1 Ajoc, mafa mâririhec ŋoŋe ʒârâ hâriŋ fua-ŋareocmu irec qanaŋ ki mamakuc enʒepieŋ. 2 Mafa mâriri-ŋeŋic i ʒaŋke-fârewec, ŋaqi guru dindiŋ-ŋeŋic mâreŋte temane ewec, 3 â moneŋ boreŋ-ŋeŋic gufewec, eme gufe izi ŋaŋacne fuŋne bataniŋkehuc sahac-ŋeŋic ʒoc iŋucne nâmizieocmu. Ŋoŋe dameŋ qândâŋkeha mafa sesuc sembureŋ hefembiŋ. 4 Manaŋgopieŋ, padi qaŋarepie gie furi sakare-jarembiŋ irec kiŋzi hohosâcne qakac, erâ qa roro ŋic jaŋere kio wâwâsiczi sambâŋ momori jaŋere Wofuŋte hazecko huwec. 5 Ŋoŋe mâreŋko wiac nâminʒiriŋkehuc mana aŋac embiŋ â okac dameŋ maickeha nâ areŋ embiŋ. 6 Ŋoŋe ŋic tiŋne dâŋne mutararâ ʒikao râembiŋ. E sahac-ticne mi ŋezickekac.

7 Âgofâc-nane, ŋoŋe Wofuŋ fisiocte woŋec tatakic tâmiric junʒepieŋ. Manaŋgopieŋ, gie rune moczi iŋuc jaha nânâ he sarac erâ fârine fua biaŋ eocte woŋec juekac, ehuc hoe ʒoaŋ sâckoa bacneme fua sokac eocte mamanac juekac. 8 Eme Wofuŋte dameŋ bembeŋkekacte ŋoŋe iŋuc jaha tatakic tâmiric woŋec juhuc maŋŋeŋic keteŋnenʒepieŋ. 9 Âgo bureŋ, ŋoŋe mu takic mi eec enʒepieŋ; manaŋgopieŋ mumutara ŋic e motâc râpeo domakac, fuŋne-ŋeŋic rituzacte dâŋ ere biŋe râepie fozejec. 10 Âgofâc-nane, porofete Wofuŋte micte dâŋ mumbiŋzi ʒâic busâqoc tatakic tâmiric manahuc jumbiŋ jaŋere kike hata bâjâpehuc junʒepieŋ. 11 Manaŋgopieŋ, ʒâicmaŋko sasanaŋhec jumbiŋ jaŋere manapene ʒerine ekac. Hiobe sasanaŋ-ticnere manaeŋgopieŋ, â Wofuŋzi ʒâhec wiac afusecnewec i wâc manaeŋgopieŋ. Wofuŋ e buuruc â jauŋ-ticne kâcɋene fokac hâcne.

12 Âgofâc-nane dâŋ fârine moc ʒi: ŋoŋe sambâŋko ɋetickehuc mumupaŋ, me mâreŋko ɋetickehuc mumupaŋ, me wiac mocko ɋetickehuc mumupaŋ, i mi enʒepieŋ. Ŋoŋe dâŋŋeŋic jâmbomacte fârine jâmbomac ezejec â aricnere fârine aricne jaha ezejec. I kiŋ bâfuanʒipiŋte iŋuc enʒepieŋ.

13 Ŋoŋeraonec moczi ʒâic busâqocko juocmu, e Anutu numucnezejec, me moczi bubiaŋko juocmu, e mumuteŋ gae hezejec. 14 Ŋoŋeraonec moczi huc foocmu, e kikefuŋte micne bapa hefârec-jopame fisirâ ere faio numunʒepieŋ, erâ Wofuŋte ʒâŋe muhuc wokemaŋ opâ ruacnenʒepieŋ. 15 Eme mamanasiŋko nunumu mukicne izi huchec bâpiaŋkeocmu â Wofuŋzi e ɋiɋicne baocmu. Á sâqocne bawecko i bâtâmirecneocmu. 16 Irec ŋoŋe ɋiɋic qaniŋte sâqocne mumufuac erâ nunumuzi dodopec enʒepieŋ. Ŋic tiŋne moczi numume tâpirinehec eocmu. 17 Elia e ŋic jaha, nâŋâc iŋucne. Eme eki hoe mi heocte samarierâ numume mâreŋko jara jahec â moc â mosa 6 hoe mi hehe mâc fowec. 18 Eme ʒâhec mocwâc numume sambâŋkonec hoe wahame mâreŋko wiac ukicne âkeʒuwec.

19 Âgofâc-nane, ŋoŋeraonec moc e dâŋfârire hata qâsorieme âgo moczi bâtikieocmu, 20 e dâŋ ʒiŋuc manazejec: Moc e âgo-ticne hata sâqocnaonec bârisieocmuzi e jahacne maŋ qâqâtâc hâmockonec bataraocmu â sâqocne guru sâko sâockeocmu.