erao fisipire âgo ejacterâ hatasoŋko râec-jofame wisepic. 26 Irec ʒiŋuc fokac: Sahac e mâro tâmiric erâ qâŋɋâŋ eekac, iŋuc jaha mamanasiŋzi eehâmo gie tâmiric qâŋɋâŋne jaha eekac.